Gikan sa Among mga Magbabasa

Kagawasan sa Hunahuna Kasagaran gitugotan nako ang akong hunahuna nga maglatagaw, nga maghunahuna sa dili-maayong mga hunahuna. Maong natingala ako sa pagbasa sa artikulong “Ang Hunahuna sa Bibliya: Ang Bibliya ba Nagbugnaw sa Kagawasan sa Hunahuna?” (Hunyo 8, 1994) Wala gayod nako maamgohi nga si Jehova nga Diyos mag-isip niana nga sala kon ang usa tinuyong nagpalandong sa sayop nga dalan. Salamat kang Jehova sa paghatag kanako sa maong direktang tambag nga makatabang kanako sa pagtul-id sa akong hiwi nga panghunahuna!

J. P., Pilipinas

Mga Suliran sa Gugma Daghang salamat sa mga artikulong “Mga Batan-on Nangutana . . . Unsa Man Kon Mahigugma Ako sa Dili-Magtutuo?” (Mayo 22, 1994) ug “Sa Unsang Paagi Makapugong Ako sa Pagkaibog sa Usa ka Tawo?” (Hunyo 8, 1994) Usa ka babayeng kauban nako sa trabaho nakagusto kanako, ug akong nakaplagan ang akong kaugalingon nga nadani kaniya. Nasayod ako nga kini sayop ug miampo kang Jehova alang sa tabang. Sa dihang nakita nako kining mga artikuloha, gibalikbalik nako kini pagbasa. Karon akong naamgohan nga ang dili-dugay nga kasakit sa kasingkasing nga moresulta sa pagputol sa relasyon mas maayo pa kay sa tibuok-kinabuhing mga suliran nga moresulta gumikan sa makadaot nga relasyon.

P. J., Tinipong Bansa

Daw ang mga artikulo gisulat alang gayod kanako! Ako nahibulong kon unsa untay mahitabo kanako kon kining mga artikuloha wala pa mapatik. Salamat sa pagkahibalo sa mga suliran nga giatubang sa mga batan-on.

S. J., Nigeria

Naibog ako sa usa ka lalaki sa akong klase. Siya guwapo ug malumo kaayo. Apan, sukad mabasa ang artikulo kanunay nakong gipangutana ang akong kaugalingon, ‘Pareho ba kami ug mga tumong ug dalan sa kinabuhi?’ Human kini mapalandong, akong naamgohan kon unsa ako ka hungog hangtod karon. Buot kong mawala dayon kining maong kaibog!

S. T., Hapon

Nahigugma ako sa usa ka dili-magtutuo ug naminyo kaniya. Mitambong siya sa Kristohanong mga tigom aron lamang sa pagpahimuot kanako. Human kami maminyo, siya nausab. Misulay pa gani siya sa pagpahunong kanako sa pag-alagad kang Jehova. Unya iya kong gikulata ug giluiban. Karon ako nahimong diborsiyada. Kon masabtan pa lamang sa mga batan-on kon unsa ka ugdang ang pagpakigdeyt sa usa ka dili-magtutuo! Dili ko buot si bisan kinsa nga makasinati sa akong naagoman.

T. F., Puerto Rico

Kapit-os Daghang salamat sa artikulong “Ang Hunahuna sa Bibliya: Unsay Makatabang Kanimo sa Pagsagubang sa Kapit-os?” (Septiyembre 8, 1994) Ako gimatuto ingong Kristohanon apan mibiya sa kamatuoran sa katuigan sa akong pagkatin-edyer. Tulo na ka tuig sukad ako nakabalik, apan ako naminyo sa usa ka dili-magtutuo. Kanunay akong magpalandong sa mga sayop nga akong nahimo, nga wala makaamgo nga mao kini ang hinungdan kon nganong nakasinati ako ug hilabihang kapit-os. Salamat sa pagtabang kanako sa pagkasabot nga dili makaayo ang pagpalandong sa nangagi. Hinunoa, kinahanglang maningkamot ako para sa akong umalabot.

R. L., Tinipong Bansa

Kamo nag-ingon nga ang ‘mga tawo sa tanang pangedaron nagasinati ug kapit-os.’ Ako 21 anyos ug nag-antos sa hilabihang kapit-os. Kaduha ako maospital sulod sa walo ka bulan gumikan sa mga pamikog sa kaunoran ug may kalabotan sa kapit-os nga mga labad sa ulo. Sa matag panahon ang mga doktor mosulti kanako nga bata pa kaayo ako aron mobati ug kapit-os. Ang inyong artikulo sa ingon naghatag kanako ug diyutayng pagbati sa kahupayan.

V. P., Tinipong Bansa

Leksiyon sa Geograpiya Ako usa ka 11-anyos nga batang babaye, ug akong giapresyar pag-ayo ang artikulong “Naglutaw nga mga Isla sa Lake Titicaca.” (Hunyo 22, 1994) Sa klase sa geograpiya ang magtutudlo nangutana kanamo kon may mga tawo ba nga nagpuyo sa Lake Titicaca. Ang tanan nakong mga klasmet miingong wala. Kay nakabasa sa Pagmata!, ako mitubag ug oo. Ang magtutudlo nangutana kanako kon sa unsang paagi ako nahibalo, nga nagtagana kanako ug kahigayonan sa paghatag kaniya ug maayong pamatuod.

S. B., Italya