Gikan sa Among mga Magbabasa

Pagmata! Napauswag Di pa dugay nakaplagan nako ang kopya sa Abril 8, 1994, nga Pagmata! sa eskrin sa akong pultahan. Waw! Unsay nahitabo? Inyong napatungha ang nunot-sa-panahon, impormatibong publikasyon. Nahingangha ako sa kausaban, ug sa unang higayon, sa tinuoray gibasa nako ang mga artikulo. (Kasagaran ako maghunahuna, ‘Oh, dinhi na sab sila,’ ug ilabay ang magasin.) Ang tanan makakaplag ug makapaikag nga butang niining magasina. Nalingaw ako ilabina sa mga artikulo bahin sa kanser ug bahin sa “Ang Nindot ‘Nagadagan nga Dalan’ sa Canada.” Kamo nagauswag sa hustong direksiyon. Ipadayon ang maayong buluhaton, ug isaad ko nga wala na akoy ilabay nga kopya hangtod mabasa nako kini.

D. G., Tinipong Bansa

Kalibog sa Geograpiya Sa inyong Oktubre 22, 1994, nga mga artikulo mahitungod sa mga misyonaryo, nga nag-ulohang “Pagbalhin Pakasadpan Ngadto sa Uropa,” kamo nag-ingon nga si Boniface “nangahas pagtumba sa sagradong kahoyng oak sa Thor” sa Geismar, haduol sa Göttingen, Alemanya. Sumala sa akong nasayran, ang Geismar nga gihisgotan dili haduol sa Göttingen kondili haduol sa Fritzlar.

A. L., Alemanya

Husto ka. Napamatud-an nga adunay duha ka dapit nga gitawag ug Geismar, ug amo kining nabaylo. Salamat sa pagpaila kanamo sa among sayop.​—ED.

Relihiyon ug Gubat Ang inyong Oktubre 22, 1994, nga seryeng “Sa Dihang ang Relihiyon May Gidapigan sa Gubat” naghisgot sa inyong gihunahunang kapakyasan sa bahin sa Katolikong mga lider sa direktang pagsaway sa gubat. Apan lahi ang gipadayag sa kasaysayan. Sa sinugdanan sa paglutos ni Hitler sa Alemang mga Hudiyo, si Kardinal Faulhaber sa Munich nagwali dapig sa mga Hudiyo. Ang ubang bayanihong mga klero direktang nagsaway sa mga balaod sa Nazi nga nagdili sa pagminyoay tali sa mga “Aryan” ug mga Hudiyo. Human sa pagbuto sa Gubat sa Kalibotan II sa Uropa, si Hitler nagsira sa Katolikong mga tunghaan, nagpahunong sa Katolikong prensa, ug, sa Polandia, nagsira sa tanang kombento, monasteryo, ug seminaryo.

J. L., Tinipong Bansa

Ang mga artikulo gipasikad sa dili-mapihigon ug tinahod nga mga tinubdan. Pananglitan, ang librong “German Catholics and Hitler’s Wars” gisulat ni Gordon C. Zahn, nga usa ka Katolikong propesor. Sa prangkang pagkasulti, daghan kaayo ang ebidensiya nga, labing menos sa sayong mga yugto, ang Katolikong herarkiya mihatag ug bug-os nga pagpaluyo sa partidong Nazi. Wala kini magpasabot nga walay Katolikong mga klero nga maisogong mibatok sa mga Nazi. Apan tin-awng kini mga eksepsiyon.​—ED.

Pagpasuso sa Inahan Ang inyong artikulong “Mga Kinahanglanon sa Pagpasuso sa Inahan” (Agosto 22, 1994) nagtagana ug labi pa gani ka detalyadong impormasyon kay sa inyong kanhing mga artikulo bahin sa ulohan. Kasagaran, ang mga amahan dili maningkamot sa pagtabang sa ilang mga asawa nga molampos sa pagpasuso. Apan ang inyong artikulo tinuod nga nagsulti sa mga amahan ug ubang mga membro sa pamilya kon unsay ilang mahimo sa pagtabang nga mahimong malamposon ang pagpasuso.

D. D., Tinipong Bansa

Nabatonan ko ang kahibulongang kasinatian sa pagpasuso sa akong duha ka anak. Dihay mga suliran sa sinugdan, sama sa kasakit, apan uban sa pagdasig gikan sa akong magulang nga babaye ug sa tambag gikan sa akong doktor, akong nabuntog ang kalisdanan. Akong dasigon ang tanang inahan nga makapasuso sa iyang bata sa paghimo niana, sanglit ang dulot nga kasuod tali sa inahan ug anak maoy usa ka makalingawng kasinatian nga dili gayod makalimtan sa usa.

U. B., Alemanya

Misteryosong Balatian Sanglit tigbasa sa inyong mga magasin sukad sa panuigong singko anyos, giapresyar gayod nako ang artikulong “Misteryosong mga Sakit sa Guam.” (Agosto 8, 1994) Ang akong inahan, nga usa ka matinumanong alagad sa Diyos hangtod sa iyang kamatayon niadtong 1972, usa ka biktima niining sakita. Buot ko kamong pasalamatan tungod sa impormasyon ug sa bug-os nga katin-awan nga inyong gihatag. Akong gipaambit kining isyuha sa akong pamilya ug mga higala sa pagpakita sa bili sa inyong magasin.

W. A., Tinipong Bansa