Gikan sa Among mga Magbabasa

Ang Kalibotan Sukad sa 1914

Salamat sa serye sa mga artikulo bahin sa “Ang Kalibotan Sukad sa 1914.” (Marso 8 ngadto Hunyo 22, 1987) Sa tunghaan kami kanunay tudloan ug kasaysayan gikan sa panahon ni William the Conqueror apan dili gayod sa tukma-panahong mga kahikayan sa kalibotan. Ako wala gayod niadto makasabot sa mga hinungdan ug mga hitabo luyo sa Gubat sa Kalibotan II, nga nahitabo sa akong pagkabata. Ang “kahadlok” nga inyong gihisgotan maoy tinuod kaayo ug gibati bisan sa mga bata.

C. L., Inglaterra

Ang inyong serye sa mga artikulong “Ang Kalibotan Sukad sa 1914” talagsaon gayod! Sa pagpakli sa mga panid sa magasin nga naundan sa Bahin I, kadto mao ang artikulong wala kaayo makadani sa akong pagtagad, apan sa mihukom ako sa pagbasa niadto, ako wala gayod makahunong ug nagpadayon sa pagbasa sa Bahin II, nga diha na, nga nagmahay nga ang mosunod nga mga numero wala pa. Niadto lamang gayod ako naikag kaayo sa mga hitabo sa milabayng katuigan.

J. E. S. J., Brazil

Ang Iglesya Katolika ug si Hitler

Alang sa kapin ug 50 milyong Katoliko sa Tinipong Bansa, ang Katolikong Liga sa Relihiyoso ug Sibil nga mga Katungod buot mopahayag sa katingala ug kahiubos niini sa labihang pagdaot sa Iglesya diha sa inyong isyung “Relihiyon Diha sa Politika—Kabubut-on ba sa Diyos?” (Abril 22, 1987) Ang hapin adunay usa ka letrato sa usa ka membro sa herarkiyang Katoliko nga nakiglamano kang Hitler. Ang ngil-ad nga gipasabot mao nga ang kalihokang Nazi, ug ang paningkamot niana sa pagpatay sa mga Hudiyo ug sa uban, nagbaton sa bug-os nga kooperasyon ug panalangin sa Iglesya Katolika. Kining bakak ug iresponsableng akusasyon tin-awng makita sa panid 6, diin gipatuo nga ang mga klerigong Katoliko nagtanyag sa pagmandong Nazi sa “pagpaluyo o labing menos dungan nga paglungtad.” Sa pagkamatuod, ang Batikano misulay sa pagpakigsabot nga makigdait kang Hitler sa unang mga adlaw sa Nazi nga Alemanya sa dihang makataronganon pa niadto ang paglaom nga mapaarang-arang pa ang mga pagpatuyang niini. Samtang nadayag ang Nazi nga pagdiniktador, miuswag ang pagsukol sa Iglesya Katolika. Dili lang ang mga editor sa Pagmata! angay mangayog pasaylo sa pagpatuo sa lahing butang; angay nilang tul-iron ang rekord alang sa mga magbabasa niini.

K. G. L., Direktor sa Publikong mga Kahikayan, Tinipong Bansa

Panahon sa iyang bag-ong pagduaw sa Alemanya, si Papa Juan Paulo II misulay sa pagpasiugda sa pagsupak sa Iglesya Katolika sa Nazismo. Sumala sa mga asoy, iyang gilista ang daghang klero ug membrong mga Katoliko nga misupak sa mga Nazi. Apan sumala sa “The New York Times” (Mayo 4, 1987), ang maong “paningkamot nakadanig pagsaway gikan sa pila ka Katoliko, hinunoa, kinsa nag-akusar sa Papa sa pagtuis sa kamatuoran nga diyutay rang Katolikong lider ang misukol gayod sa Nazi nga pagdiniktador, gawas lamang sa pagpakigbisog sa pagluwas sa mga katungod sa iglesya.” Bisan ang Heswitang pari si Rupert Mayer, kinsa gibalaan sa papa tungod sa pagpahayag nga supak sa mga Nazi, napriso sa Benedictine nga monasteryo sa Ettal ilalom sa kasabotan tali sa mga lider nga Nazi ug sa herarkiya sa iglesya, nga kang kansa ang pagkaprangka sa Heswita nahimong kaulawan, sumala sa “Times.” Usa ka Heswitang pari! Nganong ang papa wala magpasidungog sa kawhakawhaang Katolikong mga obispo, arsobispo, ug kardinal, gawas pa sa kaliboang Katolikong pari, tungod sa ilang pagsupak sa mga Nazi? Kay ang kinabag-an wala mosukol sa Nazismo!—ED.