Pagpapas sa Sayop nga mga Ideya Bahin sa mga Saksi ni Jehova

SAMTANG nakig-ambit sa ilang balay-balay nga pagsangyaw, duha sa mga Saksi ni Jehova nakatagbo ug usa ka lalaki nga nagsulti kanilang siya dili interesado. Ang mga Saksi mibiya sa hilom, apan samtang sila nagsubay sa aseras, ilang namatikdang ang lalaki nagsunod kanila. “Palihog sa paghunong!” mitawag ang lalaki. “Buot nakong mangayog pasaylo. Wala akoy nasayran bahin sa mga Saksi, ug nagtuo ako nga daghang tawo ang nahatagan ug sayop nga impormasyon bahin kaninyo.”

Ang tawo nagpailaila nga siya si Renan Dominguez, ang tsirman sa programa sa Rotary Club sa South San Francisco, California. Mihangyo siya nga ang usa ka Saksi moadto sa klab ug mohatag ug pakigpulong bahin sa mga pagtuo ug mga buluhaton sa mga Saksi ni Jehova. Ang usa ka talaan sa kalihokan nahikay. Ang Saksi mosulti sulod sa 30 minutos ug unya buksan ang tigom alang sa mga pangutana gikan sa mamiminaw. Si Ernest Garrett, usa ka Saksi sulod sa daghang tuig sa dapit sa San Francisco, gihangyo nga mohatag sa pakigpulong ngadto sa Rotary Club sa Agosto 17, 1995, ug nagpahayag sa mosunod:

“Ako naghunahuna ug nag-ampo mahitungod sa kon unsay akong isulti ngadto sa mga membro sa Rotary Club, nga maoy mga pangulo sa negosyo ug komunidad, sama sa mga magbabangko, mga abogado, ug mga doktor. Mihimo akog diyutayng panukiduki ug nakadiskobre nga ang gipatik nga tumong sa Rotary Club mao ang pagpalig-on sa komunidad. Busa akong gipahayag ang impormasyon sa panid 23 sa brosyur nga Jehovah’s Witnesses in the Twentieth Century, nga nag-ulohang ‘Praktikal nga Bili sa Maayong Balita Alang sa Inyong Komunidad.’”a

“Akong gipatin-aw nga ang mga Saksi ni Jehova maoy impluwensiya sa maong direksiyon. Kada adlaw sa semana, ang mga Saksi ni Jehova nagatuktok sa mga pultahan sa ilang komunidad. Ang ilang tinguha mao nga impluwensiyahan ang ilang mga silingan sa pagbaton ug lig-ong pamilya​—ug ang lig-ong pamilya moresulta sa lig-ong komunidad. Kon dugang mga indibiduwal ug mga pamilya ang maimpluwensiya sa mga Saksi ni Jehova sa pagsunod sa Kristohanong mga prinsipyo sa kinabuhi, mas menos ang delingkuwensiya, imoralidad, ug krimen diha sa komunidad. Kining impormasyona gidawat pag-ayo sa mga membro tungod kay kadto nahiuyon sa mga tumong sa Rotary Club.”

“Nganong Dili Kamo Moapil sa Politika?”

“Sa dihang ang tigom gibuksan alang sa mga pangutana, usa sa unang mga pangutana mao: ‘Nganong dili kamo moapil sa politika ug sa gobyerno?’ Unya ang talahorong lalaki nga nangutana niana midugang: ‘Abi mo, ang Maayong Basahon nag-ingon: “Ibayad kang Cesar kon unsay iya ni Cesar.”’ Giingnan ko siya nga kami bug-os nga uyon sa maong pahayag ug bug-os nga nagpaluyo niana. Gipunting nako nga ang kinabag-an sa katawhan nga akong nabatian nga nagkutlo sa maong kasulatan dili gayod mokutlo sa laing katunga niana, nga nag-ingon: ‘Ibayad ang mga butang sa Diyos ngadto sa Diyos.’ (Mateo 22:21) Busa, diay, kinahanglang mohinapos kita nga dili ang tanan maoy iya ni Cesar. Adunay pipila ka butang nga iya sa Diyos. Atong giatubang ang butang nga susihon kon unsay iya ni Cesar ug kon unsay iya sa Diyos.

“Gipakita nako niya nga sa gisukna ni Jesus ang pangutanang ‘Subay ba sa balaod nga mobayad ug kada-ulo nga buhis ngadto kang Cesar o dili?’ siya wala motubag pinaagi sa pag-ingong oo o dili. Siya miingon: ‘Pakitai ako ug sensilyo sa kada-ulo nga buhis,’ usa ka Romanhong denario. Siya nangutana: ‘Kang kinsa bang dagway ug mga kinulit kini?’ Sila miingon: ‘Kang Cesar.’ Unya miingon siya: ‘Busa, ibayad ang mga butang ni Cesar ngadto kang Cesar.’ (Mateo 22:17-21) Sa laing mga pulong, ibayad ang buhis ngadto kang Cesar tungod kay atong makuha ang pipila ka serbisyo gikan ni Cesar ug kita angayng mobayad ug buhis alang niini. Akong gisaysay nga ang mga Saksi ni Jehova nagbayad sa ilang mga buhis ug dili manglimbong sa gobyerno sa butang nga angay kaniya.

“Unya akong gipahayag nga ang mga Saksi ni Jehova wala magtuo nga utang nila ang ilang mga kinabuhi kang Cesar. Nagtuo sila nga utang nila ang ilang pagsimba sa Diyos, ug kini sa tukma ilang ibayad balik kaniya. Busa sa dihang himoon namo ang maong pagbarog, kami walay tuyo nga dili motahod kang Cesar. Among ginasugot ang tanang balaod ni Cesar, apan sa dihang adunay panagbangi, sa pagkamatinahuron kami mopalabi sa pagsugot sa Diyos ingong magmamando inay sa mga tawo. Dayon ang tawo nga misukna sa maong pangutana miingon atubangan sa tibuok grupo: ‘Dili ako makalalis niana!’

“Kami nakatubag usab sa ubay-ubayng pangutana bahin sa among buluhaton sa pagsangyaw. Daghan sa mga membro miduol human sa tigom ug nakiglamano ug miingon nga sila bug-os nga mouyon kanamo​—nga ang pamilya mao ang pundasyon sa usa ka lig-ong komunidad. Unya among gihatagan ang matag membro sa brosyur nga Jehovah’s Witnesses in the Twentieth Century.

“Human sa maong tigom ang tsirman sa programa, si G. Dominguez, mitelepono kanako ug mihangyo nga ako mohapit sa iyang opisina, kay siya adunay dugang nga mga pangutana bahin sa among mga pagtuo. Kami may maayong panaghisgot bahin sa ubay-ubayng mga kasulatan. Gusto niya ilabina nga akong ipatin-aw ang among baroganan bahin sa dugo. Siya miingon nga siya dili modawat ug abono sa iyang kaugalingon, ug siya nakadayeg kaayo sa impormasyon nga akong gihatag kaniya gikan sa brosyur nga Sa Unsang Paagi ang Dugo Makaluwas sa Imong Kinabuhi? nga iya akong gidapit nga mobalik ug magpahayag ngadto sa mga membro sa klab bahin sa among baroganan bahin sa dugo. Gidapit nako ang laing Saksi, si Don Dahl, nga mokuyog kanako sa maong programa. Siya moadto sa mga ospital aron hisgotan ang isyu uban sa mga doktor sa dihang ang mga Saksi mosulod alang sa mga operasyon. Nga nagkauban, among bug-os nga gipatin-aw kon sa unsang paagi kami makigtinabangay sa mga doktor ug administrasyon sa ospital sa pagtin-aw sa among Kasulatanhong baroganan ug paghatag ug malamposong mga kapuli sa abono sa dugo.”​—Levitico 17:10-12; Buhat 15:19-21, 28, 29.

‘Buot Mong Ipasabot nga Pasagdan Nimong Mamatay ang Imong Anak?’

“Human sa tigom usa ka talahorong lalaki miduol ug nangutana kanakong pribado: ‘Buot mong ipasabot nga pasagdan nimong mamatay ang imong anak kon siya maaksidente ug dad-on sa kuwarto sa emerhensiya nga giagasan ug daghang dugo?’ Gipasaligan ko siya nga gibati ko ang iyang kabalaka, kay ako may usa ka anak lalaki ug nawad-an kaniya gumikan sa pagbuto sa ayroplano ibabaw sa Lockerbie, Scotland, niadtong 1988. Ingong tubag sa iyang pangutana, giingnan ko siya una nga dili ko buot nga mamatay ang akong anak.

“Kami dili kontra sa doktor, kontra sa tambal, o kontra sa ospital. Kami dili mga mananambal pinasukad sa pagtuo lamang. Gikinahanglan namo ang mga serbisyo sa doktor. Among gibutang ang among pagsalig diha sa Diyos ug masaligon nga ang iyang mga pagtultol bahin sa dugo maoy alang sa among malungtarong kaayohan. Ang Diyos gibatbat diha sa Bibliya ingong ‘ang Usa nga nagatudlo kaninyo sa pagpahimulos sa inyong kaugalingon, ang Usang nagapasubay kaninyo sa paagi nga angay ninyong pagalaktan.’ (Isaias 48:17) Gihatagan niya ang iyang Anak sa katakos sa pagbanhaw sa mga patay. Si Jesus miingon: ‘Ako mao ang pagkabanhaw ug ang kinabuhi. Siya nga nagapasundayag ug pagtuo kanako, bisan pag siya mamatay, mabuhi; ug ang matag usa nga buhi ug nagpasundayag ug pagtuo diha kanako dili gayod mamatay. Nagtuo ka ba niini?’​—Juan 11:25, 26.

“Ang amo lamang gihangyo nga hisabtan sa mga doktor mao nga ang among baroganan maoy butang labot sa konsensiya ug kini dili mahimong mahangyo. Dili kami makahangyo niining butanga sama ra nga dili kami makahangyo sa balaod sa Diyos bahin sa pagpanapaw. Kami dili makahangyo sa Diyos ug moingon, ‘Diyos, aduna bay bisan unsang kahimtang nga ubos niana ako makapanapaw?’ Unya ako miingon sa maong tawo: ‘Nangutana ka kanako kon pasagdan ko bang mamatay ang akong anak pinaagi sa pagdumilig abono sa dugo. Mahimo ba, gusto nakong mangutana kon imong pasagdang mamatay ang imong anak sa pag-alagad sa kasundalohan sa bisan unsang nasod?’ Siya mitubag dayon ug mapasiugdahon, ‘Oo! Tungod kay kana maoy iyang katungdanan!’ Miingon ako: ‘Imong itugot nga ang imong anak mamatay tungod kay kana alang sa usa ka kawsa nga imong gituohan. Itugot kanako ang samang pribilehiyo maylabot sa akong anak.’

“Ang usa ka makaiikag nga hitabo niining tanan mao nga ang tsirman sa programa, si G. Dominguez, nagdapit sa akong asawa ug kanako sa pagpangaon uban kaniya ug sa iyang asawa. Siya mibating ang iyang asawa maoy biktima sa sayop nga impormasyon ug sayop nga mga ideya bahin sa mga Saksi ni Jehova. Husto siya. Siya nahatagan ug sayop nga impormasyon. Kami may masadyaong gabii, ug ang iyang asawa nangutanag daghang pangutana bahin kanamo ug sa among buluhaton, nga iyang gipatubag kanamo nga detalyado. Sa sunod adlaw siya mitelepono ug miingon nga ang iyang asawa nakaangay pag-ayo sa paghimamat sa akong asawa ug kanako ug naghunahuna nga kami buotan kaayong mga tawo.

“Ako nagpadayon sa pagduaw nga regular kang G. Dominguez, ug siya nagpadayag ug dulot nga interes sa Bibliya. Siya miingon kanako: ‘Dili ako magpanuko sa pagdasig kanimo sa pagkontak sa mga tsirman sa programa sa tanang Rotary Club sa dapit sa Greater San Francisco Bay ug pagtanyag nga ihatag sa ilang klab ang pakigpulong nga susama sa imong gihatag sa among klab. Makagamit ka sa akong ngalan ingong reperensiya, ug sa dihang ako kontakon, ako malipay sa paghatag kanimo sa kinalabwang rekomendasyon nga madapit ingong usa ka dinapit nga mamumulong.’

“Ang mga Rotary club maoy internasyonal. Posible kaha nga ang ubang mga klab sa Tinipong Bansa ug sa tibuok kalibotan mahinangop sa mga pakigpulong sa mga Saksi ni Jehova?”

[Footnote]

[Hulagway sa panid 18]

Si G. Renan Dominguez, sa wala, ug Igsoong Ernest Garrett