Mga Batan-on Nangutana . . .

Alternatibong “Rock”—Alang ba Kini Kanako?

“Uyon ako sa mga awit bahin sa lainlaing mga suliran ug kasinatian nga masagubang namong mga batan-on.”​—15-anyos nga George.a

“Kombinasyon kini sa pop ug heavy metal.”​—19-anyos nga Dan.

“Bag-o kini. Lahi kini. Dili kini inila, dinaghang-plaka nga musika.”​—17-anyos nga Maria.

ALTERNATIBONG rock. Daghang batan-on malipay sa pagpaminaw niana. Ang pipila ka hamtong samokan niana. Ug kadaghanang ginikanan tingali adunay diyutay o walay ideya kon unsa gayod kana.

Tinuod man, dili sayon ang pagsaysay sa tukma kon unsa gayod ang alternatibong rock. Sa sinugdan, mao kadto ang musika sa mga batan-on nga buot ug butang nga lahi, usa ka alternatibo sa kasagarang popular nga musika nga madunggan sa radyo. Ang pipila nag-ingon nga nagsugod kining tanan sa dihang ang lokal nga mga estasyonan sa radyo sa kolehiyo mihatag ug oras sa pagsibya ngadto sa di-kaayo iladong mga banda​—mga grupong musikal nga nanghambog sa ilang kaugalingon sa pagpasibo sa ilang musika aron makasapi sa komersiyal nga industriya sa musika. Ang bag-ong grupo sa mga musikero nagpahilayo sa pangunang mga kompaniya sa rekording ug sa mga teknik sa dinaghang pagpamaligya, sama sa mga musika sa video. Usab, misulat silag mga ulohan nga panagsa rang gikanta sa nangunang 40 ka awit.

Dili sama sa heavy metal o musikang rap, ang alternatibong rock dili kanunay sayong ilhon o maklasipikar. Bisan ang mga eksperto sa industriya sa musika wala magkauyon kon unsa gayod ang alternatibong rock. Tungod kana kay, ingon nga masabtan sa ngalan niini, nagkobre kini sa daghang ulohan, pamuot, ug mga pagbati. Usa ka batan-ong lalaki miingon: “Lisod kaayo ang pag-ila niini. Nagkobre kini sa daghang ulohan sa musika niining panahona.” Laing batan-ong lalaki nangahas niining pahayaga: “Dili kini kanunayng kusog o hinay, paspas o inanay, madasigon o makaluya.” Usa ka batan-on miadmitir pa gani: “Dili ako segurado kon ako makaingong nakaangay ko sa alternatibong rock sanglit wala ako makatino kon unsa kana.”

Bisan pa niana, ang pagkailado sa alternatibong rock miuswag ngadto sa punto nga daghan sa mas iladong mga mag-aawit niini giila na karong bahin sa urog sa musika. Usab, ang mga ginikanan daw dili ra kaayo supak niana kay sa heavy metal o uban pang saba kaayong mga porma sa rock. Tinuod, ang pipila ka ginikanan daw nasayod man kon unsang grupoha o mga ulohan sa album ang gitawag ug alternatibo. Apan, adunay panginahanglan nga mag-amping ka gayod kon maylabot na niining musikaha.

Unsay Makapadani?

Matikdi, pananglitan, kon nganong daghan kaayong batan-on ang nadani niining musikaha. Alang sa daghan kini mao lamay pagsagop sa samang panglantaw sa mga higala sa usa. Nagtagana usab kinig sukaranan alang sa panaghisgot o alang sa mga kalihokan, sama sa pagbayloanayg mga tape ug mga CD.

Alang sa kadaghanang batan-on, hinunoa, ang tingog niini ug ang mensahe sa alternatibong rock maoy nakapahimo niining madanihon kaayo. Sa partikular, nakaplagan sa daghang batan-on nga mobati sila sa mga kasinatian ug mga pagbati sa mga magsusulat sa awit. Ang panghapin nga mga artikulo sa magasing Time niining ulohana misaysay: “Samtang ang mga awit nga pop sa kasagaran maoy bahin sa gugma, ang mga liriko sa alternatibong rock sa kasagaran maoy bahin sa kusganong mga pagbati: kawalay-paglaom, kaulag, kalibog. . . . Kon ikaw tin-edyer o mga 20 anyos, kalagmitan nga ang imong pamilya nagdiborsiyo na. Ang alternatibong musika nahimong emosyonal nga panghupay, nga mopakigsulting direkta sa wala-mahusay nga mga isyu sa pag-abandonar ug pagpihigpihig.” Busa, ang 21-anyos nga disc jockey sa kolehiyo miingon: “Nakapadani kini kanako ug sa akong mga higala sanglit ang among henerasyon walay pagpakabana sa kalibotan. Walay bisan unsang nagpaabot kanamo kon matapos na kami sa pagtungha.”

Ang pipila ka batan-ong Kristohanon nakaangay usab sa alternatibong rock. Natural, ang kadaghanan naglikay man sa mas makapasakit, mas rebelyoso, mapintas, o imoral nga mga awit. Bisan pa niana, pipila niining batan-ong mga Kristohanon nakapatugbaw sa ilang mga panagana bahin sa maorag di-kaayo makadaot nga mga awit. Ang batan-ong si Dan mikomento: “Ang pipila sa mga mang-aawit nailhan ingong mga bayot ug mga tomboy o mga tiggamit ug droga, ug ang ilang mga liriko nagpabanaag sa ilang mga estilo sa kinabuhi.” Lain pang batan-on, nga ginganlag Jack, miingon: “Ang pipila ka grupo adunay ideya nga walay usa ang nagpakabana kanila, sa ilang mga suliran, o sa kaugmaon sa mga batan-on karong adlawa, busa ilang gipahayag kini sa ilang mga awit. Daghan ang walay pagdasig o paglaom.”

Pulong sa Pasidaan

Ang Bibliya nag-ingon kanato nga “ang tibuok kalibotan nahimutang diha sa gahom sa tuman-kadaotang usa,” si Satanas nga Yawa. (1 Juan 5:19) Nan, dili angayng matingala ka nga ang musika maoy usa sa mga paaging gigamit ni Satanas sa pagpahisalaag sa mga batan-on. Ang nangaging mga artikulo niining magasina ug ang kauban niining magasin, Ang Bantayanang Torre, sublisubli nga mipasundayag niining kamatuorana.b Ang mga pasidaan nga gikahatag na bahin sa heavy metal ug musikang rap ikapadapat usab kon bahin sa alternatibong rock. Ingon sa gipakita sa Bibliya, “ang utokang usa nagamatikod sa iyang mga lakang.”​—Proverbio 14:15.

Ingong usa ka pananglitan, dili maalamon ang pagsunod sa kinabag-an sa katawhan kon bahin na sa imong pagpili ug musika. Matikdi kining prinsipyoha sa Bibliya, nga mapadapat sa pagtugot sa uban nga mohimog mga desisyon alang kanimo: “Wala ba kamo mahibalo nga kon kamo padayong nagapresentar sa inyong kaugalingon kang bisan kinsa ingong mga ulipon sa pagsugot kaniya, kamo mga ulipon niya tungod kay kamo nagasugot kaniya?” (Roma 6:16) Alang sa usa ka Kristohanong batan-on, ang isyu dili kay kon unsay dalawaton taliwala sa mga barkada sa usa apan kon unsay “dalawaton sa Ginoo.” (Efeso 5:10) Gawas pa, unsang matanga sa mga batan-on ang nadani sa alternatibong rock? Mga batan-on ba nga daw malipayon, timbang, ug interesado sa espirituwal nga mga butang? O kini ba daw nakabatog mamiminaw ilabina taliwala sa mga batan-ong walay katagbawan, di-malipayon, o kaha masuk-anon?

Tinuod, ang pipila ka batan-on nga adunay malipayon, optimistikong personalidad mahimong madani gihapon sa alternatibong rock. Apan tagda kini: Ang mga Kristohanon, batan-on ug tigulang, adunay usa ka masanag nga kaugmaon nga naghulat kanila. (2 Pedro 3:13) Ang apostol Pablo nagpahinumdom kanato sa pagkasegurado sa katumanan sa mga saad sa Diyos, nga nag-ingon: “Imposible sa Diyos nga mamakak.” (Hebreohanon 6:18) Busa, unsa may kaayohan nga makuha sa pagladlad sa imong kaugalingon sa makapaluya, negatibong panglantaw sa umaabot nga gipahayag sa pipila ka awit sa alternatibong rock? Ang pagpasuhop ba sa musika nga nagpahayag ug kahadlok, kahiubos, ug kawalay-paglaom magpaluya sa imong pagtuo? Dugang pa, unsa man kahay epekto sa mapinadayonong kagana sa maong musika sa imong emosyonal nga panglantaw?

Magmapilion

Wala kini magpasabot nga ang tanang musika nga gitawag ug “alternatibo” makadaot o mangil-ad. Apan ingnon ta nga nasayran nimong may usang misulay sa paghilo kanimo. Bisan tuod dili ka mohunong sa pagkaon, tino gayod nga susihon nimo pag-ayo ang imong pagkaon, dili ba? Ang pagkasayod nga si Satanas naningkamot sa paghilo sa imong panglantaw ug tinamdan sa susama makapahimo nimong magmabinantayon maylabot sa musika nga imong pilion. Sama sa giingon sa Bibliya, “ang igdulungog mismo magasulay sa mga pulong, sama sa dila nga magatilaw sa dihang magakaon.” (Job 34:3) Inay binutang magsunodsunod sa panon, susiha ang musika nga imong naangayan.

Unsaon nimo paghimo kana? Ang kahon nga nag-ulohan ug “Giya sa Pagpilig Musika” adunay pipila ka makatabang nga sugyot nga mahimo nimong sulayan. Usab, sulayi sa pagpangutana ang imong Kristohanong mga ginikanan kon unsay ilang panghunahuna sa imong musika. (Proverbio 4:1) Makurat ka tingali sa ilang mga tubag! Siyempre, mas tigulang ang imong mga ginikanan kay kanimo. Masabot, dili managsama ang inyong panimpla sa musika. Apan kon wala sila makaangay sa imong musika ngadto sa punto nga mabati nila kanang mangil-ad, makapadaot, o salawayon, imo ba lamang ibalewala kon unsay ilang isulti? Ang Bibliya nagaingon: “Ang maalamong tawo maminaw ug modawat ug dugang instruksiyon.”​—Proverbio 1:5.

Tagda kon sa unsang paagi ang musika makaapektar kanimo. Makapahimo ba kini kanimong suko, rebelyoso, o masulub-on? Kon mao, kini maoy mga ilhanan sa pasidaan nga dili nimo angayng ibalewala! Nganong dili mangitag musika nga makaparelaks o makapahupay kanimo o makapasaya kanimo?

Ang kiling sa musika kanunayng mag-usab-usab. Sa di-madugay, ang pipila ka estilo sa musika mahimong kagubtan na usab. Apan ayaw padala sa bul-og niining pabag-o-bag-ong urog. Magmasinaboton ug magmapilion kon bahin na sa imong musika. Tinoa nga kon unsay imong ginapaminawan maoy makapaayo ug makapalig-on. (Filipos 4:8) Ug niana ang musika mahimo nang bililhon ug makapahimuot nga bahin sa imong kinabuhi!

[Mga footnote]

[Blurb sa panid 22]

“Samtang ang mga awit nga pop sa kasagaran maoy bahin sa gugma, ang mga liriko sa alternatibong rock sa kasagaran maoy bahin sa kusganong mga pagbati: kawalay-paglaom, kaulag, kalibog.”—Magasing Time

[Kahon sa panid 23]

Giya sa Pagpilig Musika

◆ Susiha ang paagi sa pag-empake sa album. Sa kasagaran daghan ang ibutyag niini kanimo maylabot sa musika ug sa mga musikero mismo. Likayi ang mga album nga may hapin nga nagpasiugda ug kapintasan, demonyohanong mga simbolo, ngil-ad nga pamesti ug pamostura, o kahubo.

◆ Matikdi ang mensahe sa mga liriko. Magpaila kini sa mga hunahuna ug estilo sa kinabuhi sa mga musikero. Unsang mga ideyaha ang buot nilang imong dawaton?

◆ Ang kinatibuk-ang tono sa musika magpaila sa kinaiya ug mga pagbati nga buot sa musikero nga imong batonan​—kahiubos, kalipay, pagsukol, pagkapukaw sa sekso, kamingaw, o kawalay-paglaom.

◆ Konsideraha ang kinatibuk-ang mamiminaw nga nadani sa grupo sa musika. Buot ka bang maila uban nianang grupoha sa katawhan ug sa ilang mga tinamdan?

[Hulagway sa panid 23]

Daghang batan-on ang mobati sa mga liriko sa mga awit karong mga adlawa