Gikan sa Among mga Magbabasa
Panaghigala Ako 16 anyos, ug buot nakong pasalamatan kamo alang sa artikulo mahitungod kang Tiya Louie, nga nag-ulohang “Ang Akong Minahal nga Higala.” (Pebrero 22, 1996) Nadani ako sa letrato ug gibasa dayon ang artikulo. Ako mibatig diyutayng kaguol tungod kay kadaghanan sa akong mga higala misangpot nga dili diay mga higala. Ang artikulo nagdasig gayod kanako sa pagpakighigala sa mga tawong mas gulang kay kanako.
L. N., Italya
Mga Dula sa Tunghaan Salamat sa artikulong “Mga Batan-on Nangutana . . . Mga Dula Uban sa Tem—Maayo ba Kini Alang Kanako?” (Pebrero 22, 1996) Morag kadto gisulat nga alang gayod kanako. Nakapaamgo kadto kanako nga hangtod karon mahimong ako nagsimbag mga atleta. Ang artikulo nagtabang usab kanako sa pagpabili nga “ang lawasnong pagbansay mapuslanon ug diyutay.”—1 Timoteo 4:8.
Y. T., Hapon
Mga Kobra Naghunahuna ako niadto nga ang mga kobra daotan kaayong mga reptil nga kinahanglang puohon. Apan human nako mabasa ang artikulong “Buot ba Nimong Mahimamat ang Kobra?” (Marso 22, 1996), ako karon dunay laing panghunahuna kanila. Salamat sa pagpahigawas sa mga tawong sama kanako gikan sa sayop nga mga hunahuna bahin niining makaiikag nga mga linalang.
P. E., Nigeria
Bisan pag ako gipadako sa usa ka banika diin adunay daghang halas, ako wala kaayoy nasayran bahin kanila. Ang pagbasa bahin sa pagkamabinantayon sa kobra sa paglikay sa mga pagharong nakatabang kanako sa pagbaton ug mas maayong pagsabot sa mga pulong ni Jesus sa Mateo 10:16: “Magmabinantayon kamo sama sa mga bitin.”
J. F. S., Brazil
Paghimog-Mini Salamat sa seryeng “Paghimog-Mini—Usa ka Tibuok-Kalibotang Hampak.” (Marso 22, 1996) Nagtrabaho ako sa usa ka bangko ug bag-o pang nakatapos sa usa ka seminar bahin sa pagsanta sa panglimbong. Ang impormasyong inyong gihatag mao ang labing bag-o. Salamat alang sa tanan ninyong kasaligan ug matulon-anong mga artikulo.
B. P., Tinipong Bansa
Sanglit ako nagtrabaho nga usa ka kahera sa usa ka bangko, gipabilhan ko ang mga artikulo. Lahi sa pipila ka magasin nga nagpatik ug dili-tinuod nga impormasyon aron mamugna ang kaukyab, inyong gipatik ang timbang kaayong panglantaw. Ang akong bangko naghatag sa mosunod nga tambag ngadto sa mga tindero: ‘Magtago ug kopya sa matag papel de bangko. Kon nagduhaduha, itandi ang gikatahapang papel de bangko (papel, imprenta, ug marka kon mahayagan) sa tinuod nga kuwarta.’
L. G., Pransiya
Panimbang Salamat sa artikulong “Ang Gasa sa Diyos nga Panimbang.” (Marso 22, 1996) Tulo ka tuig kanhi nakaagom akog vertigo sulod sa walo ka semana. Sa sinugdan abi nako nga ako lang ang nakaagom sa maong sakit, sanglit wala gayod ako makadungog niini sa nangagi. Ang inyong artikulo naghupay kanako, nga nagpakita nga ang uban nakasinati sa maong suliran ug nakabuntog niini.
D. P., Jamaica
Mga Langaw Salamat sa labing makapaikag nga artikulong “Kadtong Makalagot nga mga Langaw—Mas Mapuslanon ba Kay sa Imong Gihunahuna?” (Marso 22, 1996) Sa miaging ting-init ako migugol ug panahon sa pagdukiduki bahin sa mga langaw, apan wala ako makakaplag ug makapatagbawng impormasyon. Sa akong hunahuna sila samokan ug hugaw, sumala sa giingon sa artikulo. Apan karon nasayod ako nga sila may ginabuhat nga mapuslanon—kay kon wala pa ang atong Maglalalang wala unta magbuhat kanila. Gipasalamatan ko gayod ang mga artikulong inyong gipatik.
T. G., Italya
Bag-o pa nakong nahuman pagbasa ang artikulo bahin sa mga langaw, ug kinahanglang mosulat ako. Sa makadaghan gisultihan nako ang mga tawo nga siniaw nga buot nakong masayran kon unsay diha sa hunahuna ni Jehova sa iyang gilalang kining samokang linalang. Karon nahibalo na ako nga ang langaw wala ibutang sa yuta aron lamang pagsamok kanato!
P. P., Tinipong Bansa