Pagkinabuhi nga Dunay “Cystic Fibrosis”

SUMALA SA GIASOY NI JIMMY GARATZIOTIS

Sa Hulyo 25, 1998, gidali ako sa ospital nga nag-antos sa hilabihang kasakit sa akong dughan. Maayo ra ang akong kasingkasing, apan ang akong baga naimpeksiyon pag-ayo nga naglisod kaayo ko sa pagginhawa. Ako 25 anyos pa lamang, ug ang akong kinabuhi nameligro.

DUHA ka adlaw human sa akong pagkatawo, giingnan sa mga doktor ang akong mga ginikanan nga ako may grabe nga jaundice, o pagpangdalag sa mata ug panit. Matod nila kon dili ako magpaabono ug dugo, ako mamatay o kaha mahiagom sa grabeng kadaot sa utok. Nabuhi ko nga wala abonohi ug dugo—ug wala madaot ang utok.

Dihay daghang makalibog nga mga suliran sa panglawas ug mga pagsugmat sa pulmonya sa unang duha ka tuig sa akong kinabuhi. Usa ka doktor sa kataposan nagdayagnos sa akong sakit ingong cystic fibrosis (CF). Niadtong panahona, ang mga tawo nga nasakit niini nabuhi sa aberids nga pito ka tuig. Apan tungod sa kauswagan sa medisina, mas daghang bata nga dunay CF ang nakaabot sa pagkahamtong.

Unsa ang CF?

Ang CF maoy dili-maayo nga napanunod nga abnormalidad. Kini nagpahinabo ug magkagrabeng mga suliran sa respiratoryo, ug kasagaran ang mga pasyenteng dunay CF malisdan pag-ayo sa paghilis sa ilang pagkaon.

Duolan sa 1 sa 25 ka tawo ang tigpasa sa depektosong gene sa CF. Sa kadaghanang kaso ang mga tigpasa niining sakita wala gani mahibalo nga duna sila nianang maong gene, sanglit wala silay bisan unsang mga simtomas sa abnormalidad. Kon ang amahan ug inahan duna niini, sila dunay 1 sa 4 ka tsansa nga makapanganak ug bata nga dunay CF.

Ang akoa maoy usa sa talagsaong mga kaso diin ang CF nadayagnos tungod sa hubag sa ilong. Tungod niini, ang mga doktor natukmod sa pag-eksamin sa gidaghanon sa asin diha sa akong singot, nga maoy labing kasagaran nga pagsusi aron madayagnos ang CF. Kasagaran ang presensiya sa asin diha sa panit mamatikdan una sa mga ginikanan o mga apohan nga makamatikod nga paratparat ang ilang mga ngabil human mohalok sa bata.

Malisdan ako pagginhawa gumikan sa pagtubo sa hubag sa ilong, busa ginahimo ang pagdisdis sa akong mga sinus halos kada tuig aron makuha ang hubag. Hasol kaayo ang maong mga operasyon, ug masakit ang pagpaayo. Peligroso usab kini tungod sa pagdugo. Apan kadaghan na ako maoperahi, ug ang tanan gihimo nga wala mogamit ug dugo. Pagkamapasalamaton nako nga dili kinahanglang mag-antos o mabalaka sa mga komplikasyon nga mahimong moresulta gumikan sa mga pag-abono ug dugo!

Pagsagubang sa Sakit

Bisan tuod ang akong sakit naglimite sa akong mahimo, gipaningkamotan nako nga mahimong aktibo kutob sa maarangan. Ang usa ka linaing adlaw sa akong kinabuhi mao ang Agosto 1, 1987, sa dihang ako nabawtismohan ingong simbolo sa akong pagpahinungod kang Jehova nga Diyos.

Inigbangon nako sa buntag, mohanggab ako ug solusyon sa ventolin nga sundan sa solusyon sa saline. Motabang kini sa pagpahumok sa mga plema sa akong baga ug mag-abli sa akong mga agianan sa hangin aron mas sayon ang akong pagginhawa. Ang pagtambal dangtag 15 minutos. Human niana mopailalom ako sa physiotherapy sulod sa 40 minutos hangtod sa usa ka oras aron mohumok ug moagos ang mga plema gikan sa akong baga. Dayon himoon ko na usab ang pagtambal pinaagi sa paghanggab, niining panahona sa usa ka antibiotiko nga mosukol sa impeksiyon. Ang tibuok pamaagi sublion sa hapon ug usab sa gabii.

Ang tulo ka sesyon sa pagtambal dangtag mga upat ka oras kada adlaw. Kasagaran mokaon ako human niana, sanglit mas sayon ang pagtambal kanako kon wala pa ko makakaon. Bisan pa sa maong makapupos-ug-panahon nga adlaw-adlawng rutina, nabatasan ko ang pagtambong sa mga tigom sa nagsultig-Grego nga kongregasyon sa mga Saksi ni Jehova sa London, Ontario, Canada. Sa mga gabii nga dunay tigom akong ioktaba ang akong terapiya hangtod sa alas 10:00 s.g. Alang kanako ang mga panalangin nga madawat gikan sa pagtambong sa mga tigom mas daghan pa kay sa mga sakripisyo nga nalangkit. Ang regular nga pagpakig-ambit sa ministeryo hinungdanon usab kanako.

Pagpaambit sa Akong Pagtuo

Ang mga yugto sa ospital naghatag kanako ug linaing mga kahigayonan sa pagpaambit sa akong Kristohanong pagtuo. Dihay panahon nga nakahigayon ako sa pagpakigsulti sa Gregong Ortodoksong pari, nga pasyente sa laing lawak. Mikomento siya nga ako matinahuron nga batan-on ug miingon nga sa iyang hunahuna ako maayong panig-ingnan alang sa mga batan-on sa Gregong komunidad. Wala siyay kalibotan nga ako nahibalo nga siya maoy nanguna sa pagsupak sa ministeryo sa mga Saksi ni Jehova taliwala sa nagsultig-Grego nga mga tawo.

Sa dihang ang mga bisita moduaw sa pari, awhagon usab niya sila sa pagpakigkita kanako. Namay-ongan sa iyang mga bisita ang mga membro sa pamilya ug mga higala nga mibisita kanako nga mao kadtong miduaw sa ilang balay diha sa ministeryo. Ang ubang mga bisita sa pari nagpabilin, apan ang uban mibalik sa katingala aron sa pagpangutana sa pari kon nganong giawhag niya sila sa pagpakigkita sa mga Saksi ni Jehova. Bisan human niya mahibaloi nga ako usa ka Saksi, nagpadayon ang among mga panaghisgot sa Bibliya. Among gihisgotan ang mga ulohan sama sa ngalang Jehova, Trinidad, ug pagkaneyutral sa politika sa mga Saksi ni Jehova sa Gresya. Samtang nag-estoryahay kami, akong namatikdan nga nagkaluya ang iyang pagsupak.

Ang pari midawat nga nahibalo sa kamatuoran bahin sa pipila ka ulohan sa Bibliya nga among gihisgotan apan miangkon nga wala niya itudlo ang kamatuoran bahin niining mga butanga sa kahadlok nga mawad-an sa iyang trabaho. Sa ulahi si Esther, ang akong manghod nga babaye, ug ako miduaw sa iyang balay, ug siya midawat ug literatura sa Bibliya. Napuypoy ang pagsupak sa among pagsangyaw diha sa teritoryo. Sa pagkatinuod, daghan nga nakadungog nga midawat ang pari sa kamatuoran misugod sa pagpamati. Apan, wala madugay ang pari giasayn sa laing dapit.

Ang laing dakong kaugmaran napadayag ingong resulta sa pagpaambit sa akong pagtuo panahon sa usa sa mga yugto sa akong pagkaospital. Nakigsulti ako sa usa ka batan-ong ginganlag Jeff, kinsa miduaw sa iyang lolo. Ang dugang kabildohay misangpot sa pagtuon sa Bibliya uban kaniya. Ngadtongadto, gusto ni Jeff nga motambong sa mga tigom sa kongregasyon. Bisan tuod kasagaran motambong ako sa kongregasyon sa London, kasamtangan mibiyahe ako ngadto sa haduol nga Stratford aron iuban siya sa mga tigom didto. Ang tumong mao nga siya maabagan sa usa ka Saksi nga nagpuyo duol sa iyang balay.

Ikasubo, si Jeff nadaog sa pagpit-os sa iyang pamilya ug wala mouswag sa espirituwal. Apan, samtang nagtambongan sa mga tigom sa Stratford, nakaila ko pag-usab si Deanne Stewart. Nagkahimamatay kami sa dihang miapil kami sa pagtukod sa usa ka Kingdom Hall. Kami nagkahigugmaay, ug naminyo sa Hunyo 1, 1996.

Nausab ang Akong Kahimtang

Ikasubo, tulo ka semana human kami maminyo, migrabe ang akong sakit. Mao kadtoy sinugdanan sa sunodsunod nga mga yugto sa pagkaospital nga misangko ngadto sa emerhensiya nga gihubit sa sinugdanan. Sukad niadto gitaoran ako ug oksiheno 24 ka oras kada adlaw. Gisagubang nako ang mga hilanat, pagpaningot sa magabii, pleurisy, kakulang sa tulog gumikan sa pag-inubo sa gabii, ug panakit sa akong mga lutahan, bitiis, ug dughan. Usahay magsugpa usab ako, nga makahahadlok tungod kay kon dili kini mohunong, mahimo kining mosangpot sa kalit nga kamatayon.

Karon, uban sa akong minahal nga asawa sa akong kiliran ingong kauban ug magtatabang, nakig-ambit ako sa pagsangyaw ngadto sa mga doktor, mga physiotherapist, mga pasyente, ug ubang kawani sa mga ospital nga nalangkit sa pag-atiman sa panglawas maingon man sa balay kon sila moduaw. Bisan tuod lisod ang akong sakit, among giisip kining mga okasyona ingong mga kahigayonan sa pagdayeg sa ngalan ni Jehova.

Kon Unsa ang Nagpalig-on Kanako Karon

Tungod sa nausab nakong mga kahimtang, si Deanne ug ako dunay linain nga telephone hookup nga nakapaarang kanamo sa pagpamati ug pagpakig-ambit sa mga tigom sa kongregasyon. Kining mahigugmaong tagana nakapadasig pag-ayo kanamo ug nagpabati kanamo nga kami aktibo gihapon nga bahin sa kongregasyon, bisan tuod dili na kami kanunayng presente sa pisikal.

Dugang pa, ang among ministeryo karon nag-apil sa pagtawag sa mga tawo pinaagi sa telepono ug pagpaambit sa among pinasukad-sa-Bibliya nga paglaom. Nakasugod kami ug mga panagtuon sa Bibliya, nga among ginadumala pinaagi sa telepono. Ang pagpakigsulti sa mga dili-kaila bahin kang Jehova ug sa iyang kahibulongang mga tagana alang sa matinumanong katawhan sa bag-ong kalibotan sa pagkamatarong naghatag kanamo ug dakong kalipay.

Ang pagpaluyo sa akong amahan ug inahan maoy makapalig-on nga pagdasig ug paghupay alang kanako. Ako ilabinang may utang kabubut-on kang Jehova tungod sa pagpanalangin kanako kang Deanne, nga midawat kanako uban sa akong sakit ug karon dunay dakong bahin sa pagtabang kanako nga molahutay.

Samtang nagkaduol na ako sa kataposang mga hugna sa akong balatian, ang pagpamalandong sa akong paglaom sa umaabot nakatabang kanako nga dili molunga. Ang pagbasa sa Bibliya kada adlaw uban kang Deanne nakahupay kanamo. Ako nahibalo nga sa haduol nga umaabot, ako mahimsog na, nga dili na magkinahanglan ug adlaw-adlaw nga terapiya aron lamang makaginhawa. Sa gisaad nga Paraiso, sa dihang makadawat ako ug himsog nga mga baga, mahanduraw nako ang akong kaugalingon nga nagdagandagan sa halapad nga umahan. Mao ra kanay akong gusto—pagdagandagan lamang sa halapad nga umahan sa makadiyot aron akong matestingan ang akong mga baga.

Ang paghanduraw sa mga panalangin sa gisaad sa Diyos nga bag-ong kalibotan nakatabang kanako sa pagsagubang sa matag adlaw. Ang Proverbio 24:10 nag-ingon: “Ikaw ba nawad-an ug kadasig sa adlaw sa kasakit? Ang imong kusog diyutay ra.” Inay kay mobati nga ang akong kusog diyutay ra, akong gibati nga si Jehova naghatag kanako ug gahom nga labaw sa kasarangan. (2 Corinto 4:7) Nakatabang kini kanako sa pagsangyaw bahin sa iyang ngalan ug mga katuyoan maingon man sa pag-atubang sa bisan unsa nga iyang itugot—paglabang-buhi man sa kataposan niining sistema sa mga butang sa Armagedon o kamatayon karon ug pagkabanhaw sa ulahi ngadto sa iyang bag-ong kalibotan.—1 Juan 2:17; Pinadayag 16:14-16; 21:3, 4.

[Mga hulagway sa panid 13]

Uban sa akong asawa, si Deanne, kinsa nagpaluyo pag-ayo kanako