UNSAY PAGLAOM SA MGA BUTA?
GISULAT ni John Milton ang iyang hataas binalak nga sugilanong Paradise Lost ug Paradise Regained bisan pa ug siya buta. Ang pagkabuta ug pagkabungol wala makapugong kang Helen Keller sa iyang mga paningkamot sa pagtudlo ug pagtabang niadtong may mga depekto sa lawas. Oo, nabuntog sa daghang tawong buta ang mga kalisod nga gipahinabo sa pagkabuta. Apan pagkaanindot unta kon ang tanan makapahimulos ug maayong panan-aw! Ikaw tingali ilabinang mouyon kon may usa ka nga minahal o usa ka higala nga buta o nadaot ang panan-aw.
Matuod, diha sa pipila ka nasod ang mga programa sa rehabilitasyon nagatudlo sa mga tawong daot ug panan-aw sa mga katakos sa adlaw-adlaw nga pagkinabuhi. Ang braille o sistema sa pagbasa sa mga buta ug ang mga iro nga gibansay sa paggiya sa tawong buta nagatabang sa mga buta sa pag-atiman sa daghan nilang mga panginahanglan. Bisan pa, gilantaw sa daghang tawo ang pagkabuta ingong labing gikahadlokan nga depekto. Usa ka magsusulat miingon: “Ang pagkabuta maoy pagkawala sa kahigayonan alang sa labing makahuloganong bahin sa atong salabtonong kalibotan.” Sa samang panahon, daghang tawong buta nagasalig pag-ayo sa uban.
Ikaw tingali mahibulong, nganong kaylap kaayo ang pagkabuta? Aw, nakadungog ka na ba bahin sa trachoma? Kini maoy hinungdan sa duolan sa nuybe milyones nga kaso sa pagkabuta. Ang The New Encyclopædia Britannica nag-ingon bahin niana: “Ang maong sakit mananakod ug kusog nga modaghan diha sa naghuot nga lugar nga mahugaw ug mga palibot. Ang kakulag tubig nga panghugas, ug ang daghang langaw nga nanugok diha sa kinalibang sa tawo, makadugang sa pagpakaylap sa sakit. Sa pila ka paagi ang trachoma maoy usa ka sosyal nga problema inay kay medikal nga problema; kon mapauswag ang mga sukdanan sa pagkinabuhi, makunhoran ang sobrang pagdasok sa mga tawo, masanta ang mga langaw, ug mapaneguro ang igong suplay sa tubig, ang mga kaso sa trachoma kusog nga mous-os.” Ang laing milyon o kapin pa nag-antos sa onchocerciasis. O unsay ikasulti bahin sa xerophthalmia? Bisag lisod ang ngalan, ang kamatuoran mao nga kini maoy kasagarang hinungdan sa pagkabuta. Ang diyabetes, dipterya,
tipdas, scarlet fever, ug mga sakit nga napasa sa sekso mahimong hinungdan usab sa pagkabuta.
Samtang kita nagakatigulang, mohanap ang atong panan-aw ingong resulta niining maong mga sakit sama sa macular degeneration ug glokoma, ug dili usab nato kalimtan ang mga katarata. Ang The New Encyclopædia Britannica nag-ingon: “Ang mga katarata maoy hinungdan gihapon sa daghang pagkabuta sa daghang kanasoran sa kalibotan, ug kini labaw pang makapasubo sanglit dali ra kaayo kining maayo pinaagig operasyon.”
Bisan pa sa bag-ong mga nakaplagan sa siyensiya labot sa pagtuon sa mata ug sa mga sakit niini, ang pagkawala sa pagkabuta daw halayo pa kaayo. Ang mao gihapong ensiklopedia nag-ingon: “Ang kauswagan sa pagsumpo ug ang pagtambal sa pagkabuta pinaagig medisina ug operasyon makahatag kaayohan lamang ngadto sa populasyon nga makabaton ug medikal nga pag-atiman. Hangtod nga mapauswag ang mga sukdanan sa nutrisyon ug sa kahinlo diha sa kinadak-ang bahin sa populasyon sa kalibotan, ang mapugngang pagkabuta magpadayon sa pagdaghan.”
Samtang ang mga antibiyotiko ug operasyon adunay ilang dapit sa pagpakig-away batok sa pagkabuta, ang paglaom sa dumalayong pagkaayo nalangkit sa usa ka butang nga nahitabo duolan sa duha ka libo ka tuig kanhi.
Pag-ayo sa mga Buta sa mga Adlaw ni Jesus
Handurawa ang usa ka tawo sa iyang sayo nga pangedarong 30 anyos nga naglakaw sa daplin sa abogon nga dalan. Kay nakadungog nga siya moagi, duha ka tawong buta diha sa daplin sa dalan naninggit: “Kaluy-i kami!” Bisag gisultihan sila sa panon sa katawhan sa paghilom, ang mga tawong buta naninggit sa makusog: “Kaluy-i kami!” Ang tawo malulotong nangutana: “Unsay buot ninyo nga akong buhaton alang kaninyo?” Sa maikagon sila mitubag: “Pabukha ang among mga mata.” Karon palandonga: Gihikap sa tawo ang ilang mga mata, ug dihadiha sila nakakita!—Mateo 20:29-34.
Pagkadako sa kalipay niining mga tawo nga buta kanhi! Bisan pa, ang pagkabuta kaylap kaayo. Kini usa lamang ka hitabo. Nganong angay nimong hatagan kini ug pagtagad? Tungod kay si Jesus nga taga-Nasaret mao ang malulotong nagbalik sa ilang panan-aw. Sa pagkamatuod, gawas pa sa pagkahimong ‘dinihogan sa pagmantala sa maayong balita ngadto sa mga kabos,’ si Jesus ‘gipadala sa pagbalik sa panan-aw sa mga buta.’—Lucas 4:18.
Ang mga tawo nahibulong sa maong milagrosong mga pag-ayo nga gihimo pinaagi sa gamhanang balaang espiritu sa Diyos. Atong mabasa: “Ang panon sa katawhan mibati ug kahibulong sa nakita nila ang mga amang nga nagpanulti ug ang mga bakol nga nagpanglakaw ug ang mga buta nga nagpakakita, ug ilang gihimaya ang Diyos sa Israel.” (Mateo 15:31) Walay bisan unsang bayad o pagpasiatab sa iyang mga katakos o pagpaningkamot aron siya himayaon niini nga mga pagpang-ayo, gipasiugda ni Jesus ang gugma ug kaluoy ni Jehova nga Diyos. Gawas pa niana, si Jesus may kaluoy usab sa mga buta sa espirituwal ug mga tawong walay-mahimo kinsa “pinanitan ug binalibag samag mga karnero nga walay pastol.”—Mateo 9:36.
Bisag makapaikag ang maong kasaysayan, ikaw tingali mahibulong, Komosta karong adlawa? Sanglit karong adlawa walay usa nga nagapang-ayo sa mga tawo sama sa gihimo ni Jesus, ang mao bang pagpang-ayo adunay kahulogan alang kanato? Aduna bay paglaom ang mga buta? Palihog basaha ang mosunod nga artikulo.
[Blurb sa panid 4]
“Hangtod nga mapauswag ang mga sukdanan sa nutrisyon ug sa kahinlo diha sa kinadak-ang bahin sa populasyon sa kalibotan, ang mapugngang pagkabuta magpadayon sa pagdaghan.”—The New Encyclopædia Britannica