Kon Unsaon Pag-organisar ang Usa ka Teokratikanhong Librarya
SI Sherezade, usa ka utokan nga batang babaye nga Katsila, kuwatro anyos ang pangedaron sa dihang ang iyang magtutudlo misugo sa klase nga ilang koloran ang mga hulagway ni “Santa Claus.” Dihadiha, si Sherezade mihangyo nga dili moapil. Iyang gisaysay nga dili makatugot ang iyang tanlag sa paghimo niana.
Kay natingala tungod niining pagsupak, giingnan siya sa magtutudlo nga sama lang kana sa pagkolor ug hulagway sa usa ka monyeka ug walay daotan niana. Si Sherezade nagtubag: “Kon monyeka lang diay kini, modrowing na lang kog akong monyeka kon mosugot mo.”
Sa laing higayon ang klase giingnan sa pagkolor ug nasodnong bandera. Sa makausa pa si Sherezade mihangyo nga mohimo na lang siya ug laing butang. Sa pagpatin-aw, iyang gisuginlan ang magtutudlo sa estorya ni Shadrach, Meshach, ug Abednego.—Daniel 3:1-28.
Wala madugay human niadto ang magtutudlo mitelepeno sa inahan ni Sherezade sa pagpahayag sa iyang kahingangha. “Ang imong anak babaye sa daghang higayon nakig-estorya kanako bahin sa iyang tanlag,” matud niya. “Tiaw mo na? Usa ka batang babaye sa iyang pangedaron mosaysay kanako kon nganong gihasol siya sa iyang tanlag! Aw, wala ko mouyon sa imong ginatudlo kaniya, apan pasaligan tika nga nagmalamposon ka. Ug buot kong ipahibalo kanimo nga gidayeg ug gitahod nako ang imong anak babaye.”
Sa unsang paagi ang usa ka kuwatro-anyos nga batang babaye makabaton ug nabansay-sa-Bibliya nga tanlag? Ang iyang inahan, si Marina, nagpahayag nga si Sherezade dunay kaugalingong teokratikanhong librarya sa iyang lawak-katulganan. Ang librarya naglakip sa iyang personal nga mga kopya sa Ang Bantayanang Torre, nga iyang gibadlisan, iyang literatura nga gamiton sa pagsangyaw, ug tanang publikasyon sa Watchtower Society nga giluwatan sukad sa iyang pagkatawo. Ang iyang paborito sa iyang librarya mao ang audiotape sa Akong Basahon sa mga Estorya sa Bibliya, nga iyang gipaminawan matag gabii samtang ginasundan kini sa iyang libro. Kining maong Biblikanhong mga asoy ang nakapaarang kaniya sa paghimog mga desisyon nga gihisgotan sa ibabaw.
Ang maayong pagkaorganisar nga librarya makatabang ba kanimo ug sa imong mga anak? Nganong kinahanglanon ang usa ka librarya sa balay?
“Dili Kaluho ang Usa ka Librarya”
“Dili kaluho ang usa ka librarya, apan usa sa mga kinahanglanon sa kinabuhi,” pahayag ni Henry Ward Beecher. Sa walay duhaduha, halos kitang tanan dunay usa niining “mga kinahanglanon sa kinabuhi,” bisan tuod wala kita makaamgo niana. Nganong ingon man niana? Tungod kay bisan kon wala kitay laing nabatonan gawas sa Bibliya, nakapanag-iya kita ug usa ka butang nga mahimong tawgong librarya.
Ang Bibliya sa pagkatinuod usa ka teokratikanhong librarya nga walay kasama. Sa ikaupat nga siglo, gimugna ni Jerome ang Latin nga pamulong nga Bibliotheca Divina (Divine Library) sa paghubit sa kompletong koleksiyon sa dinasig nga mga basahon nga gitawag natong Bibliya. Si Jehova naghatag kanato niining balaang librarya aron tagan-an kita ug praktikal nga tabang, instruksiyon, ug giya. Usa kini ka butang nga dili gayod nato pakamenoson. Ang pagpanag-iya lamang sa entirong Bibliya nagkahulogan nga kita nakabaton ug labing mabug-osong librarya kay sa kadaghanan sa mga alagad sa Diyos sa miagi.
Niadtong panahon nga ang mabatonan lamang maoy mahalon nga mga manuskrito nga gikinamot pagsulat, dili daghan, kon aduna man ugaling, ing pribadong mga balay ang makapasigarbog usa ka kompletong Bibliya. Sa dihang si Pablo gustong magtuon sa Kasulatan niadtong kataposan niyang pagkabilanggo sa Roma, kinahanglan pa niyang hangyoon si Timoteo nga dad-an siyag pipila ka linukot gikan sa Asia Minor—malagmit mga bahin sa Hebreohanong Kasulatan. (2 Timoteo 4:13) Hinuon, ang mga sinagoga dunay koleksiyon sa mga linukot, ug si Jesu-Kristo ug si apostol Pablo migamit niining mga librarya sa ilang pagwali nga buluhaton. (Lucas 4:15-17; Buhat 17:1-3) Ikalipay, ang Kasulatan mas daling mabatonan karon kay niadtong unang siglo.
Salamat sa imbensiyon sa imprenta, karon halos tanang alagad sa Diyos—bisag unsay ilang pinulongan—makabaton ug tibuok Bibliya sa makataronganong bili. Kita usab dunay talagsaong kahigayonan sa pagdugang niining balaang “librarya.” Latas sa kapin sa usa ka siglo, ang “kasaligan ug mabuot nga ulipon” nahimong puliki sa pagtagana sa espirituwal nga pagkaon sa hustong panahon.—Mateo 24:45-47.
Apan malagmit dili kita makapahimulos sa bug-os niining bililhong impormasyon kon dili kita mag-organisar ug personal teokratikanhong librarya. Unsaon kini paghimo? Ang unang lakang, siyempre, mao ang pagbaton sa mga libro nga kinahanglanon sa librarya. Takos gayod kini sa paningkamot, sanglit dihadiha mahimo kitang makabaton ug tukmang impormasyon nga gikinahanglan nato sa pag-atubang sa mga suliran ug makakitag mga tubag sa mga pangutana bahin sa Bibliya.
Unsang mga Libro ang Gikinahanglan Nako?
Gusto ba nimog tubag kon unsaon pagsulbad sa suliran sa komunikasyon sa inyong kaminyoon o kon unsaon nimo pagtabang sa inyong mga anak aron makaingong dili sa mga droga? Unsaon nimo pagtabang sa usa ka higala nga nagaantos gumikan sa depresyon? Mapatin-aw ba nimo ang mga ebidensiya nga atong nabatonan nga ang Diyos naglungtad ug kon nganong iyang gitugotan ang pagkadaotan? Unsay gihawasan sa pula-ug-kolor nga mapintas nga mananap sa Pinadayag kapitulo 17?
Kini ug daghan pang ubang mga pangutana mahimong matubag kon ikaw adunay igong teokratikanhong librarya. Ang Watchtower Society nagpatik ug mga libro, mga brosyur, ug mga artikulo sa magasin nga naghisgot sa tanang Kasulatanhong ulohan. Dugang pa, kining maong literatura naghisgot sa mga butang labot sa pamilya, nagapalig-on sa atong pagtuo sa Diyos ug sa Bibliya, makatabang kanato sa pagpauswag sa atong mga kahanas sa pagwali, ug makatabang kanato sa pagsabot sa mga tagna sa Bibliya.
Kadaghanan sa mga publikasyon nga gipatik sa Sosyedad sulod sa milabayng 20 ka tuig mabatonan pa. Kon bag-o ka lang nakasulod sa kamatuoran, mas maayo nga ikaw magbaton sa tanang maong literatura nga mabatonan sa inyong pinulongan. Hayan ang hinapinang mga tomo sa milabayng katuigan sa Ang Bantayanang Torre mabatonan sa inyong pinulongan. Ang talagsaong mga reperensiya, sama sa Insight on the Scriptures ug Comprehensive Concordance, napatik usab sa lainlaing pinulongan. Hinuon, ang pagbaton niining mga libroha maoy una lamang nga lakang.
Organisaha ang Imong Librarya!
Ang pagkasayod nga duna kay libro sa usa ka dapit maoy usa ka butang, ang pagkaplag sa usa nga imong gikinahanglan maoy laing butang. Kon mogugol kitag daghang panahon sa pagpangita sa gikinahanglang reperensiya, malagmit mawad-an kitag interes sa ulohan. Sa laing bahin, kon duna kitay maayong pagkaorganisar nga mga libro, sa usa ka kombenyenteng dapit, mas makiling kita sa paghimog personal nga panukiduki.
Kon mahimo, makatabang nga ibutang ang kadaghanan sa teokratikanhong libro sa usa ka dapit. Mahimong makagama ug butanganan ug libro, ug subsob mas barato kini, kon dili kita makaarang sa pagpalit ug human-daan, ug dili kini makaokupar ug dakong luna. Ang sayon nga paggamit sa librarya hinungdanon usab. Ang mga libro nga gitipigan sa mga lawting kasagarang walay mahimo kondili maabogan ra.
Ang sunod nga lakang mao ang pag-organisar sa mga libro. Ang diyutay kaayong panahon nga gugolon sa pag-areglar sa mga libro sa lohikal nga pagkahan-ay magantihon.
Komosta na man kon kadaghanan sa membro sa imong pamilya dili mga Saksi ni Jehova? Bisan tuod dili ka makaorganisar ug usa ka librarya sumala sa imong gusto, sa imong kaugalingong kuwarto tingali duna kay butanganan ug libro nga naundan ug labing menos pipila ka Kasulatanhong mga publikasyon.
Ang Teokratikanhong Librarya Mahimong Makatabang sa Pagpalig-on sa Espirituwalidad
Sa dihang naareglar na ang atong mga libro, kinahanglan nato ang usa ka sistema sa pagtabang kanato sa pagpangita sa impormasyon. Ang atong mga memorya mahimong dili maayo, ug hayan dili kita sinati sa personal sa mga kaundan sa matag libro sa atong teokratikanhong librarya. Bisan pa niana, ang tanang impormasyon diha sa librarya daling mabatonan. Kon mahimo kining mabatonan sa atong pinulongan, ang Watch Tower Publications Index makapaarang kanato sa pagpangita sa espisipikong impormasyon sa halos bisan unsang ulohan sa hamubong panahon.
Si Julián, nga nakaalagad sa daghang tuig ingong espesyal nga payunir ug usa ka ansiano, nagpahayag nga ang Index maoy bililhon diha sa pagtudlo sa iyang kinamanghorang anak lalaki sa paghimog personal nga pagtuon. “Si Jairo, kinsa siyete anyos, mipauli sa balay gikan sa tunghaan usa niana ka adlaw ug nangutana kanako, ‘Daddy, unsay gisulti sa Sosyedad bahin sa mga dinosaur?’ Gitan-aw dayon namo ang Index ug gipangita ang pulong ‘dinosaurs.’ Halos dihadiha nakaplagan namo ang serye sa artikulo sa Pagmata! bahin sa ulohan. [Pebrero 8, 1990] Nianang maong adlawa, gisugdan kana pagbasa ni Jairo. Nasayod na siya nga ang among teokratikanhong librarya dunay mapuslanong impormasyon sa halos tanang ulohan. Sa personal, ako kombinsido nga sa dihang ang atong kabataan makakat-on sa paggamit sa husto sa usa ka teokratikanhong librarya, makatabang kini kanila sa pagtubo sa espirituwal. Makakat-on sila sa pagpangatarongan, ug dugang pa, ilang madiskobrehan nga ang personal nga pagtuon mahimong makalilipay.”
Si Fausto, ang amahan ni Sherezade nga gihisgotan sa sinugdanan, nagtuo nga mahimo nimong sugdan ug sayo ang pagbansay sa kabataan sa paggamit ug teokratikanhong librarya. “Gipakita na namo kang Sherezade, kinsa niining tungora sayes anyos na, kon unsaon paggamit sa Index,” saysay niya. “Sanglit interesado siya sa kalaoman sa yutan-ong Paraiso, gisugdan namo kini pinaagi sa pagpakita kaniya sa pulong ‘paradise’ diha sa Index ug dayon sa pagpangita sa mga artikulo sa Bantayanang Torre nga gihisgotan. Kasagaran amo lang ipakita kaniya ang mga hulagway. Bisan pa niana, pinaagi niini iyang nakat-onan nga ang Index maoy yawi sa pagpangitag impormasyon diha sa among librarya sa balay. Nasayod kami nga iyang nasabtan ang punto sa dihang sa iyang pagpauli gikan sa tunghaan usa niana ka adlaw dala ang pangutana bahin sa mga pagsaulog sa Easter. ‘Nganong dili nato susihon ang Index?’ sukna niya sa iyang inahan.”
Bisag unsay atong pangedaron, ang Bibliya nagadasig kanato sa ‘pagtino sa tanang butang; pagpangupot pag-ayo sa kon unsay maayo.’ (1 Tesalonica 5:21) Kini nagkinahanglan nga atong susihon ang ginaingon sa Kasulatan. (Buhat 17:11) Kon duna kitay maayong pagkaorganisar nga teokratikanhong librarya, ang maong panukiduki mahimong usa ka kalipay. Sa matag higayon nga malamposon natong gigamit ang atong librarya sa pagpangandam sa usa ka pakigpulong, sa pagpangitag praktikal nga tambag sa pagdumala sa usa ka suliran, o sa pagpangitag makaiikag nga impormasyon, kini magasilsil kanato sa praktikal nga bili sa atong librarya.
Ang mga ginikanan ni Sherezade tin-aw nga nagpahayag: “Sa usa ka Kristohanong panimalay, ang usa ka teokratikanhong librarya sa walay duhaduha dili kaluho!”
[Kahon sa panid 30]
SA UNSANG PAAGI NIMO MAHIMONG IHAN-AY ANG IMONG MGA LIBRO?
Walay estriktong lagda kon unsaon pag-areglar sa imong mga libro. Bisan pa, ang mosunod lohikal nga mga dibisyon nag-ilustrar sa usa ka paagi nga mahimo nimong ihan-ay ang imong mga libro sumala sa kaundan.
1. Mga librong naundan sa bersikulo-por-bersikulo nga pag-analisar sa pipila ka bahin sa Bibliya
(Mga pananglitan: Ang Labing Bantogang Tawo nga Nabuhi Sukad, Pinadayag—Hingpit nga Sangkoanan Niini Haduol Na!, “The Nations Shall Know that I Am Jehovah”—How?, “Ang Imong Kabubut-on Matuman sa Yuta”)
2. Mga libro bahin sa pamilyahanong kinabuhi
(Mga pananglitan: Paghimo sa Imong Pamilyahanong Kinabuhi nga Malipayon, Mga Pangutanang Gisukna sa mga Batan-on—Mga Tubag nga Mosaler, Akong Basahon sa mga Estorya sa Bibliya)
3. Mga Bibliya ug mga reperensiyang basahon
(Mga pananglitan: New World Translation of the Holy Scriptures—With References, ubang mga Bibliya, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, usa ka maayong diksiyonaryo)
4. Mga librong presenteng gigamit alang sa Pagtuon sa Libro sa Kongregasyon ug Tunghaan sa Teokratikanhong Ministeryo
5. Mga audiocassette ug mga video
6. Mga tinahing tomo sa Ang Bantayanang Torre ug Pagmata!
7. Kasaysayan sa mga Saksi ni Jehova
(Mga pananglitan: Yearbooks of Jehovah’s Witnesses, Mga Saksi ni Jehova—Mga Magmamantala sa Gingharian sa Diyos)
8. Mga libro ug mga brosyur nga sa regular gigamit nato sa atong ministeryo
(Mga pananglitan: Ikaw Mabuhing Walay Kataposan sa Paraiso sa Yuta, Nangatarongan Pinasukad sa Kasulatan, Life—How Did It Get Here? By Evolution or by Creation?, Pagpangita sa Katawhan sa Diyos, Nahiusa sa Pagsimba sa Bugtong Matuod nga Diyos)
[Hulagway sa panid 31]
Si Sherezade usa na ka maayong estudyante sa Bibliya
[Hulagway sa panid 31]
Bisan tuod bata pa, kining batang lalaki nagagamit sa teokratikanhong librarya