Mga Magmamantala sa Gingharian Nagtaho
“Sa Diyos ang Tanang Butang Posible”
ANG mga pulong sa ibabaw, nga makaplagan sa Mateo 19:26, napamatud-ang tinuod alang sa usa ka dalaga sa Venezuela. Human siya makakat-on sa pagsalig kang Jehova sa bug-os, nakaarang siya sa pagbuntog sa usa ka bug-at nga suliran. Siya miasoy:
“Ang akong lola maluloton ug mahigugmaon kaayo. Ikasubo, siya namatay sa dihang ako 16 anyos lamang. Ang iyang kamatayon nakapasubo pag-ayo kanako. Nahimo akong dili timbang sa pangisip, nga dili gani buot nga mogawas ngadto sa nataran. Nahimo akong halos bug-os nga nagpalain.
“Wala ako moeskuyla, ni may trabaho ako. Magpuyo ra ko sa akong lawak. Nag-inusara ug walay mga higala, ako nag-antos sa grabeng depresyon. Mibati akong wala gayoy pulos ug gustong mamatay ug taposon ang tanan. Nagsige kog pangutana sa akong kaugalingon, ‘Nganong nabuhi pa man ko?’
“Ang akong inahan nagdawatan sa mga magasing Bantayanang Torre ug Pagmata! gikan sa usa ka batan-ong Saksi nga ginganlag Gisela. Usa ka adlaw niana ang akong inahan nakakita kang Gisela samtang milabay siya sa among balay ug nangutana kaniya kon matabangan ba niya ako. Miuyon si Gisela nga sulayan, apan wala ko makigkita kaniya. Wala kini magpahunong kang Gisela. Gisulatan ko niya ug giingnan ako nga gusto niyang makighigala nako ug nga dunay usa nga labi pang hinungdanon kay kaniya nga gusto usab nga makighigala kanako. Kanang maong persona, siya miingon, mao si Jehova nga Diyos.
“Nakatandog kini kanako, ug gibalosan nako ang iyang sulat. Sulod sa tulo ka bulan nagsinulatay kami. Human lamang sa sigeng aghat ug awhag ni Gisela nga sa kataposan ako nakakaplag ug kaisog nga makigkita kaniya. Sa among unang panagkita, gitun-an ako ni Gisela sa Bibliya, ginamit ang librong Ikaw Mabuhing Walay Kataposan sa Paraiso sa Yuta. Human sa pagtuon, gidapit ko niya sa pagtambong sa usa ka tigom sa lokal nga Kingdom Hall. Nakalitan ko. Wala ako makagawas sa balay sulod sa upat ka tuig, ug ang hunahuna nga maglakaw sa karsada makalilisang.
“Si Gisela mapailobon kaayo kanako. Gipasaligan ko niya nga walay angayng kahadlokan ug nga iya kong ubanan ngadto sa tigom. Sa kataposan miuyon ako. Pag-abot namo sa Kingdom Hall, misugod ako sa pagpangurog ug pagpaningot. Dili ko makatimbaya ni bisan kinsa. Bisan pa niana, miuyon ako nga mopadayon sa pagtambong sa mga tigom, ug si Gisela kanunayng mohapit kanako kada semana.
“Aron tabangan ako nga mabuntog ang akong nerbiyos, dad-on ko ni Gisela sa mga tigom nga sayo kaayo. Magtindog kami diha sa pultahan ug timbayahon ang tanan samtang sila mangabot. Nianang paagiha moatubang lamang ako sa usa o duha ka tawo sa usa ka panahon, inay sa tibuok grupo sa samang higayon. Sa dihang gibati nakong dili na ako makaagwanta, gikutlo ni Gisela kanako ang Mateo 19:26: ‘Sa mga tawo kini imposible, apan sa Diyos ang tanang butang posible.’
“Bisan tuod dili sayon, ngadtongadto nakaarang ako sa pagtambong bisan sa mas dakong panagkatigom sa katawhan diha sa sirkitong asembliya. Pagkadakong pag-uswag kadto alang kanako! Sa Septiyembre 1995, nakabaton ako ug kaisog sa pagsulti sa mga ansiyano mahitungod sa pagpakig-ambit diha sa balay-balay nga ministeryo. Unom ka bulan sa ulahi, sa Abril 1996, akong gisimbolohan ang akong pahinungod ngadto kang Jehova pinaagi sa pagpabawtismo sa tubig.
“Sa dihang may nangutana kanako di pa dugay kon sa unsang paagi ako nakabaton ug kaisog sa pagbuhat niini, ako mitubag: ‘Ang akong tinguha nga pahimut-an si Jehova mas dako kay sa akong kahadlok.’ Bisan tuod duna gihapon akoy popanahon nga mga pagsugmat sa depresyon, ang akong kangaya misamot tungod sa akong pag-alagad ingong regular payunir. Sa paghinumdom, kinahanglang mouyon ako kang Gisela. Karon duna na akoy Higala nga interesado kanako ug kinsa ‘naghatag ug gahom kanako.’”—Filipos 4:13.
[Mga hulagway sa panid 8]
“Ang akong tinguha nga pahimut-an si Jehova mas dako kay sa akong kahadlok”