Pagtanyag sa Maayong Balita—Ngadto sa Tanan
1 Samtang si Jesu-Kristo misangyaw siya mipakitag dakong interes sa pag-abot sa daghang mga tawo kutob sa mahimo. (Mar. 6:34; Juan 4:7, 40, 41) Kita usab kinahanglang manlimbasog sa pag-abot sa daghang mga tawo kutob sa atong maarangan. Nameligro ang mga kinabuhi—ang ilaha ug atoa. (1 Tim. 4:16) Gusto tang tabangan ang uban nga makadangat sa pagkaila kang Jehova aron usab sila makatawag sa iyang ngalan sa pagkaluwas.—Buh. 2:21.
2 Ang kumon nga problema nga giatubang natong tanan mao ang pagkaplag niadtong wala sa balay sa dihang moduaw kita sa unang higayon. Gisulayan ba nimong moduaw sa ulahi sa maong adlaw? Daghan ang milampos ug maayo sa pagbuhat niana. O mosulay sa pagduaw sa laing adlaw. Kadtong siging wala sa balay basin maabot pinaagig sulat. Sa pagkobre sa teritoryo sa siyudad, maninguha sa pagpakigsulti ngadto kanilang imong mahibalag sa agianan sa gagmayng apartment o anaa sa daplin sa dalan. Kon ang imong pakigsulti mubo ra gayod, makita mong makaayong itanyag ang usa sa upat ka tracts: Kon Nganong Ikaw Makasalig sa Bibliya, Unsay Gituohan sa mga Saksi ni Jehova?, Kinabuhi sa Malinawong Bag-ong Kalibotan, ug Unsay Paglaom Alang sa Namatay nga mga Minahal?
BULUHATON SA KADALANAN UG KATINDAHANAN
3 Ang pakig-ambit sa buluhaton sa kadalanan makaabag kanimo sa pag-abot sa mga tawong sa kasagaran wala sa balay sa dihang moduaw kita. Sa duolon ang mga tawo, makaayong mahimong mahigalaon ug malaktoron samtang maninguha sa pagsugod sa panaghisgot. Ang pagpatunghag mubo, diretsong pangutana makabulig kanimo sa pagpukaw sa interes. Lagmit makaplagan mong masayon kaayo ang pagduol niadtong wala magdali. Ang pipila nagmalamposon sa pagduol ug diyutay ngadto sa tawo samtang sila motanyag sa mga magasin sa mubong paagi. Kon ang kadalanan nagaguot, nakaplagan sa pipila nga mapuslanong mosulti ngadto kanilang anaa sa daplin sa panon sa katawhan. Ang buluhatong katindahanan motabang kanimo sa pag-abot sa mga tag-iya ug mga empleyado kinsa sagad dili maabtan sa dihang moduaw kita sa ilang mga balay. Sulaying moduaw sa panahon nga pipila ra ang mga pumapalit diha sa tindahan.
4 Sa dihang anaa ka sa buluhaton sa kadalanan ug katindahanan, ayawg batia nga mga magasin ra ang imong ikatanyag. Ang mga libro ug mga brosyur ikatanyag man usab. Ang usa ka malamposong magmamantala mosugod sa panaghisgot sa pagpangutana, “Nakita na ba nimo ang among kinaulahiang libro?” Ang lain yanong moingon, “May dala ako nga gusto kong ipakita kanimo.”
5 Sa unsang paagi maugmad ang interes nga nakaplagan sa buluhatong kadalanan ug katindahanan? Daghan ang milampos sa pagpangutana sa mga interesado sa ilang adres aron ilang ikasulti sila ug dugang sa mas kombeniyenteng panahon. Kon makaplagan mong wala sila magpuyo diha sa inyong teritoryo, ang pagduaw ikahisgot ngadto sa angay nga kongregasyon. Ang nagadumalang magtatan-aw sa inyong kongregasyon malipay sa pagbulig kanimo niining bahina.
6 Maoy kabubut-on ni Jehova nga ang tanan mahatagan ug higayon sa pagkadungog sa kamatuoran. “Tugoting ang bisan kinsang giuhaw moari; tugoting ang bisan kinsa nga gusto makakuha sa tubig sa kinabuhi nga walay bayad.” (Pin. 22:17) Kon buhaton ta ang tim-os nga panlimbasog sa pagkontak sa tanang tawo, atong gipakita nga atong gihigugma ang uban sama sa paghigugma ni Jehova.—Juan 3:16.