Magtibuok-Kalag sa Ministeryo sa Kanataran
Bahin 4—Organisado sa Epektibong Pagtuman sa Atong Ministeryo
1 Ang tibuok-kalag nga publikong ministeryo nagakinahanglag maayong personal nga organisasyon. Si Jesus ug iyang mga tinun-an nagpahimutag talagsaong panig-ingnan alang sa atong ministeryal nga buluhaton karon.
(Luc. 10:1, 2; Buh. 5:42; 2 Tim. 4:5) Apan sa unsang paagi kaha nga ikaw mahimong mas maayong pagkaorganisado ug makapahimulos sa susamang maayong mga resulta karong mga adlawa?
2 Eskedyola ang Panahon sa Pag-alagad sa Kanataran: Sa epektibong pag-organisar sa atong ministeryo, kinahanglan kitang mogahin ug panahon alang sa lainlaing mga bahin niana. (Efe. 5:15, 16) Nakaplagan sa daghang magmamantala nga mapuslanon sa pagpahimutag usa ka tumong kon pila ka oras ang ilang gugolon nganha sa ministeryo sa kada bulan. Kini sagad nagakinahanglag paghikay sa ilang mga kalihokan aron makaambit diha sa pag-alagad sa kanataran sa matag semana. Ang Kristohanong mga ginikanan kinahanglang moabag sa ilang mga anak sa pag-eskedyol sa panahon alang sa regular nga pakig-ambit sa lainlaing mga bahin sa ministeryo sa kanataran.—Deut. 6:6; Prov. 22:6.
3 Ipahimutang ang Matuyoanong mga Tumong: Ang realistikong mga tumong makabulig man sa pagtuman sa imong ministeryo. Sa dihang matuman ang imong tumong, imong matagamtam ang kangaya sa kalamposan. (Prov. 13:12) Ang apostol nga si Pablo mitambag: “Mao lamang, nga sa gidak-on nga kita nagmauswagon, kita mopadayon sa paglakaw nga mahapsay niining maong naandan.” Oo, ang imong kalihokan sa kanataran kinahanglang magpamatuod sa usa ka mahapsay nga naandan.
4 Pananglitan, aduna ka ba ing igong suplay sa ‘tracts’ ug ‘handbills’? Kanunay bang aduna ka ing igong suplay sa kinabag-ohang mga magasin? Gigamit mo bag maayo ang house-to-house records?
5 Sa di pa makig-ambit sa ministeryo, gahinig panahon sa pagrepaso sa kinabag-ohang Ulohan nga Mahisgotan. Ilain ang mga puntong igsusulti gikan sa publikasyon nga ginatanyag, ug magmaandam sa paggamit niini nga epektibo aron halingon ang interes. Usab, magmaandam sa paggamit sa Nangatarongan Pinasukad sa Kasulatan. Bisan tali sa mga pagduaw, ikaw makahimog daling reperensiya sa pipila sa iyang daghang mga sugyot.
6 Angay kitang manlimbasog sa pagtuman sa atong ministeryo sa paghimog labing maayong pamatuod nga maarangan, “ang bunga sa mga ngabil.” (Heb. 13:15; itandi ang Oseas 14:2.) Sa pagbuhat niini, eskedyolon ta ang panahon para sa regular nga pakig-ambit sa pag-alagad sa kanataran ug himoon ang makataronganong mga tumong nga magpaarang kanato sa pagtuman sa atong ministeryo ngadto sa kadayegan ni Jehova.