Ang Labing Bantogang Tawo nga Nabuhi Sukad
1 Sa dihang nadawat nato kining bag-ong libro, kita naikag sa iyang ulohan, Ang Labing Bantogang Tawo nga Nabuhi Sukad. Ang pagpilig usa ka tawo ingon nga labing bantogan nagpasabot nga siya milabaw sa tanang binilyong mga tawo nga nabuhi sukad. Ang “bantogan” gihubit ingon nga “superyor sa kinaiya o kalidad.”
2 Si Jesu-Kristo, ang Anak sa Diyos, sa bug-os angayan sa maong pag-ila. Ang iyang nabatonan sa yuta walay kalabotan sa bahandi, sekular nga kalamposan, pulitikanhong pagmando. Siya mitungha sa ubos nga kagikan ug migugol sa kadaghanan sa iyang kinabuhi diha sa pagkawala mainila nga kahimtang. Sa dihang mitangkod siyang 30 ka tuig ang edad, hinunoa, gisugdan niya pagbutyag ang personalidad ug mga katuyoan ni Jehova nga Diyos sa paaging wala pa gayod masinatii sa tawo. Iyang nalampos ang labing dakong pagwaling buluhaton nga nahimo sa usa ka tawo, mihimog talagsaong mga milagro, ug mipahimutang sa pundasyon alang sa usa ka bag-ong kalibotang sosyedad.
3 Nganong Mokat-on Bahin Kang Jesus? Atong mabuligan ang mga tagbalay nga moapresyar sa libro pinaagig pag-ingon: “Daghang tawo karon moingon nga sila may pagtuo kang Jesus. Apan ang Bibliya nagaawhag kanato nga ‘motutok pag-ayo’ kaniya. [Heb. 12:2] Unsay imong gihunahuna nga atong makat-onan sa pagtuon sa iyang kinabuhi ug ministeryo? [Tugoting mokomento.] Oo, siya ang atong modelong sumbanan ug panig-ingnan ug kita giawhag nga ‘mosunod nga suod sa iyang mga lakang.’ [Basahang 1 Ped. 2:21.] Unsa man kaha kadaghan ang mga tawong gihunahuna mong sinserong nagabuhat niini sa ilang matag adlawng mga kinabuhi? [Tugoting mokomento.] Busa dili pa igo ang pag-ila kang Jesus apan kinahanglang atong ipasibo ang atong mga kinabuhi aron masundog siya, sanglit siya lamang ang dalan sa kaluwasan. [Basahang Juan 14:6.]” Unya atong ikatanyag ang libro, nga nagagamit sa pipila sa mosunod nga mga sugyot.
4 Talagsaong mga Kinaiya: Sa dihang magatanyag sa libro, makasukna ka: “Unsay nakapahimo kang Jesus nga labing bantogang tawo sa kalibotan?” Matubag mo kana pinaagig pagpunting sa pipila sa 133 ka kapitulo nga nagapasiugda sa iyang kinabuhi, iyang personalidad, iyang mga gipanudlo, ug iyang mga buluhaton. Ang kapitulo 24 nagasaysay sa iyang katuyoan sa pag-anhi sa yuta. Ang kapitulo 35 nagarepaso sa iyang inilang Wali sa Bukid. Ang kapitulo 43 nagapatugbaw sa talagsaong abilidad ni Jesus sa pagtudlo sa uban pinaagig mga ilustrasyon. Ang kapitulo 133 mihatag ug daklit nga pag-aninaw sa mga panalangin nga mapahimuslan sa katawhan sa dihang makompleto ang iyang buluhaton. Makaplagan nimong mapuslanon ang paggamit sa mga pangutana sa kataposan sa matag kapitulo aron pag-aghat sa panaghisgot. Mapasiugda nimo ang makapaalinggat nga mga ilustrasyon nga nagbutyag sa puwersa sa personalidad ni Jesus, ang kalalom sa iyang puangod sa uban, ug ang iyang malahutayong kasibot sa pagwali.—Matikding mga kapitulo 44, 95, 117, ug 123.
5 Atong itanyag kining bag-ong libro sa Hunyo. Aduna kitay maayong mga rason sa pagtanyag niini uban ang dakong kaikag ngadto sa uban. Ang matag usa nga buot ug walay kataposang kinabuhi kinahanglang mokuhag kahibalo bahin kang Jesu-Kristo. (Juan 17:3) Ang atong madasigong pagpanikaysikay sa pagpanagtag niining libroha magpaposible nga ang mga kinabuhi sa daghang sinserong mga tawo matandog pinaagi sa labing bantogang tawo nga nabuhi sukad.