Ang Interes ba Mahaling Pag-usab?

¹ “Malipayon kadtong matinguhaon sa ilang espirituwal nga panginahanglan.” (Mat. 5:3) Kanang mga pulonga ni Jesus diha sa Wali sa Bukid maoy puno sa kahulogan. Dili daghan sa katawhan ang nakaamgo nga sila nagakinahanglag espirituwal nga mga butang aron nga magmalipayon ang ilang mga kinabuhi ug matuyoanon. Adunay pipila nga nakabaton nianang maong pagkamatinguhaon sa espirituwal nga mga panginahanglan kaniadto apan nawad-an niana. May butang nga nakapabugnaw kanila mahitungod sa espirituwal nga mga butang. Sila mipahilayo gikan nianang alang unta gayod sa ilang kaayohan. Ang pangutana mao, Mahaling pa ba pag-usab ang interes nianang mga tawhana? Sa pagkamalipayon, alang sa pipila mahimo kana.

² Mahimong nakaila ka ug usa ka tawo nga gitun-an sa Bibliya sa mga Saksi ni Jehova mga katuigan na kanhi, tingali ingon nga bata pa gani, apan wala mopadayon sa pagpakig-uban sa katawhan sa Diyos. Ang pipila ka pagtulon-an sa Bibliya ug matarong nga mga prinsipyo, hinunoa, mahimong nasilsil na diha sa hunahuna sa maong tawo ug nahinumdoman pa. Samtang ang mga kahimtang sa kalibotan mosamot sa pagkadaotan ug ang mga kahimtang sa kinabuhi mausab, ang mga butang nakat-onan sa miagi mahinumdoman ug ang maong tawo mahimong moliso sa Diyos ug may pagkaandam na nga mokuhag dugang kahibalo sa Bibliya. Ang pagduaw nianang mga tawhana alang sa katuyoan nga padayonon ang pagtuon sa Bibliya mapamatud-ang labing magantihon.

³ Tino gayod nga ang panikaysikay kinahanglang himoon sa ngadtongadto sa pagduaw niadtong nanambong sa pagsaulog sa Memoryal. Tugoting masayran nila nga ikaw may lunsayng kabalaka sa ilang espirituwal nga kaayohan, ug motanyag sa pagtuon sa Bibliya uban kanila. Ang espesyal nga paningkamot kinahanglang himoon niadtong nakatambong usab sa distritong mga kombensiyon o sirkitong mga asembliya. Sa pipila ka kahimtang mahimong mapuslanon nga ang laing magmamantala ang moduaw sa usa ka tawo kansang pagtuon nahunong tungod sa kakulang sa pag-uswag.

⁴ Siyempre, ang mga tawo nga atong ginatun-an gidahom nga ugdang mamalandong sa pagsimba kang Jehova ug magapasundayag ug gidak-on sa kakugi sa ilang pagtuon sa Bibliya. Apan sa atong bahin, buot natong paneguroon nga nakahimo tag igo-igong panikaysikay sa pagbulig ug nga bation ta ngadto sa uban sama sa gibati ni apostol Pablo sa dihang siya miingon: “Ako mahinlo gikan sa dugo sa tanang mga tawo.”​—Buh. 20:26.