Pagpatala sa Tunghaan sa Teokratikanhong Ministeryo
1 Ang Tunghaan sa Teokratikanhong Ministeryo nagbansay sa minilyong Saksi ni Jehova ingong mga ministro. Daghan kanato mahinumdom pa sa kahadlok nga atong gibati niadtong una kitang nagpatala niining tunghaana, ug karon kita mapasalamatong miila sa papel niini sa atong espirituwal nga pag-uswag ingong mga magtutudlo sa Pulong sa Diyos. (Itandi ang Buhat 4:13.) Nagpatala ka na ba niining talagsaong tunghaan?
2 Kinsa ang mahimong magpatala? Ang panid 73 sa Organisado sa Pagtuman sa Atong Ministeryo nagatubag: “Ang tanang aktibong nagapakig-uban sa kongregasyon mahimong magpatala, apil ang bag-ong nagatambongan sa mga tigom, basta ang ilang pagkinabuhi dili sukwahi sa Kristohanong mga prinsipyo.” Among gidapit ang tanang kuwalipikado nga moduol sa magtatan-aw sa tunghaan ug mohangyo nga magpatala.
3 Programa sa Tunghaan sa 1997: Ang programa sa Tunghaan sa Teokratikanhong Ministeryo alang sa 1997 nagakobre sa nagkadaiyang mga pagtulon-an sa Bibliya ug mga tawo, maingon man ang kasaysayan sa organisasyon. Dugang pa sa pagpauswag sa atong mga katakos sa pagsulti ug pagtudlo, kita makakat-on gikan sa daghang espirituwal nga mga bahandi nga makaplagan sa kurikulum niini matag semana. (Prov. 9:9) Kon kita mangandam sa tunghaan, nga nagalakip sa pagbasa sa senemanang pagbasa sa Bibliya, ug motambong kanunay, kita makakuhag dakong espirituwal nga kaayohan gikan sa programa.
4 Sa 1997 ang kadaghanang mga pagbasa sa Bibliya alang sa Asaynment Num. 2 mas mubo kay sa miaging katuigan. Sa dihang mangandam niini, kinahanglang maampingong orasan sa estudyante ang iyang pagbasa ug dayon tinoon kon unsang gidugayona sa lima ka minutos ang magamit alang sa pasiuna ug sa paniklop. Magtugot kini sa estudyante nga gamiton ang iyang panahon sa bug-os ug ugmaron ang iyang katakos sa pagbasa ug ang arte sa pagsulti sa ekstemporanyong paagi.—1 Tim. 4:13.
5 Ang di-pormal nga pagsangyaw gidugang ingong posibleng tagboanan sa mga presentasyon sa Asaynment Num. 3, nga gipasukad sa librong Kahibalo. Busa, ang sister mahimong makapili sa usa ka balikduaw, pagtuon sa Bibliya sa balay, o di-pormal nga pagsangyaw ingong tagboanan niini nga asaynment.
6 Kon ikaw man makapribilehiyo sa paghatag ug nagatudlong pakigpulong, mga dagkong puntos sa Bibliya, o usa ka asayment sa estudyante, ikapakita nimo ang imong apresasyon pinaagig pagpangandam ug pagbansay pag-ayo sa imong bahin, pinaagig pagpresentar niana duyog ang kombiksiyon ug kainit, pinaagig dili pagsobra sa oras, pinaagig pagpaminaw ug pagpadapat sa tambag sa magtatan-aw sa tunghaan, ug pinaagi sa pagtuman kanunay sa imong asaynment nga matinumanon. Dayon ang imong pagpatala sa tunghaan mahimong usa ka panalangin alang kanimo ug sa tanang maminaw kanimo.