Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Agosto 29, 2005. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Hulyo 4 hangtod sa Agosto 29, 2005. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, p. 36-7.]
MGA HIYAS SA PAGPANULTI
1. Sa dihang magpaambit sa atong paglaom ngadto sa uban, sa unsang paagi atong “ipaila ang [atong] pagkamakataronganon sa tanang tawo,” ug nganong hinungdanon kini? (Filip. 4:5; Sant. 3:17) [be p. 251 mga par. 1-3, kahon] Atong ikapakita ang atong pagkamakataronganon pinaagi sa pagtagad sa kagikan, mga kahimtang, ug pagbati sa atong kaestorya. Ang atong lig-ong kombiksiyon ug kasibot nga dinuyogan sa hait nga pagsabot ug pagkaandam mopahiuyon kon nahiangay nagpakita usab ug pagkamakataronganon. Hinungdanon kini tungod kay ang pintok, mapugsanon nga paagi lagmit makawala sa interes sa mga tawo ug kasagarang dili maangayan.
2. Sa unsang paagi ang pagkahibalo kon kanus-a mopahiuyon motabang kanato nga magmalamposon sa pagpakig-estorya sa uban? [be p. 253 mga par. 1-2] Bisan pag aduna kitay lig-ong mga argumento nga magpamatuod sa atong panglantaw, dunay mga panahon nga mas maayong dili kana ipugos. Ang pagpalabay lamang sa sayop nga gipamulong nga dili magtul-id niana maghatag kanato ug kahigayonan sa pagpunting sa panaghisgot nganha sa usa ka butang nga makahatag ug labawng kaayohan. Ang paghinumdom nga si Jehova naghatag sa mga tawo ug katakos nga makapili makatabang usab kanato sa pagkahibalo kon kanus-a mopahiuyon. (Jos. 24:15; Prov. 19:11)
3. Nganong hinungdanon ang binatid nga paggamit ug mga pangutana sa dihang tabangan nato ang uban sa pagpangatarongan bahin sa ulohang gihisgotan? [be p. 253 mga par. 3-4] Ang mga pangutana, sa dihang gamiton sa epektibong paagi, maghatag sa mga tawo ug kahigayonan sa pagpahayag kon unsay anaa sa ilang kasingkasing ug sa paghunahuna ug pagpangatarongan bahin sa ulohang gihisgotan. Imbes tubagon dayon ang mga pangutana ug ikaw na lay mosulti, kita makagamit ug mga pangutana aron matabangan ang mga tawong nagpakisayod sa paghunahuna ug paghimog mga konklusyon pinasukad sa nahisgotan na. (Luc. 10:25-37)
4. Unsang mga butanga ang angayng konsiderahon aron mahimong madanihon ang usa ka presentasyon? [be p. 255 mga par. 1-4, kahon; p. 256 par. 1, kahon] Ang atong mga mamiminaw dili motuo o molihok pinasukad sa atong gisulti gawas kon sila kombinsido nga kana tinuod. Busa, kinahanglan natong paneguroon nga ang atong gitudlo lig-ong gipasukad sa Pulong sa Diyos, ang Bibliya. (Juan 17:17) Maningkamot gayod kita nga ihatag ang makapatagbawng ebidensiya sa pagsuportar sa atong gisulti. Imbes magpahayag lamang sa atong hugot nga pagtuo, kinahanglang hatagan nato ang uban ug lig-ong mga katarongan sa pagdawat sa atong gisulti, nga maghunahuna kanunay nga ang atong mga mamiminaw aduna gayoy katarongang mangutana: “Nganong tinuod man kana?”
5. Unsay angay natong hinumdoman kon modesidir kita sa paggamit ug dugang ebidensiya nga dili gikan sa Bibliya sa pagsuportar sa pagkamakataronganon sa Kasulatan? [be p. 256 mga par. 3-5, kahon] Ang maong pamatuod nga gikan sa kasaligang tinubdan angayng magpakita nga ang ginaingon sa Bibliya nahiuyon sa makitang mga kamatuoran. Kini kinahanglang mohaom sa atong mga tumong ug sa mga panginahanglan sa atong kaestorya. Kita kinahanglang mosugod kanunay ginamit ang Pulong sa Diyos ingong atong pangunang tuboran sa tukmang impormasyon ug dayon ipunting ang pagtagad ngadto sa mga nakaplagan sa siyensiya o sa giingon sa mga eskolar sa pagsuportar sa atong argumento.
ASAYNMENT NUM. 1
6. Unsang tin-awng ebidensiya ang nagpamatuod sa pagkamakasaysayanhon ni Jesus? [w03 6/15 pp. 4-7] Si Jesus mao ang labing impluwensiyadong tawo sa kasaysayan. Ang unang-siglong mga historyano nga si Josephus ug Tacitus naghisgot bahin kang Jesus ug sa iyang mga tinun-an, maingon man usab ang ikaduhang-siglo nga magsusulat nga si Pliny nga Manghod. Ang mga pagtulon-an ni Jesus, sama nianang makaplagan diha sa Wali sa Bukid, nakaapektar sa kinabuhi sa milyonmilyong tawo. (Mat., mga kap. 5-7) Ang mensahe labot sa paglansang kang Jesus, nga anaa sa Bibliya apan wala maangayi sa daghan, nagpamatuod sa pagkatinuod sa asoy sa Bibliya bahin sa kinabuhi ug ministeryo ni Jesus. (1 Cor. 1:22, 23) Dugang pa, ang masibotong kalihokan sa ministeryo sa mga sumusunod ni Jesus bisan pa sa grabeng pagsupak nagpamatuod sa pagkamakasaysayanhon ni Jesus. (1 Cor. 15:12-17)
7. Sa unsang paagi ‘ang baba sa mga matul-id magaluwas kanila,’ ug sa unsang paagi ang balay mismo sa mga matarong “magapabilin”? (Prov. 12:6, 7) [w03 1/15 p. 30 mga par. 1-3] Ang matul-id nga mga tawo nahibalo kon unsay matarong ug daotan. Sila magmabinantayon ug magmaalamon aron malikayan ang kapeligrohan, ug ilang pasidan-an o tabangan ang uban sa paghimo usab niana. Sila magpabilin nga lig-ong tigpaluyo sa kon unsay husto bisan pag anaa sa kalisdanan.
8. Tungod kay ang Bibliya wala sulata sama sa usa ka detalyadong listahan sa espesipikong mga lagda, sa unsang paagi atong ‘masabtan kon unsa ang kabubut-on ni Jehova’? (Efe. 5:17) [w03 12/1 p. 21 par. 3–p. 22 par. 3] Ang pagsabot sa kabubut-on ni Jehova naglangkit sa pag-ila kon unsay makapahimuot o dili-makapahimuot kaniya. Ang usa ka espesipikong balaod o listahan wala kinahanglana aron mahibaloan ang tanang butang. Kon ang usa ka tawo nagdiyeta, wala kinahanglana ang usa ka listahan sa tanang kalan-on nga dili angayng kaonon o angayng kaonon. Sa samang paagi, sa dihang naglista sa mga buhat sa unod, si apostol Pablo naghisgot ug “mga butang nga sama niini” nga maghikaw sa usa sa pagkadawat sa mga panalangin sa Gingharian. (Gal. 5:19-23) Ang paggamit sa gahom sa pagsabot maghatag sa tagsatagsa ka tawo ug kahigayonan sa pagpakitag kinasingkasing nga pagpabili ug sa ilang tinguha sa pagpahimuot sa Diyos.
9. Unsang mga prinsipyoha sa Bibliya nga kon ipadapat makatabang sa usa sa pagsagubang sa kakabos o sa kalisod sa panalapi? [w03 8/1 p. 5 mga par. 2-5] Ang Ecclesiastes 7:12 makatabang sa usa sa pagkaamgo nga bisan tuod ang salapi makahatag tingali ug usa ka sukod sa kasegurohan, ang diyosnong kaalam mas dakog bili. Kini makapanalipod kanato karon ug makatabang kanato nga makabaton ug kinabuhing walay kataposan. Ang Lucas 14:28 nagdasig sa usa sa pag-ila sa mga butang nga angay niyang unahon ug pagbadyet sa iyang salapi aron mabayran ang gikinahanglang mga galastohan. Ang 1 Timoteo 6:8 ug Mateo 6:22 nagsugyot nga magmakontento sa mga kinahanglanon sa kinabuhi samtang magsentro sa hunahuna diha sa pag-alagad sa Diyos nga nagapanglantaw sa kinabuhing walay kataposan.
10. Sa unsang paagi ang panig-ingnan ni Jehova sa pagkamanggihatagon makaapektar kanato? (Mat. 10:8) [w03 8/1 pp. 20-2] Tungod sa iyang dili-takos nga kalulot, gisakripisyo ni Jehova ang iyang Anak nga mamatay diha sa usa ka haladnong kamatayon, aron magtaganag pasukaranan alang sa kinabuhing walay kataposan. (Roma 3:23, 24) Kini angayng magtukmod kanato sa pagtanyag sa atong kaugalingon nga kinabubut-on ug sa pagdalag “tubig sa kinabuhi nga walay bayad” ngadto sa mga tawo. (Pin. 22:17; Sal. 110:3) Bisan tuod gidasig ang mga alagad sa Diyos sa ‘pagtutok ngadto sa pagbayad sa ganti,’ kita angayng moalagad sa Diyos tungod sa gugma ug dili sa hinakog nga mga katarongan. (Heb. 6:10; 11:6, 26)
SENEMANANG PAGBASA SA BIBLIYA
11. Unsay kahulogan sa duha ka haligi nga ginganlag Jakin ug Boaz diha sa ganghaan sa templo nga gitukod ni Solomon? (1 Hari 7:15-22) Ang ngalan sa tuong haligi nga Jakin nagkahulogan ug “Siya Lig-ong Magatukod.” Ang ngalan sa walang haligi nga Boaz dayag nga nagkahulogan ug “Pinaagi sa Kusog.” Sanglit ang Hebreohanong pinulongan basahon man gikan sa tuo paingon sa wala, ang mga haligi nagpasabot nga “siya lig-ong magatukod pinaagi sa kusog.” Kini maoy independenteng mga haligi nga walay bisan unsang gisangga nga bahin diha sa tinukod. Morag ang sukaranang kahulogan niini mao nga ang Diyos lig-ong nagtukod sa templo pinaagi sa kusog ug nag-uyon sa matuod nga pagsimba nga ginahimo didto. [1, 1 Hari 7:21; it-1-E p. 348 par. 2; w66-E p. 32]
12. Uyon ba sa Moisesnong Balaod ang gasa ni Solomon nga 20 ka siyudad sa yuta sa Galilea ngadto kang Haring Hiram sa Tiro? (1 Hari 9:10-13) Gisugdan ni Solomon ang iyang programa sa pagpanukod sa ikaupat nga tuig sa iyang paghari. Gidangtag 7 ka tuig ang pagtukod sa templo ug dugang 13 ka tuig sa paghuman sa balay sa hari. Sa susama, ang Ginoong Jesu-Kristo mopatim-awng naghimo usab ug buluhatong pagpanukod ilabina maylabot sa pagpasig-uli sa matuod nga pagsimba ug sa pagpalig-on sa espirituwal nga “balay sa Diyos” sulod sa yugto sa 1918-38. (1 Ped. 4:17) [2, w84 7/1 p. 11 par. 14]
13. Unsang leksiyon ang atong makat-onan gikan sa pagkadili-masinugtanon sa “usa ka tawo sa Diyos”? (1 Hari 13:1-25) Kita kinahanglang magpadayon sa paglakaw diha sa mga dalan ni Jehova nga walay ikasaway. Angay natong pangayoon kanunay ang iyang pagtultol, ilabina sa malisod ug makapalibog nga mga panahon sa kinabuhi. Kinahanglang dili kita mangahas sa pag-unauna, tingali pinaagi sa kaugalingon natong mga ideya o kaha gumikan sa pag-aghat sa laing tawo bisan pag kanang tawhana aduna tingaliy sinaligang katungdanan o nangangkong adunay sinaligang katungdanan diha sa organisasyon sa Diyos. [3, w05 7/1 “Ang Pulong ni Jehova Buhi—Mga Haylayt Gikan sa Basahon sa Unang Hari”; w98 9/1 p. 23; w62 p. 728 par. 14]
14. Sa unsang paagi gipakita ni Haring Asa sa Juda ang iyang kaisog, ug unsay atong makat-onan gikan sa iyang panig-ingnan? (1 Hari 15:11-13) Giwagtang ni Haring Asa sa Juda ang mga idolo ug ang mga lalaking pampam sa templo. Gitangtang usab niya ang iyang apostatang apohang babaye gikan sa iyang katungdanan ug gisunog ang iyang “makalilisang nga idolo.” Sa samang paagi, kita angayng madasigon nga magatuboy sa putling pagsimba pinaagi sa atong pagsangyaw ug pagpanudlo, nga mobarog nga malig-on batok sa apostasya. [4, w05 7/1 “Ang Pulong ni Jehova Buhi—Mga Haylayt Gikan sa Basahon sa Unang Hari”; w93 11/15 p. 17 par. 20]
15. Sa unsang paagi ang hitabo nga naglangkit kang Haring Ahab ug Nabot nag-ilustrar sa kapeligrohan sa pagkaluoy sa kaugalingon? (1 Hari 21:1-16) Si Haring Ahab misugod sa pagkaluoy sa iyang kaugalingon human modumili si Nabot sa pagbaligya sa usa ka gamayng luna nga yuta ngadto kaniya. Ang asawa ni Ahab, nga si Raynang Jezebel, wala makadawat sa pagbalibad ni Nabot ug naghikay nga siya pasakaan ug bakak nga sumbong sa pagpasipala ug nagpapatay kaniya pinaagig pagbato. Sumala sa giilustrar sa kaso ni Ahab, ang tawo nga magpadala sa pagkaluoy sa kaugalingon nagasubay sa dili-maayong dalan. Tungod kay ang pagkaluoy sa kaugalingon maoy hinobra ug dili-timbang nga kabalaka sa kaugalingon, kini mahimong makadaot gayod. Kini makapahimo sa usa ka tawo nga masulub-on ug mabalak-on sa ginagmayng mga butang, sama sa nahitabo kang Haring Ahab. Kini magbutad sa pagtagad sa usa ka tawo ngadto sa iyang kaugalingon sa sukod nga ang mahigugmaong kabalaka alang sa uban momenos o mahanaw pa gani. Ang usa nga magpadala sa pagkaluoy sa kaugalingon mahimong magtan-aw sa usa ka seryosong butang sa tinuis nga paagi ug, busa, makahimo tingali ug dili-maayong panghukom. Ang pagkaluoy sa kaugalingon mahimong makapaluya usab sa usa ka tawo sa espirituwal ug, mas grabe pa, mag-aghat kaniya sa pagkompromiso ilalom sa pagpit-os, nga magsakripisyo sa iyang hinlong baroganan atubangan sa Diyos. [6, w78 3/15 p. 3]