Pangutana

◼ Sa unsang paagi makatabang ang tanan aron daghan ang makat-onan gikan sa mga tigom? (Deut. 31:12)

Agig pagtahod kang Jehova ug sa mga tigom sa kongregasyon, ang tanan gidasig sa pag-abot ug sayo ug sa pagkahimong andam nga matudloan niya. Mas maayong okupahon una ang mga lingkoranan sa atubangan aron ang ulahing mangabot ug ang may gagmayng mga bata makalingkod sa luyo. Sa dili pa magsugod ang tigom, ang cellphone kinahanglang patyon o i-silent aron dili makabalda. Ang nanambong dili madisturbo kon ang tanan magmahunahunaon niining bahina.—Eccl. 5:1; Filip. 2:4.

Kon motambong nag tigom ang mga bag-ohan, mas maayong ipatapad sila sa mga igsoon nga nasuod nila. Makatabang kini ilabina kon dunay gagmayng mga bata nga angayng bansayon. Tingali mabag-ohan ang usa ka pamilya sa una nilang pagtambong ug tigom. Busa palabihon tingali nilang molingkod sa luyo aron dili makabalda sa uban kon kinahanglan silang mogawas sa tigomanan aron atimanon ang ilang mga anak. (Prov. 22:6, 15) Ang mga pamilya nga may gagmayng mga anak dili angayng molingkod sa linaing lawak diin ang mga bata mahimong magsabasaba. Kasagaran, mas maayong disiplinahon o atimanon sa ginikanan ang iyang anak sa gawas sa tigomanan ug dayon mobalik sa tigomanan uban sa iyang anak.

Paneguroon sa mga atendant nga mahuptang dungganon ang dapit sa pagsimba. Sila motabang sa mga pamilya ug niadtong maulahi panagsa sa pagpangitag kalingkoran. Sila mataktikanhon ug maalamon sa pagtabang sa uban nga makalingkod nga dili makabalda. Magmaalamon usab sila sa pagdumala sa wala-damhang mga kabaldahan. Kon may bata nga magdagandagan ug magsabasaba, ang mga atendant mahimong makaduol sa mga ginikanan aron makatabang.

Ang tanang nanambong sa tigom makatabang aron daghan ang makat-onan bahin kang Jehova ug sa iyang katuyoan alang sa usa ka malinawon ug matarong nga bag-ong kalibotan.—Heb. 10:24, 25.