Ayaw Kawanga ang Imong Mahulagwayong mga Suntok
1. Sa unsang paagi mapadapat ang 1 Corinto 9:26 sa atong ministeryo?
1 Si apostol Pablo misulat: “Ang akong pagdagan dili kay walay-katinoan; ang akong pagpanuntok dili ingon sa pagsuntok sa hangin.” (1 Cor. 9:26) Gihisgotan ni Pablo dinhi ang bug-os nga pagsentro sa iyang hunahuna sa espirituwal nga mga tumong. Apan kini nga prinsipyo mapadapat usab sa atong ministeryo. Dili nato kawangon ang atong mahulagwayong mga suntok, o mga paningkamot, aron daghan tag malampos. Sa unsang paagi?
2. Sa unsang paagi atong masundog si Pablo ug ang ubang mga ebanghelisador sa unang siglo kon kanus-a ug asa mosangyaw?
2 Sangyaw Kon Asa ang mga Tawo: Si Pablo ug ang ubang mga ebanghelisador sa unang siglo misangyaw kon asa ang mga tawo. (Buh. 5:42; 16:13; 17:17) Busa kon daghan ang anaa sa ilang balay inigkagabii, lagmit kini ang labing maayong oras sa pagpamalaybalay. Daghan bang tawo sa estasyonan sa bus o tren sa sayo sa buntag o sa hapon diin sila mopaingon sa trabaho o mouli na sa balay? Kanus-a maghugop ang mga tawo diha sa shopping mall o mga palitanan? Tingali epektibo ang pagsangyaw sa kadalanan nianang panahona.
3. Sa unsang paagi dili makawang ang atong mahulagwayong mga suntok sa pagkobre sa atong teritoryo?
3 Magmaalamon sa Pagkobre sa Teritoryo: Dili usab nato kawangon ang atong mahulagwayong mga suntok sa pagkobre sa atong teritoryo. Pananglitan, inay kobrehan sa dako kaayong grupo ang usa lang ka teritoryo, mas maayong bahinon ang grupo aron sayon kining organisahon. Sa mga baryo usab, mas dali natong makobrehan ang teritoryo ug mas daghan ang masangyawan kon dili kaayo dako ang grupo. Puwede bang makakuha tag personal nga teritoryo nga duol ra sa atong balay, aron diyutay rang panahon ang magugol sa pagbiyahe?
4. Unsay makatabang nato nga mahimong maayong “mga mangingisda ug mga tawo”?
4 Gitandi ni Jesus ang mga ebanghelisador ngadto sa “mga mangingisda ug mga tawo.” (Mar. 1:17) Ang tuyo sa mangingisda dili kay maglagak rag pukot, kondili aron makakuha ug isda. Busa, tinoon sa maayong mga mangingisda kon asa ug kanus-a sila lagmit makakuhag isda, ug mangisda dayon. Dili gayod nila kawangon ang ilang mga paningkamot. Ingon usab unta niana ang atong kakugi sa ministeryo.—Heb. 6:11.