Ang Akong Sista, Akong Musika ug ang Akong Diyos

ANG Oktubre 30, 1963 espesyal kaayong adlaw alang kanako. Sa 7:30 s.g. ako mao ang solo nga manunugtog sa sista sa duha-ka-taknang programa sa klasikal nga musika, nga himoon sa prinsipal nga teatro sa Montevideo. Gikahatag na ang dakong publisidad sa maong okasyon, nga gisibya pa sa tibuok Uruguay.

Niadtong buntaga ako mimata nga may dakong kabalaka tungod sa umaabot nga pag-atubang sa dako ug mapugsanon nga mamiminaw. Kay mipatim-awng labi pang miaginod ang mga takna kay sa naandan, misamot ang akong kabalaka. Apan sa diha nga anaa na sa atubangan sa mamiminaw kinahanglang bug-os kong makontrolar ang akong nerbiyos aron makahatag ug pagtagad sa komplikadong pagkablit sa sista. Ang daghang umaabot nga mga musikero sa konsiyerto nangapakyas, kay nabiktima sa ilang nerbiyos. Sa pila ka kaso nahitabo ang pagkawala sa memorya o bisan sa dili-grabeng mga kaso sa amnesia. Gawas pa niana, ang sista sa konsiyerto maoy ingrato kaayong instrumento. Kini moyagyag dayon kanimo. Ang labing gamay nga sayop sa pagpasa sa sensitibong mga tono daling hiilhan bisan sa labing dili eksperyensiadong igdulongog.

Ang Lisod nga Kasinatian sa Konsiyerto

Sa mga 6:30 s.g. misugod pagpangabot ang mamiminaw. Nalakip mao ang propesyonal nga mga musikero, daghang mahiligon sa sista, mga propesor ug mga magtutudlo sa musika, mga estudyante sa musika ug mga magdadayeg, ingon man ang publiko sa linangkob. Ang tanan may butang gikahiusahan—ang tinguha sa pagkalipay sa maanindot nga musikal nga konsiyerto. Gidahom usab nila ang hataas nga sukdanan sa pagkamaayong musikero. Nindot ang paglantaw nga adunay daghan pang katawhan nga moapresyar sa maluming nga kananoy nga lahi sa inggit, langgis nga musikang rock.

Sa maong panahon alas 7:20 s.g. na. Sa kalit may nanuktok sa pultahan sa lawak-ilisan ug mipahinumdom kanako nga sa singko minutos ako kinahanglang tua na sa entablado. Kadto maoy una sa tulo ka pahibalo. Sa sunod maoy sa tres minutos, ug ang ikatulo maoy sa dihang usa na lang ka minuto una pagtukas sa tabil. Nganong adunay maong makapakulbang pag-ihap? Aw, sanglit ang lokal nga mga estasyon sa radyo magasibya sa konsiyerto sa halos tibuok nasod pinasukad sa chain network, makataronganong ang “On the Air” signal kinahanglang hingpit mahiusa sa aktuwal nga panahon sa pagsugod.

Usa na lang ka minutos dayon magsugod na! Sa maong panahon hilabihan na ang kakulba. Gipatay ang mga suga sa dakong bahin sa awditoryom. Karon ang entablado na lang ang gisugaan sa bug-os. Akong nadungog ang usa ka tingog nga nagtawag sa akong ngalan ug nag-ingon: “Makaadto ka na karon sa entablado.”

Kadto ang hinungdanon kaayong gutlo. Ang akong kasingkasing mibutobuto nga maorag mogawas sa akong dughan. Midali ako paglakaw ngadto sa sentro sa entablado luyo sa siradong tabil. Mibukas ang tabil, mitikang ako abante, ug sumala sa naandan, gisugat ako sa mamiminaw uban ang mainitong pakpak. Tungod niadto ako misugod pagrelaks ug nahanaw ang bahin sa kakulba. Mas sayon ang komunikasyon sa mamiminaw.

Ang Mahukmanon nga Gutlo

Una mosugod akong gihimo ang dali nga pagkablit sa mga kuwerdas alang sa pangataposang pagsusi sa maayong pagkatono sa instrumento. Unya inanay kong gisugdan pagtugtog ang unang bahin. Sulod sa unang pila ka bara sa musika nangurog ang akong mga kamot. Sa inanay kana nalig-on ug nakontrolar sa bug-os. Ang mga tono nahimong mas hait, mas tin-aw, mas dili basag ug mas eksakto. Sa panahong ako nahidangat sa ikaduhang piyesa ang pagbati nga dili lig-on ug pangurog halos nahanaw na sa bug-os.

Akong namatikdang ang pagtugtog sa mugbong mga seksiyon sa komposisyon, ang daghang nagkalainlaing delikadong mga tono, ang gikusgon, ug malangkobong katibuok sa tingog dakog pag-uswag. Ang atentibong panon maorag naningkamot diha sa hingpit nga kahilom sa pagpamati sa matag nota. Ang ilang madasigong pakpak sa kataposan nagpasalig kanako nga ako nakapasar sa pagsulay.

Ang mga pakpak ug hugyaw mipatim-aw nga mipurongpurong sa akong panlimbasog. Apan unsa ba ang mipugos kanako sa pagpadayon sa pag-atubang sa publiko? Ang pakpak, pagdayeg ug mga nangayo sa akong pirma mao ba ang nagtuklod kanako sa pagsubli sa maong pasundayag sa makadaghan? Kadto ba butang maylabot sa mahakogon nga garbo sa kaugalingon?

Kon sa Unsang Paagi Ako Nahimong Maninista sa Konsiyerto

Sa bata pa ako ang dili-makita nga puwersa maorag mihakgom kanako. Maoy akong tinguha sa kahiladman ang mahimong musikero. Ang akong musikal nga hilig nadayag sa sayong panuigon nga singko. Matinguhaon ako nga motokar kanunay sa sista. Kadto wala kaayo hatagig pagtagad sa akong mga ginikanan. Sila naghunahuna nga kadto umalaging kapritso lamang. Milabay pa ang lima ka tuig una nila isipa ako nga ugdang. Busa gisugdan ko ang pormal nga pagtuon sa sista sa edad nga diyes anyos.

Sa diha nga ako 15 anyos na misugod ako sa paghimog publikong mga pasundayag. Dayon sa 1959 ako nakadaog sa akong unang bangga, nga migula sa unang dapit sa tinuig nga pasundayag nga gihimo sa usa ka Belgianong internasyonal nga organisasyon. Sa tuig 1961 nakuha ko na usab ang unang dapit sa usa ka maindigong pasundayag nga giorganisar sa tulo ka pangunang musikal nga institusyon sa Uruguay. Nahimong subsob ang publikong mga pasundayag.

Sa 1964 ako mibiyahe ngadto sa Tinipong Bansa kauban sa usa ka piyanista. Didto among gipasundayag ang sunodsunod nga konsiyerto sa Washington, D.C. Sa paghiuli sa 1965 akong gipadayon ang pag-ugmad sa akong karera sa musika. Ako kanunay nagtuman sa mga kasabotan sa nagkalainlaing estasyon sa radyo ug telebisyon. Ako nahimong inila ug nailhan sa halos bisan diin ako moadto sa Uruguay.

Espiritismo Wala Makatagbaw

Una pa nianang panahona ako nagpraktis sa espiritistang relihiyon. Ako nag-alagad pang usa ka espiritista ug mananambal. Bisan pa niana, ang kinadak-an kong interes ug sinserong tinguha mao ang mas mailhan ang Diyos. Apan sa diha nga akong nadawat ang dayag nagkasumpakiay nga “mga komunikasyon” gikan sa kalibotan sa okulto, kadto nagpatungha sa pipila ka seryosong pagduhaduha ug nagdaot sa akong pagtuo sa espiritismo. Ang kagubot nga naghari panahon niadtong mga tigom sa espiritista nagtin-aw kanako nga ang matuod nga Diyos dili magauyon nianang mga buhata. Busa ako mihunong sa espiritismo nga wala isalikway ang akong pagpangita sa kamatuoran.

Niadtong 1965 ako gitanyagan sa pagbiyahe sa tibuok Uropa nga mopasundayag diha sa daghang prinsipal nga mga siyudad, butang nga gitinguha kong buhaton sa kanunay. Ugaling, sa maomaong panahon nasuod kong higala ang usa ka magtutudlo sa sista. Kadtong panaghigalaa mitultol sa dagkong kausaban sa akong karera ug sa akong relasyon sa akong Maglalalang.

Harmoniya Diha sa Bibliya?

Ang akong mga ideya mahitungod sa Diyos ug sa Bibliya maoy hanap ug makalilibog. Apan sa diha nga giduaw ako sa akong higala nga magtutudlo sa sista ang kahimtang misugod sa pagkausab. Among naugmad ang batasan sa regular nga pagtagbo sa pagtugtog ug paghisgot sa bag-ong mga hitabo. Ang mga ulohan sa panaghisgot naglakip sa relihiyon ug politika. Bisan pag sa nangagi siya ateyista, mihukom siya sa pagtuon sa Kasulatan. Tungod niadto iyang gidawat ang senemanang pagtuon sa Bibliya sa balay uban sa duha ka batan-ong misyonaryo sa mga Saksi ni Jehova. Kay nahibaloan ang akong dulot nga interes sa pagkakat-on mahitungod sa Diyos, iya akong gidapit nga moapil. Malipayon akong midawat.

Among gitun-an ang pulyetong “Kining Maayong Balita sa Gingharian.” Apan ako daghan kaayog pangutana nga gamay ra ang pag-uswag nga nahimo diha sa pulyeto mismo. Bisan pa niana, akong nailhan dihadiha nga kadto mao ang kamatuoran nga akong gipangita. Ang yabag, makalilibog nga mga pagtulon-an sa bakak nga relihiyon gipulihan sa makataronganong may-harmoniya nga kamatuoran. Kadto nahisamag honi sa akong igdulongog. Pagkadako sa akong kalipay sa pagkahibalo bahin kang Jehova, pagkahibalo kon unsay nagpahinabo sa pagkadaotan ug ang bugtong molampos nga solusyon sa mga suliran sa tawo maoy pinaagi sa Gingharian sa Diyos! Nangurog ako sa kalisang sa akong naamgohan unsa ka peligroso ang pagpakigtimbayayong nga laktud sa mga demonyo ingon nga ilang palaumagian sa nangagi.—Deuteronomio 18:9-13; Isaias 8:19.

Sa akong gisugdan ang pagtuon uban sa mga Saksi ni Jehova, si Myriam, ang akong pangasawonon, nakigtuon sa mga Adventista. Sa diha nga kami nagduaway sa usag usa kami kanunay nagbayloayg mga ideya bahin sa among natun-an. Siya natingala sa pagkadaghan sa akong natunan mahitungod sa mga ulohan sama sa Trinidad, impiyerno, pagkabanhaw, Gingharian ug sa uban. Ang iya lamang nakat-onan sulod sa samang panahon mao ang “pagbantay sa Igpapahulay.” Akong nadiskobrehan nga ang kasugoan sa Igpapahulay gihatag sa linain ngadto sa mga Israelinhon ug dili sa uban. (Salmo 147:19, 20) Kadto natuman na ug natapos duyog sa pagkamatay ni Jesus. (Efeso 2:14-16; Colosas 2:16, 17) Gitabangan ko si Myriam sa pagsabot sa maong punto ug siya mihukom sa pagbulag sa mga Adventista ug pagsugod sa pagtuon uban sa mga Saksi.

Kami naminyo sa 1967 ug nagpasimbolo sa among pagpahinungod kang Jehova pinaagi sa pagtuslob sa tubig sa 1970. Ikasubo, ang akong higala nga magtutudlo nga nakatabang pag-ayo sa paggiya kanako ngadto sa kamatuoran wala mopadayon.

Bag-ong mga Prinsipyo

Ingong usa sa mga Saksi ni Jehova, akong nakat-onan ang bag-ong mga prinsipyo. Sulod sa akong dili-hingpit nga mga limitasyon misugod ako sa pagsabot sa mga butang sumala sa pagsabot ni Jehova niana. Tungod niadto akong gipalandong pag-usab ang akong mga tumong sa kinabuhi ug gihimo ang hinungdanong mga kausaban. Akong giusisa ang akong musikal nga karera sa kinabuhi sa kahayag sa akong bag-ong naugmad nga relasyon uban kang Jehova. Akong gipalandong pag-usab ang daghang panahon nga nagamit sa pagpangandam alang sa mga konsiyerto, pagbiyahe ug sa daghan kong publikong mga pasundayag. Sa unsang paagi kadto makatabang kanako sa pagtuman sa akong pahinungod ngadto sa akong Maglalalang?

Masaaron kaayo ang akong kaugmaon ingong maninista sa konsiyerto. Apan sa maong panahon may nahitabo nga nag-usab nianang tanan. Kadtong tanang dagkong kalaoman karon wala nay hinungdan ug dili na importante, sa gipalandong ko ang mga pulong ni Jesus, “Busa panglakaw kamo ug paghimog mga tinun-an sa katawhan sa tanang kanasoran.” Akong gitulotimbang ang butang nga may labaw pang bili alang sa akong mamiminaw—ang pagpatalinghog sa usa ka konsiyerto sa pagtokar sa sista kun ang pagpatalinghog sa maayong balita sa Gingharian sa Diyos? Ang paghimo sa matang sa honi nga magadayeg kang Jehova ug magadalag kinabuhi sa mga tigpatalinghog niini labi pang mapuslanon sa tanan. Ang akong sista mopatunghag umalagi nga kasadya ug kalipay, apan ang akong igapahayag karon ug igatudlo gikan sa Pulong sa Diyos makadalag permanenteng kaayohan.—Mateo 28:19, 20.

Ang akong konsensiya nga nabansay sa Bibliya mipahinabo kanako sa paghimo sa hinungdanong desisyon. Akong gihukom nga labi pang maayo nga akong hunongon ang akong karera ingong maninista sa konsiyerto. Wala ako magbasol sa pagkanselar sa akong mga kontrata, apil ang akong paglibot alang sa pagpasundayag sa Uropa. Wala ko batia nga husto ang pag-ingon: “Moalagad ako kanimo Jehova, apan buhaton ko usa kining tanang ubang butang gusto kong buhaton, ug sa dihang matapos na ako niini mobalik ako ug unya magmatinumanon kanimo.”—Lucas 9:57-62.

Sumala sa pagadahomon, mitungha ang grabeng pagsaway tungod sa maong desisyon. Kadaghanan sa akong mga paryente, mga higala ug dagko usab nga mga tawo sa kalibotan sa musika mibating ang akong hunahuna nalibog. Wala sila makaamgo nga ang akong hunahuna nagkatul-id na hinuon gikan sa kanhing libog nga kahimtang. Sayop nilang gihukom nga ang akong bag-ong relihiyon nagdili kanako sa pagpadayon sa akong mga konsiyerto. Lisod ang pagpasabot kanila nga ang akong desisyon maoy akong kaugalingon. Ang akong konsensiya nagdasig kanako sa pagdawat sa labi pang dinaliang buluhaton sa pagsangyaw ug sa ubang Kristohanong kalihokan. Ang pagtambong sa Kristohanong mga tigom ug pag-apil sa buluhatong pagsangyaw halos imposibie samtang nagalibot alang sa konsiyerto.

Akong Musika ug Akong Pagsimba

Ang akong kalipay ug katagbawan ingong Kristohanon sukad sa pagpahinungod sa akong kinabuhi kang Jehova milabaw sa tanan nga sukad akong nasinati sa panahong ang mga konsiyerto maoy labing bililhon alang kanako. Dakong kalipay ug pribilehiyo ang pagtabang sa daghan pang katawhan sa pagkaila sa matahom nga ‘tingog sa kamatuoran,’ nga labi pang malungtaron kay sa ‘tingog sa honi.’ Gawas sa pagsangyaw nga regular diha sa kabalayan sa katawhang interesado ug gikan sa entablado, ang daghan kong katungdanan ingong ansiano sa Kristohanong kongregasyon nakapapuliki kanako ug nagpuno sa akong kinabuhi sa mapuslanong kalihokan. Sa kamatuoran, ang akong propesyon sa kinabuhi nausab ug dako. Ang akong musikal nga kalihokan nabutang sa iyang hustong dapit sa akong kinabuhi, sanglit ako karon “nagapangita pag-una sa Gingharian.”—Mateo 6:33.

Giunsa namo pagkabuhi nga wala ang akong karera sa pangonsiyerto? Sulod sa pila ka tuig ako nag-alagad nga propesor sa Faculty in the Arts Institute. Sa 1977 ako napili nga moapil sa hunta sa lima ka maghuhukom panahon sa usa ka internasyonal nga bangga sa pagtokar sa sista sa Pôrto Alegre, Brazil. Sa samang panahon ako nagdumalag mga klase sa International Seminary of Music didto.

Sa 1980 kami mibalhin ngadto sa Espanya diin ako karon nagahatag ug pribadong mga leksiyon sa pagtokar sa sista. Niining paagiha ang akong sista nagatabang sa pagbuhi sa akong asawa ug kanako sa among pag-alagad kang Jehova. Matag karon ug unya ako nakahimog honi sa pagdayeg kang Jehova pinaagi sa pagkahimong bahin sa orkestra nga gamiton panahon sa Kristohanong mga asembliya. Dili na mistil pang isulti, panahon sa Kristohanong mga sosyal nga katigoman ako makakablit sa akong sista nga pulog kuwerdas, ug ang akong mga higala daw nagakalipay niana.

Sa bag-ong sistema sa mga butang, nga ipatungha sa duol na sa Diyos, aduna unyay daghang panahon sa pag-ugmad sa kinaiyanhong mga katakos ug mga hiyas sa tugob nga kalipay ug kahimuot sa Diyos ug sa tawo. Ang lawasnon ug mental nga kahingpitan uban ang kinabuhing dayon motugot nga kita makakab-ot sa mga tumong ug mga kahimoan nga dili hisabtan o mamugna karon. Ang musika sa Bag-ong Kahikayan magadayeg sa Maglalalang, dili maghimaya sa musikero o sa kompositor.

Ang akong pagbati maoy sama sa iya sa salmista ug musikero-kompositor si David, kinsa miingon: “Magpatugbaw kamong malipayon, O kamong mga matarong, tungod kang Jehova. Sa bahin sa mga matul-id angayan ang pagdayeg. Magpasalamat kang Jehova diha sa alpa; diha sa tulonggon nga napulo ug kuwerdas manag-awit kamo kaniya. Pag-awit alang kaniya sa usa ka bag-ong awit; buhata ang inyong maarangan sa pagtugtog sa mga kuwerdas duyog ang malipayong paghugyaw.” (Salmo 33:1-3) Ako nagapaningkamot sa pagbuhat sa akong maarangan sa pagdayeg kang Jehova diha sa pagsangyaw ug sa pagtugtog sa akong sista nga napulog kuwerdas.—Sumala sa giasoy ni Herman Pizzanelli.

[Letrato sa panid 20, 21]

Ako tigpasundayag sa TV . . .

. . . Karon ako nagatugtog alang sa akong mga higala