Gikan sa Among mga Magbabasa

Herpes

Akong nabasa ang inyong artikulo mahitungod sa herpes (Pebrero 8, 1985 sa Cebuano) ug nahibulong ako nganong wala ninyo hisgoting ang herpes moatake dili lamang sa mga tawong imoral. Ako gisusi alang sa herpes una sa usa ka operasyon, ug bisan pag ako wala makabatog mahilayong mga relasyon sa sekso, ang pagsusi positibo.

C. D., Michigan

Oo, ang usa makakuhag genital herpes bisan pag dili imoral. Kining puntoha gipamatud-an sa mga potnot sa among mga artikulong gihisgotan sa ibabaw, sa mga panid 4 ug 7. Apan ang genital herpes malangkobong ipasa sa seksuwal nga relasyon, ug gituohang ang kaylap nga pag-uswag niining sakita maoy tungod sa dakong pag-uswag sa seksuwal nga pagkamahilayon sa katuigang bag-o pa.—ED.

Kasinatian sa Dachau

Ako nalisang sa artikulong “Gikan sa Kamatayon Ngadto sa Kinabuhi sa Dachau.” (Hulyo 8, 1985 sa Cebuano) Palihog ayaw iapil ang mga bahing klarong seksuwal, matang sa pagsakit (kataposang parapo sa panid 17) ug ayaw na intawon ninyo hisgoti ang ingon pag-usab.

K. F., California

Kami mouyong angay dili namo ipatik ang materyal nga tin-aw kaayo sa seksuwal diha sa among magasin. Ugaling, wala namo isipa ang kataposang parapo sa panid 17 ingong tin-aw sa seksuwal nga paagi. Tinuod, ang parapo mubo, apan kini mosangko sa kusganong puntong makatudlo sa sunod parapo. Kon kadtong batan-ong babaye nakalabang sa kasinatian, tinong kita makalabang sa asoy niana. Ang Bibliya labi pang tin-aw sa pila ka kahimtang.​—ED.

Gibati ko ang daghan kaayong emosyon samtang ako nagbasa: simpatiya, kasuko, kalipay. Sa akong nabasa ang bahin sa mga kapintasang iyang gisud-ong nga giantos sa iyang inahan, ako mihilak. Ang iyang estorya naglig-on kanako. Ako malipayon kaayo sa resulta sa maong kasinatian, malipayon kaayong siya karon dunay talagsaong kaugmaon nga paaboton. Ang iyang panig-ingnan sa tinamdan tinong angay sundogon. Salamat sa pagpatik sa maong kahibulongang artikulo.

J. F., Illinois

Koryente

Nahimuot ako sa inyong artikulo bahin sa koryente (Hulyo 22, 1985 sa Cebuano), apan dili ba angay ang kabatbatan ug ilustrasyon sa panid 27 magsaysay nga mohatag kalainan ang paagi sa pagkonektar sa mga alambre sa koryente? Ang pagkonektar kanilang paatras makapahinabog pila ka suliran.

C. P., Florida

Dili tuyo niadto nga maghisgot sa detalye. Ang kolor gibutang sa usa ka alambre sa pagpalahi niadto sa laing alambre diha sa bugkos, apan kana mahimong makapahisalaag. Sa pagpahiuyon sa kalagdaan sa U.S. National Electrical alang ning tipoha sa tulog-alambreng plug, ang neyutral nga alambre, nga puti, angay ikonektar sa lapad nga sulab nga gipakita sa tuo sa maong ilustrasyon. Ang maong sulab gimarkahag “white” o dunay tornilyong salapi o hilaw sa kolor. Ang itom o dugom-ug-kolor nga alambre angay ikonektar sa laing lapad nga sulab. Ang berde lang o berde-ug-dalag-badlisbadlis nga ground wire angay ikonektar sa linging ground pin nga gipakita sa atubang. Kini mopasalig sa labing dakong pagkaluwas. Ang ubang nasod duna say naandang mga batasan sa pagkonektar sa alambre, nga angay usab sundon.​—ED.