Gibuksan Pag-usab sa Pagduaw sa Papa ang Daang mga Samad

SA PANAHON sa pagduaw sa papa sa Alemanya sa miaging Mayo, iyang gihisgotan “ang kalisdanan nga giatubang sa Iglesya sa panahon sa Nazi.” Gitaho kini sa Kölner Stadt-Anzeiger, ug unya midugang: “Wala niya hisgoti nga ang ubang iladong mga klerong Katoliko talawan, nagsermon nga nagasuportar sa relihiyosong mga eskuylahan apan dili batok sa paglutos sa mga Hudiyo.”

Ang mga rituwal sa pagkahimo kang Edith Stein nga biyata—usa ka Hudiyo nga nakombertir sa Katolisismo—nahimong dugokang punto sa kontrobersiya. Mitutol ang mga Hudiyo nga ipasundayag siya ingong Katolikong martir. Ang Nürnberger Nachrichten miingon: “Gihimong biyata si Edith Stien ingong martir alang sa Kristohanong pagtuo, apan dili gayod kini tinuod. Siya gihatod sa iyang kamatayon diha sa gas chamber sa Auschwitz sa 1942 ingong Hudiyo, dili usa ka Katolikong madre.” Miingon ang usa ka Katolikong pundok nga ang paghimo kaniyang biyata maoy pagsulay sa pagtabon sa “makauulawng kahilom sa Katolikong Iglesya human nga mitungtong sa gahom ang Nazi.” Laing grupong Katoliko miingon nga ang pagkahimo kaniyang biyata “dili angay mopabuta kanato sa kamatuoran nga wala mosupak ang mga obispong Katoliko, apan bukas hinoong mitabang sa sistema sa Nasodnong Soyalista.”

Ang ubang mga kritiko nagapangayo nga dawaton sa Katolikong Iglesya ang sala sa pagpakahilom sa panahon sa Holocaust, apan walay usa ang midawat. “Sa panahon sa iyang meting uban sa mga obispo sa miaging gabii,” ang taho diha sa Süddeutsche Zeitung miingon, “mainampingon kaayo ang papa sa pagtandog niining tunoka diha sa konsesnsiya sa iglesya. Sa panahon sa pagkadiktador sa Nazi, naningkamot ang Apostolic See pinaagi sa usa ka kasabotan ‘sa pagsanta sa labing grabe’ apan ‘wala makasumpo sa malaglagong mga hitabo.’ Ang papa miingon nga wala siyay nakitang rason sa pag-akusar sa obispong mga Aleman nga sad-an tungod sa ilang pagpakahilom.”