Mga Rekording nga Nagahatag Pagdayeg kang Jehova

“ANG usa ka adlaw nga gigugol sa Bethel nga nagatugtog ug musika katumbas sa usa ka libo nga gigugol sa laing dapit.” “Giisip ko kini nga kinalabwang musikal nga pribilehiyo nga nagalungtad sa pagkakaron.” “Gibati ko nga usa ka kadungganan nga gamiton ang mga hiyas nga maluluy-ong gihatag ni Jehova kanako aron madani unta ang uban sa kamatuoran pinaagi sa musika.” Kini maoy pipila sa mga komento gikan sa propesyonal nga mga musikero, mga Saksi ni Jehova, nga nagboluntaryo sa ilang panahon ug kahago sa paggamag musika pinaagi sa usa ka linaing orkestra.

Nganong kining mga musikeroha moboluntaryong walay bayad sa ilang mga hiyas sa dihang makahimo sila sa samang matang sa trabaho aron makasapi? Ato silang patubagon sa ilang kaugalingon. Si Jim nagtugtog ug double bass sa 22 anyos uban sa New York Philharmonic orkestra. Siya mipahayag: “Gibati ko nga dako kaayong pribilehiyo ang pag-anhi sa hedkuwarter sa kalibotan sa mga Saksi ni Jehova ug pagrekord ug musika.” Si Joe, biyolinista ug gitarista, nakarekord ug musika sa propesyonal nga paagi. Kini ang iyang gibati: “Kini tubag sa akong mga pag-ampo nga magamit ako ni Jehova uban sa bisan unsang akong nabatonan.” Si Harold, usa ka pianista, nakabatog daghang maayong pribilehiyo nga may responsabilidad ingong ministro sa mga Saksi ni Jehova. Gibutang niya kanunay ang iyang propesyonal nga karera sa musika nga ikaduha sa iyang ministeryo. Siya nag-ingon: “Ang pagrekord ug musika alang sa mga Saksi ni Jehova maoy usa sa labing makalingawng mga pribilehiyo nga akong nabatonan sa organisasyon ni Jehova.”

Niining mga adlawa nga ang rekording nga negosyo maoy maindigon sa labihan, multimilyong-dolyar nga industriya, daw lisod motuo ang pipila nga ang 60 ka tawo magkatigom aron sa pagrekord ug musika sa upat ka adlaw nga dili makadawat ug bayad nga salapi ug sa kaugalingon pa nilang gastos! Ugaling, ang esponsor niining proyekto sa rekording mao ang Watchtower Society—ang dili-komersiyal nga organisasyon nga nagapatik niining magasina. Ug ang tanang nalangkit sa orkestra—gikan sa batonero ngadto sa teknisyan—maoy ministro sa mga Saksi ni Jehova. Ang motibo nila sa paghago? Ang paghatag pagdayeg sa Diyos.

Gikan sa Pag-imprenta Ngadto sa Rekording

Apan, sa unsang paagi ang Watchtower Society—nga ilado sa mga kalihokan niini sa pag-imprenta—nalangkit sa paggamag mga rekording? Niadtong 1966 gihikay sa Sosyedad ang usa ka dula sa Bibliya nga ang biste iya sa maong panahon nga ipasundayag sa tinuig distritong mga kombensiyon niini. Ang maong pagdula sa karaang mga hitabo sa Bibliya gikahinangpan kaayo nga ang susamang mga presentasyon nahimong regular nga mga bahin sa maong mga kombensiyon.

Niadtong panahona, ang unang mga dula sa Bibliya gipasundayag sa aktuwal. Sa ulahi, gihukom nga ang narekord nang mga teyp mahimong gam-on aron idugang ang musika ug mga tingog sa mga presentasyon. Sa ingon, ang mga aktor diha sa entablado yanong magsundog sa mga tingog sa hilom sa mga tingog nga narekord na diha sa teyp. Ang Sosyedad daghag trabahante sa Brooklyn nga kakuhaan sa pagtagana sa mga aktor ug mga teknisyan, ug natukod ang usa ka rekording studio. Apan sa dihang gihukom sa ulahi ang paggamag orihinal nga musika alang sa maong mga dula, mitungha ang usa ka bag-ong hagit.

Paghikay sa Usa ka Orkestra

Nagsugod ang pagpangita sa mga kompositor ug mga musikero taliwala sa mga Saksi ni Jehova sa Amerika del Norte nga andam mohatag sa ilang panahon ug mga hiyas aron sa paggamag Kristohanong musika. Latas sa katuigan, ang orkestra sa Watchtower mitubo ngadto sa halos simponikong gidak-on—60 ngadto 70 ka boluntaryo. Ang pipila kanila maoy propesyonal nga mga musikero. Bisan pa niana, isugilon nila kanimo kon unsa ang panguna nilang propesyon. Si David nagtugtog ug cello uban sa Denver symphony orkestra sulod sa ubay-ubay nang katuigan. Ang iyang panglantaw sa industriya sa musika naapektahan sa kamatuoran sa Pulong sa Diyos. Mipahayag siya niana niining paagiha: “Gipaubos ko ang akong personal nga ambisyon ug tinguhang mouswag diha sa kalibotan sa musika. Ako nalipay nga makabuhi sa akong pamilya ingong musikero ug may panahon usab sa pag-ambit sa bug-os-panahong ministeryo.”

Ang hunahuna usab ni John, sumala pa niya, “nausab ug dako. Bisan pag nagtrabaho gihapon ako sa Broadway nga manunugtog sa bass sa dihang nabawtismohan ako ingong Saksi ni Jehova, nakita ko nga lisod ang pagtimbang sa akong gugma kang Jehova ug sa akong gugma sa musika. Nadiskobrehan ko nga ang industriya sa musika maoy usa ka agalon. Dili ako makahatag sa tibuok kong kalag kang Jehova diha sa buluhaton sa pagsangyaw sa dihang nasayod ako nga kinahanglang motugtog ako sa musika sa magabii. Daghan usab ang kahigayonan sa pagkompromiso sa atong pagtuo. Busa misugod ako sa bug-os-panahong ministeryo.”

Halos 50 sa mga apil sa mga proyekto sa pagrekord ug musika sa Sosyedad, apil ang mga tigkopya sa musika ug mga teknisyan, nagaalagad sa lokal nga mga kongregasyon sa mga Saksi ni Jehova ingong mga ansiano o ministeryal nga mga alagad. Mga 35 nakaarang sa pagdeboto sa bug-os nilang panahon sa ministeryo, apil ang pag-alagad sa Brooklyn Bethel ug sa Watchtower Farms.

Niadtong 1980 ang Sosyedad nagpauswag sa buluhaton niining linaing orkestra. Ang mga binag-ong dagway sa mga awit nga gigamit sa mga Saksi ni Jehova ingong makalipayng bahin sa ilang pagsimba gigam-an ug mga cassette teyp. Ang mga delegado sa 1980 distritong mga kombensiyon nalipay sa pagluwat sa Kingdom Melodies No. 1—ang una sa serye sa mga teyp sa musika nga gigama sa Watchtower orkestra alang sa pagdayeg kang Jehova.

Si Tom, usa ka propesyonal nga musikero sa daghang katuigan, nalangkit sa mga proyekto sa Sosyedad sa rekording sa musika sa miaging 15 anyos. Siya mipahayag: “Matuod nga ang among paningkamot dili makatumbas sa kon unsay mahimo sa musikal nga paagi sa propesyonal nga symphony orkestra. Apan ang tingali kulang namo sa kasinatian tinong gibakwi sa kasibot ug kadasig.” Si Sallie may katuigan nga kasinatian ingong propesyonal nga biyolinista. Gipabilhan niya “ang espiritu sa kooperasyon nga nagalungtad dinhi nga dili hitupngan sa kalibotan.” Si Bill, usa ka retiradong manunugtog ug percussion, nagsuma niini, nga nag-ingon: “Ang orkestra sa gihapon dili New York Philharmonic sa kalidad, apan sa akong hunahuna maayo ang among nahimo. Gusto ko kini! Maikagon kong gipaabot ang matag sesyon sa pagrekord.”

Mga Dula ug mga Pagbasa sa Bibliya

Ang mga tingog alang sa mga dula sa Bibliya girekord diha sa mga studio sa Sosyedad. Ang mga trabahante sa hedkuwarter sa Brooklyn nagasilbing mga aktor ug mga aktres. Ang mga esena sa dula girekord nga separado ug unya giedit nga tingob. Sa kataposan, gidugang ang mga tingog ug musika.

Sukad sa 1978 ang pasilidad sa rekording sa Sosyedad gigamit pa sa laing paagi—ang pagrekord sa Balaang Kasulatan. Latas sa katuigan, sukad sa unang pagluwat sa cassette sa The Good News According to John, ang tibuok Bibliya girekord na. Karon ang tanan nga may igdulongog makapahimulos sa Pulong sa Diyos.

Sa unsang paagi gigama ang maong mga rekording? Motan-aw kita sa usa ka sesyon sa rekording. Usa ka ordinadong ministro sa mga Saksi ni Jehova nagbasa gikan sa New World Translation of the Holy Scriptures. Aron tabangan siya sa paghatag kahulogan sa pagbasa ug pag-atiman pag-ayo sa kalidad sa rekording, adunay tulo pa nga naglingkod sa luyo sa usa ka soundproof nga bentana sa kontrol nga kuwarto—ang inhenyero, nga nagapaandar sa rekording console sa pagtino nga ang kasangkapan nagaobra sa tukma; ang tigsunod, nga nagasusi pag-ayo sa pagbasa alang sa tukmang unod; ug ang direktor, nga nagahatag ug makatabang nga giya bahin sa paglitok ug mga hiyas sa sinultihan ngadto sa magbabasa.

Samtang kining tulo puliki sa pagrekord, ang usa ka editor nagawagtang sa mga kalangas sa pagpakli sa panid ug ubang dili-kinahanglang mga tingog gikan sa nangaging mga rekording pinaagi sa pagputol sa pisikal sa narekord nga teyp pinaagig labaha. Unya ang usa ka proofreader mamati pag-ayo sa kataposang bersiyon aron sa pagtino nga walay nalaktawan.

Ang paggamag mga teyp sa musika, dula, Watchtower, ug pagbasa sa Bibliya maoy dakong trabaho, apan ang mga sulat gikan sa tibuok kalibotan nga nagpahayag apresasyon sa maong mga teyp nagapaila nga kini takos sa kahago. Nakabaton ka ba sa oportunidad sa pagpahimulos niining linaing mga rekording? Ang mga magpapatik niining magasina malipay gayod sa pagtabang nimo sa pagbaton niini. Kon buot sabton, sila dili lamang nagatagana kanimo sa instruksiyon ug kalingawan. Sila nagahatag ug pagdayeg kang Jehova mismo.

[Mga hulagway sa panid 25]

Ang propesyonal Saksing mga musikero nagasalmot sa tanang seksiyon sa orkestra

[Hulagway sa panid 26]

Ang lainlaing mga seksiyon sa orkestra nag-ipon aron magama ang musika nga girekord sa studio sa Watchtower