Unsaon Paghimog Popular nga Awit?
SA INDUSTRIYA sa musika paspas kaayo ang kausaban ug grabe ang kompetisyon. Ang gusto sa mga tawo nga musika mag-usab-usab, ang popular nga mga awit dali rang madaan, ug motungha ang bag-ong mga uso ug bag-ong mga teknolohiya. Ang mga promoter “kanunayng mangita ug labing popular nga bag-ong awit,” nag-ingon ang eksperto sa social media nga si Kelli S. Burns. Apan dili sayon ang paghimo nianang maong “awit” nga popular. “Daghang batan-on ang nangandoy nga mahimong sikat nga mag-aawit, . . . apan sagad nga lisod kaayong makakuhag kontrata sa mga record company,” nag-ingon ang usa ka manuwal labot sa industriya.—Tan-awa ang kahong “Mga Kausaban sa Industriya sa Musika,” sa panid 6.
Pagsulat sa Liriko
Maoy tumong sa mga kompositor (1) ang pagsulat ug mga liriko nga makatandog sa emosyon sa tawo—nga makapahunahuna kanila bahin sa ilang mga panahom, pangandoy, ug pagbati. Unsa ang labing popular nga tema? Husto ka—ang gugma. Ang mga kompositor maningkamot usab sa pagkomposog mga awit nga makadani ug daling mahinumdoman.
Dayon, ang kompositor magrekord ug sampol sa maong awit. Kon ang kadagkoan sa record company maghunahuna nga mosikat ang maong awit, mahimong tanyagan nila siya ug recording contract (2). Pero kon sila may pagduhaduha kaniya (tingali tungod kay dili siya ilado), mahimong paliton nila ang awit ug ipakanta kana sa usa ka sikat nga mag-aawit.
Sa Studio
Aron madumala ang proseso sa pagrekord (3), ang mga record company sagad mokuhag eksperyensiyadong prodyuser. Siya maoy mopili sa estilo sa awit ug moaprobar sa final recording niini. Siya usab ang mangita ug modumala sa recording studio, music arranger, tigkopya, musikero, backup nga mga bokalista, recording engineer, ug kasangkapan nga gikinahanglan sa pagpatunghag dekalidad nga musika nga magustoan sa mga tawo.
Ang kadaghanang awit anam-anam nga irekord, nga sagad magsugod sa tambol, sista, baho, ug keyboard. Sa ulahi, idugang ang lead vocal, harmony, instrumental solo, ug ang mga special sound effect aron makapatunghag master digital recording (4).
Pagbaligya
Aron i-promote ang usa ka awit, ang mga record company sagad maghimog music video (5). Pinaagi niining tulo ngadto sa lima ka minutos nga video, makita ug madungog sa mga tawo ang mga mag-aawit. Mahimong mokita usab niini ang record company.
Mas daghang album sa recording artist ang mabaligya sa mga dapit diin sila maghimog live performance (6). Busa ilang i-promote ang ilang bag-ong album pinaagig mga tour ug mga konsiyerto. Kadaghanan kanila dunay kaugalingong Web site (7) nga may sampol sa ilang mga awit, letrato, video, blog, balita bahin sa ilang umaabot nga konsiyerto, ug mga link sa ilang fan club ug, labaw sa tanan, sa mga music store sa Internet.
Kang kinsa magdepende ang pagkahimong popular sa usa ka awit? Oo, kanimo—ang mamiminaw. Nan, unsay imong basehan sa pagpilig musika? Ang honi ba o ang mag-aawit, o ang imong mga prinsipyo? Importante kining mga pangutanaha kay ang musika gamhanan ug makaimpluwensiya gayod kanato. Kini makapahinumdom kanato sa hinungdanong tambag sa atong Maglalalang: “Labaw sa tanan nga pagabantayan, ampingi ang imong kasingkasing, kay niana nagagikan ang mga tuboran sa kinabuhi.”—Proverbio 4:23.
Sa unsang paagi nimo masunod kining maalamong tambag maylabot sa musika? Kon ginikanan ka, unsaon nimo pagtuman ang imong responsibilidad sa pagpanalipod sa imong mga anak batok sa espirituwal, mental, ug emosyonal nga kadaot?
[Kahon sa panid 6]
Mga Kausaban sa Industriya sa Musika
Ang Internet ug ang baratong mga himan ug software sa pagrekord nakaamot sa kausaban sa industriya sa musika. Karon, ang mga music artist makarekord ug dekalidad nga musika diha sa balay ug makaapod-apod niana sa tibuok kalibotan. Sumala sa magasing The Economist, “daghang sikat nga mga artist nagrekord ug nag-apod-apod sa ilang mga awit nga wala na moagig record company.”