Gihimoag Taytayan sa Japan ang mga Isla Niini sa Dagat

Sinulat sa korespondal sa Pagmata! sa Japan

ANG pagtabok sa Seto Inland Sea sa Japan pinaagig barko moabot niadto ug usa ka oras. Apan sa Abril 10 sa miaging tuig, ang Seto Ohashi Bridge gibuksan, nga nagsumpay sa duha ka dagkong mga isla sa Japan, ang Honshu ug Shikoku. Ang pagmaneho sa tabok sa Interyor nga Dagat karon wala ray diyes minutos.

Apan, kining maong taytayan mahal. Ang bayad sa pag-agi sa taytayan maoy 5,500 ka yen (mga $45) kada agi. Apan gamay ra kana kon itandi sa bug-os nga gastos: 1,130 ka bilyong yen (8.7 bilyong dolyar) ug 17 ka kinabuhi. Lain pa, ang pagtukod miabot ug duolan sa napulo ka tuig, o nuybe ka milyong mga adlaw sa pagtrabaho sa tawo. May maayo gayod nga mga katarongan alang ning dako kaayog gastong taytayan.

Alang sa usa ka butang, ang transportasyon ning duha ka isla wala na masandig sa kaluoy sa dili-matag-an nga klima. Sa 1955 usa ka lantsa nalunod, ug 168 ka kinabuhi ang nangawala. Dugang pa, ang taytayan giisip nga panalangin sa ekonomiya sa agrikultural nga Isla sa Shikoku karon nga nasumpay na ang Honshu, nga mao ang labing dakong isla sa Japan. Sa 380 ka yen (hapit $3) kada tawo, ang tren mao ang baratong paagi sa pagtabok.

Bisag giisip ingong usa ka taytayan, kini sa aktuwal maoy 9.4 ka kilometrong gitas-on sumpay-sumpayng mga taytayan ug mga agianan ibabaw sa lima ka isla tabok sa Seto Inland Sea. Kini dunay tulo ka suspension bridge, duha ka cabled-stayed bridges, usa ka truss bridge, ug viaducts nga nagsumpay niini. Ang usa sa mga suspension bridges, ang Minami Bisan-Seto Ohashi, mao ang labing taas dos-andanas nga taytayan sa kalibotan nga agian sa trapiko sa tren ug sa haywey.

Si Gn. Tetsuo Yamane sa Honshu-Shikoku Bridge Authority sa Tokyo mihatag pila ka makaikag nga katin-awan sa pagtukod. Siya nagtrabaho sa proyekto sa taytayan sulod sa 13 ka tuig ug magtatan-aw sa konstruksiyon alang sa haligi sa taytayan.

“Labing malisod sa tanan,” miingon si Gn. Yamane, “mao ang pagbutang sa mga haligi sa ilalom sa dagat. Pinaagi sa pagbomba sa hanig nga bato sa ilalom sa dagat nabungkag ang mga bato ug gikalot ang hanig sa bato pinaagig grab dredger. Dayon, ang caissons, o mga kahonkahon, nga sama ka dako sa napulo ka andanang mga tinukod nga gihimo diha sa baraderohan, giguyod ngadto sa luna sa gitukoran, ug gipatidlom sa tubig. Among gibutangag mga bato ang mga caisson ug gibubo ang semento diha niana, gigamit ang bag-ong nahumang barge nga tigmasag semento nga gitawag Century.”

Ang mga trabahante nagtrabaho sa ilalom sa malisod kaayong mga kahimtang. “Ang mga haligi giugbok ilalom sa tubig, mga 160 ka piye sa ilalom,” miingon si Gn. Yamane. “Dugang pa niana, kusog kaayo ang sulog sa luna sa gitukoran, sa gikusgong lima ka knots. Katumbas kini sa pagtrabaho diha sa 160 ka milya por ora nga hangin. Ang gikalotan ug ang giugbok sa ilalom sa tubig nga mga caisson kinahanglang inspeksiyonon samtang linaw pa ang sulog. Apan dili klaro ang mga butang diha sa tubig. Sa 30 ngadto sa 70 ka piye lang sa ilalom sa tubig, halos wala kay makita. Pinaagi sa pagdalag suga sa ilalom sa tubig aron mahayagan ang mga lugar nga kinahanglang inspeksiyonon, among kuhaag mga hulagway ug mga video gikan sa gilay-ong 20 ka pulgada.”

Sanglit ang taytayan nahimutang man sa Seto-Inland Sea National Park, ang katibuk-ang pagkaangay sa taytayan uban sa nagalibot nga talan-awon gitagad. Ang porma sa “tibuok nga tanaman maoy estilong Hapones nga may mga batong tikanganan,” miingon si Propesor Toshiaki Ohta, nga nagtrabaho sa pagdesinyo sa taytayan.

Ang pagpaangay sa laing matang nakab-ot usab. Sa miaging Marso ang Seikan Tunnel sa ilalom sa tubig gibuksan, nga nagsumpay sa Hokkaido, isla sa layong amihanang bahin sa Japan paingon sa Honshu. Karon, uban sa pagbukas sa Seto Ohashi Bridge, ang kataposang taytayan nga nagsumpay sa upat ka dagkong mga isla sa Japan, ang Hokkaido, Honshu, Shikoku, ug Kyushu, human na. Busa natuman ang dugay nang gidamgo sa mga Hapones.