Matahom nga mga Parke sa Kalibotan

New Zealand

Ang Fiordland National Park, ang kinadak-an sa New Zealand, gihimo niadtong 1904. Makita dinhi ang matahom nga lapyahan sa baybayon, hataas nga kabukiran, mga lanaw, mga suba, mga busay, mga lasang, ug yelo. Nadiskobrehan dinhi niadtong 1948 ang dili makalupad nga takahe, nga gituhoan nga napuo na.

KENYA

Ang Nairobi National Park makita sa ganghaan sa kabisera sa nasod, mga pipila ka minuto lamang nga pagbiyahe gikan sa sentro sa siyudad sa Nairobi. Kini nagtanyag sa mga talan-awon sa mga buffalo, zebra, giraffe, wildebeest, mga ostrich, rhinocero, ug tulog nga mga liyon, nga dili matugaw sa presensiya sa mga bisita.

T.B.A./CANADA

Ang Waterton Lakes National Park, diin ang kabalilihan nagtagbo sa kabukiran, gihimo niadtong 1895, ug ang Glacier National Park niadtong 1910. Tungod sa awhag sa daghan, kining duruha ka parke gihiusa niadtong 1932 ingon nga Waterton-Glacier International Peace Park, ang nahauna sa matang niini. Makita sa mga parke ang talagsaong talan-awon, nga nagkabayo sa Utlanan sa Kontinente. Ang oloabohong mga oso, itom nga mga oso, dakog-sungay nga mga karnero, mga kanding sa bukid, mga moose, ug cougar mihimo niining utlanang parke nga ilang puy-anan, uban sa mulang usa, putig-ikog nga usa, ug mga elk.

BRAZIL/ARGENTINA

Ang Iguaçú National Park, sa pagkamatuod, duruha ka parke; ang parke sa Argentina gihimo niadtong 1909, ug ang kasikbit nga parke sa Brazil niadtong 1939. Ang nabantog sa kalibotan nga Iguaçú Falls hataas pa kay sa Niagara Falls ug halapad pa kay sa Victoria Falls sa Aprika. Ania usab dinhi ang pipila sa labing labong, matahom nga mga talamnon nga makaplagan bisan diin sa kalibotan.

HAPON

Ang Nikko National Park naglakip sa dakong dapit sa mga lanaw, mga busay, mga tagaytay, ug mga bukid ug malarawanon sa talan-awon sa Hapon. Kini ang puloy-anan sa protektado Hapones nga serow, o goat antelope. Ubang mga mananap sa parke mao ang Hapones nga itom nga oso ug ang Hapones nga macaque, o mubog-ikog nga unggoy.