Gikan sa Among mga Magbabasa
Greenhouse Effect Ang kahikayan ug desinyo sa mga artikulo bahin sa greenhouse effect (Septiyembre 8, 1989) maayo kaayong pagkahimo nga buot nimong ipadayon ang pagbasa. Ang paggamit sa mga letrato ug mga kahon naghatag nimo sa pagbati nga ikaw may panahon gayod sa pagbasa niini, nga kasukwahi sa tibuok nga mga panid sa letra. Akong nadiskobrehang dili ko buot ibutang ang magasin hangtod nga kini akong mahuman. Ingong resulta, buot kong ipaambit ang mga unod niini sa uban.
G. G., Tinipong Bansa
Ang pagsulat, arte, ug potograpiya miuswag—nga ang kadaghanan sa dako kaayong paagi. Kami nahingangha ilabina sa “Greenhouse” nga Pagmata! Nakabasa kamig ubay-ubayng dili maayong pagkasulat nga mga artikulo bahin sa samang mga ulohan diha sa mga magasin ug mga mantalaan nga wala magpatin-aw sa mga butang diha sa mga pulong nga hisabtan sa kadaghanang tawo. Pagkatagsaong galamiton kini nga isyu alang sa pagpakigsulti sa mga tawo dinhi sa init nga habagatang California!
Gn. ug Gng. J. P. M., Tinipong Bansa
Makalilisang nga Tuboran sa Organo Ang Pagmata! ikasubong nagsubli sa usa ka waypasikaranang hungihong, nga hisabtan sa kamatuoran nga daw ang Uropanhong Parliamento naghatag sa pagtugot niining mga tahoa. Kining mga hungihonga nakadaot sa makitawhanong hinungdan sa pagsagop.
T. L., U.S. Information Agency, Tinipong Bansa
Ang Marso 22, 1989, nga artikulo sa “Pagmata!” nga nag-ulohang “Makalilisang nga Tuboran sa Organo” gibase sa usa ka resolusyong gipatik sa Uropanhong Parliamento, usa ka katuohang organisasyon. Ugaling, ang maong organisasyon karon nagaingon nga kini nabiktima sa sayop nga impormasyon. Ang “Pagmata!” nagsusi na sa butang ug nahibalo nga bisan tuod may ubay-ubayng nahimantala pag-ayong mga pagdakop sa Guatemala tungod sa pagbaligyag bata niadtong 1987, walay pamatuod nga ang mga bata ginabaligya alang sa mga pagbalhin sa organo. Hinunoa, ang orihinal nga mga taho nagaingon nga ang mga bata ginabatonan ug ginabaligya sa dili-legal nga paagi sa tuyo nga ipasagop.—ED.
Magpadayong Managhigala Ako 11 anyos ug buot kong pasalamatan kamo sa artikulong “Mga Batan-on Nangutana . . . Nganong Lisod Kaayong Magpadayong Managhigala?” (Septiyembre 22, 1989) May suod akong higala nga nagbale wala lamang kanako. Sa tabang sa inyong basahon, gihukom ko nga mangitag tinuod nga higala.
B. S., Australia
Down’s Syndrome Natandog kaayo ang akong emosyon sa pagbasa sa kasinatian bahin ni Suzy (Agosto 8, 1989) nga mihilak ako sa tibuok nga estorya. Gipasalamatan ko usab nga gihatagan kita ni Jehova sa talagsaong paglaom sa pagkabanhaw, kay ako nawad-an sa akong amahan sa kamatayon. Ang akong kasingkasing ug mga pag-ampo mahiadto sa pamilya ni Suzy.
B. E., Tinipong Bansa
Gi-recycle nga Papel Ang inyong isyu sa Septiyembre 8, 1989, panid 29, naundan sa usa ka makaiikag nga kasayoran bahin sa pag-recycle ug papel, nga pinaagi niana masumpo ang nagauswag-kanunay nga polusyon sa atong silinganan. Bisan pa niana, ang Bantayanang Torre o Pagmata! wala patika diha sa gi-recycle nga papel. Si bisan kinsang nagapasiugda sa pila ka sukdanan apan sa samang panahon nagagawing supak niana manganlan lamang nga usa ka maot.
F. S., Federal Republic of Germany
Ang na-recycle nga papel sa igong kalidad o igong gidaghanon nga mohaom sa among dinaghan nga pag-imprenta sa pagkakaron dili pa mabatonan. Sanglit ang na-recycle nga papel abot usab ug 20 porsientong mas mahal kay sa papel nga ginama sa orihinal nga lanot, pihong madugay pa una kini kasagarang gamiton para sa pag-imprenta nga dinaghan. Bisan pa niana, kon mahimo, ang biyang papel gikan sa among mga imprentahan ibaligya para ma-recycle. Ug ang igoigong gidaghanon sa na-recycle nga materyales gamiton usab sa paggamag mga hapin alang sa among gahig-haping mga basahon.—ED.