Gihukman Sumala sa Ilang Kaugalingong mga Pulong
NAGHAWAS sa tanang simbahan nga nag-angkong mga Kristohanon sa Uropa, 638 ka delegado ang nagtigom sa miaging Mayo sa Basel, Switzerland, alang sa Uropanhong Ekumenikal nga Asembliya sa “Pakigdait nga May Hustisya.” Ilang gisagop, pinaagi sa butos nga 94.5 porsiento, ang kataposang dokumento nga malantaw ingong gikauyonang dokumento sa Uropanhong Kakristiyanohan. Pasagdan nato nga tubagon niining dukomentoha ang pipila ka pangutana nga tingali atong ibangon. (Ang mga numero sa parentesis nagpasabot sa mga seksiyon sa dokumento.)
Kini bang mga iglesyaha nagasimba sa usa ka matuod nga Diyos, si Jehova, ug naghupot ug tukmang Kristohanong panaghiusa?
“Utang nato ang atong kinabuhi sa Diyos nga Maglalalang, ang tulo ka personang Diyos—Amahan, Anak ug Balaang Espiritu; kinsa sa iyang kaluoy nagpakita sa iyang kaugalingon ngadto sa katawhan diha kang Jesu-Kristo. Bisan unsa pay naglungtad nga mga kalainan sa pagtuo nga gituohan natong tanan.” (21)
“Ingong resulta sa bawtismo ug pagsanong sa pagtuo sa pagpamati sa pulong sa Diyos, kitang mga Kristohanon nausa na diha kang Kristo, bisan pag dili bug-os ang atong panaghiusa. Kita nagapaningkamot nga mabuntog ang mga kalainan sa naglungtad gihapon nga doktrina ug praktis aron makab-ot ang bug-os nga panaghiusa.” (39)
“Kita napakyas sa pagbuntog sa mga pagkabahinbahin taliwala sa mga iglesya ug sagad nagaabuso sa awtoridad ug gahom nga gihatag kanato aron palig-onon ang limitado ug mini nga panaghiusa sama sa pagpihig sa rasa, pagpihig sa sekso ug nasyonalismo.” (43)
Sila ba nagakinabuhi sumala sa ilang pangangkon nga mga sumusunod sa Prinsipe sa Pakigdait?
“Ingong mga Kristohanon kita nagatuo nga ang matuod nga pakigdait mabatonan pinaagi sa paglakaw uban kang Kristo, bisan tuod kita nagalikay sa pagsunod kaniya sa walay kataposan. Ang iyang pagsalikway sa kabangisan nagagikan niana nga gugma nga nagapangita bisan sa kaaway aron bag-ohon siya ug aron madaog ang pagdumtanay ug kabangisan. Kining gugmaha andam nga moantos sa aktibo nga paagi. Kini nagladlad sa daotang kinaiya sa buhat sa kabangisan, nga ginapanubag ang mga tawo nga nagagamit sa kabangis ug nagakabig sa kaaway ngadto sa usa ka relasyon sa pakigdait.” (32)
“Kita maoy nagpahinabo sa mga gubat ug napakyas sa paggamit sa tanang mga higayon sa pagpaningkamot nga mag-uliay ug maghusayay; atong gipalabay ug kanunay nga nagapakamatarong sa mga gubat.” (43)
“Ang panagbahin-bahin ug relihiyosong panagbangi adunay dakong epekto sa Uropanhong kasaysayan. Ang kadaghanan sa gubat maoy relihiyosong mga gubat. Minilyong mga lalaki ug mga babaye ang gisakit ug namatay tungod sa ilang mga pagtuo.” (48)
Sila ba nagsunod sa panig-ingnan ni Jesus sa pagsulti sa kamatuoran, pagpangita sa pagkamatarong, ug sa pagpakitag pagtahod sa kinabuhi ug sa kalalangan sa Diyos?
“Ang mga iglesya ug ang mga Kristohanon napakyas sa daghang bahin ug wala gayod magkinabuhi sumala sa mga sukdanan sa pagkatinawag sa Diyos usahay napakyas pa gani sa pagmantala sa kamatuoran ni Jesu-Kristo . . . Sa dugay na kaayong panahon kita nabutaan sa mga kahulogan ug sa kinahanglanon sa Ebanghelyo kon bahin sa hustisya, pakigdait ug kamatuoran sa paglalang.” (42)
“Kita napakyas sa pagpamatuod sa pag-amoma sa Diyos alang sa tanan ug sa matag usa ka linalang ug sa pag-ugmad ug usa ka paagi sa kinabuhing nagapadayag sa atong kaugalingong-pagsabot ingong bahin sa kalalangan sa Diyos.” (43)
Sila ba wala mahibalo sa hinungdan sa mga suliran sa kalibotan?
“Unsa ang mga hinungdan sa mga hulga nga atong giatubang karong adlawa? . . . Ang tinuod nga mga hinungdan . . . kinahanglang pangitaon diha sa kasingkasing sa katawhan, diha sa tawhanong mga tinamdan ug mga kaisipan.” (18, 19)
“Ang kahimtang nga atong nahimutangan karong adlawa sa pagkamatuod nagagikan sa kamatuoran sa atong pagsalikway sa mga dalan sa Diyos.” (41)
Bisan pa nga gidawat kini, gitalikdan ba nila ang pagmando sa tawo ug nagbutang sa ilang pagsalig diha sa natukod nga Gingharian sa Diyos?
“Ang tulo ka hinungdanon ug bililhong kaugmaran nagkinahanglan ug linaing pagtagad: ang kauswagan sa Sidlakan-Kasadpang mga relasyon diha sa CSCE [Conference on Security and Cooperation in Europe] nga paagi; ang demokratikanhong mga reporma sa Unyon Sobyet ug sa ubang Sidlakang kanasoran sa Uropa; ang paagi sa Pagpausa sa Kasadpang Uropa (Single European Act, nga ipatuman sa sinugdanan sa 1993).” (51)
“Ang internasyonal nga gambalay sa Hiniusang Kanasoran kinahanglang himoon nga labi pang epektibo. Sila nakapamatuod nga sila nakatabang sa pagsulbad sa rehiyonal nga mga kasungian, sa pagtabang sa mga paningkamot sa daghang kanasoran sa pag-uswag, sa pag-atiman sa mga suliran sa palibot. Busa, adunay panginahanglan alang sa mga gobyerno sa kalibotan sa pagpadako sa ilang pagpaluyo sa Hiniusang Kanasoran ug sa paghimo sa ilang pagpaluyo nga makita.” (83)
Aduna bay timailhan nga sila magausab sa ilang polisa sa pag-apil-apil sa politika sa haduol nga umaabot?
“Ang 1992 dugang motimaan sa ika-500 nga anibersaryo sa sinugdanan sa panahon sa Uropanhong kauswagan alang sa kadaot sa ubang katawhan. Kini nag-awhag kanato sa pagpaningkamot alang sa usa ka matarong ug makigdaitong relasyon tali sa kanasoran nga sakop sa Uropa ug tali sa Uropa ug sa ubang bahin sa kalibotan ilabina sa Tungang Sidlakan nga diin ang Uropa adunay dakong makasaysayanhong mga responsabilidad. Kami nag-awhag sa among mga iglesya nga paluyohan ang mga pakigbisog sa mga tawo sa Latin Amerika, sa Aprika, ug Asia alang sa katilingbanong hustisya, tawhanong dignidad ug sa pag-amping sa ilang palibot.” (84n)
Unsa ang prinsipyo sa Bibliya nga ikapadapat sa paghukom sa mga relihiyon nga naghimo niining kataposang dokumento?
Ang Mateo 12:37 nagaingon: “Pinaagi sa imong mga pulong ikaw igapahayag nga matarong, ug pinaagi sa imong mga pulong ikaw pagahukman sa silot.” (Tan-awa usab ang Lucas 19:22.) Nakab-ot ba sa Uropanhong Kakristiyanohan kining mga prinsipyoha? Ang iya bang mga pulong nagapahayag kaniya nga matarong, o kini ba nagahukom kaniya sa silot? Sumala sa mga pangutlo sa itaas, may mga pagduhaduha pa ba?
[Picture Credit Line sa panid 19]
Swiss National Tourist Office