Gikan sa Among mga Magbabasa

Tropikal nga Kalasangan Giatake Mihukom ako sa pagpadala sa isyu bahin sa tropikal nga kalasangan (Marso 22, 1990) ngadto sa Bralizian Institute for Environment and Renewable Natural Resources. Sila mitubag: “Nagpasalamat kami kanimo sa pagpadala kanamo ug kopya sa magasing Pagmata! nga naghisgot bahin sa pagpaupaw sa lasang. Among pahimuslan kining higayon sa pagdayeg sa imong inisyatibo ug sa pagpunting sa kahamili sa magasin, nga sa dayag makaamot sa pag-ugmad ug kolektibo ekolohikanhong kaamgohan.”

C. H. A. S., Brazil

Mapihigon sa Rasa Niadto Dili nako ikasugilon kaninyo ang akong kawili sa sugilanon ni Virgil Dugue. “Gisulayan Ko ang Pagbag-o sa Kalibotan.” (Marso 22, 1990) Kadto nakapaamgo kanako sa mga epekto sa pagpihig ug kon unsa ka pintas kini.

J. N., Tinipong Bansa

Subwey sa Siyudad sa New York Human nabasa ang artikulo “Pagsakay sa Lungag Diha sa Yuta,” napukaw ako sa pag-ingon, “Salamat.” (Abril 22, 1990) Ingong tigsakay sa subwey, lisod hunahunaon ang sistema sa tren kon unsa gayod kini​—katingalahan. Karong buntag samtang nagpaingon sa trabaho, mikanaog ako sa hagdanan ug misakay ug tren nga lahi na kaayog tinamdan.

M. H., Tinipong Bansa

Dinagmalang mga Asawa Ako dagmalan ug asawa nga nagbag-o na, ug ang Nobyembre 22, 1988 nga Pagmata! nakatabang gayod kanako sa pagkakita kon unsa ka ngil-ad ang pagdagmal ug asawa. Human nabasa ang magasin, nahugno ako. Nag-ampo ako nga unta ibutang kini sa nangagi sa among pamilya.

D. S., Tinipong Bansa

Pagkawalay Kasegurohan Ako nagsulat maylabot sa artikulong “Mga Batan-on Nangutana . . . Nganong Bation Ko ang Grabeng Pagkawalay Kasegurohan?” (Abril 22, 1990) Ako 33 anyos, ug ang artikulo nakatabang kaayo kanako. Sa bata pa ako, naghikog ang akong inahan. Ang akong amahan alkoholiko ug giabusohan ako sa sinultihan, sa pisikal, ug sa seksuwal. Kanunay niya kaming pakaulawan ug gipabati nga walay-pulos. Busa sa bata pa, wala akoy kasegurohan sa kaugalingon. Usahay, bation ko gihapon ang pagkawalay-kasegurohan, apan dili na sama kaniadto. Ang pagkahimong bug-os panahong magwawali nakatabang usab kanako ug dako, kay nakita ko ang panalangin ni Jehova kanako niining buluhatona. Ug kon ako gihigugma ni Jehova, moingon ako sa akong kaugalingon, dili kinahanglang bation ko ang kawalay-pulos.

C. R., Tinipong Bansa

Makadasig kaayong masayod nga adunay mga batan-on nga may sama niining mga pagbatia. Tungod kay tin-aw ug detalyado ang mga pananglitan, nakahimo ako sa pagtandi sa akong kaugalingong situwasyon. Ang artikulo naghisgot usab nga ang pagbating kasegurohan dili mougmad dihadiha ug duna gayoy kakulian. Kini maoy malumo nga tambag. Inigkakita nako niining makapakalma nga mga pulong, moburot, ang akong kasingkasing, ug maglisod sa pagpugong sa mga luha.

C. T., Japan

Kalibotan nga Walay Posil! Ang inyong dili pa dugay nga artikulo bahin sa mga posil (Mayo 22, 1990) nakatugaw kanako. Ang pulong “kon mas daghang posil, mas daghan ang pinosilay” gisundan sa daghang mga pananglitan ug mga kinutlo nga nagmisrepresentar sa tinuod nga situwasyon. Pananglitan, kamo nag-ingon nga nakabaton ang Switzerland labing daghang posil sa matag tawo sa Uropa. Apan walay gihisgotan ang artikulo nga ang Switzerland mao usab ang usa sa labing ubos ug gidaghanon sa krimen ug pagpamatay sa kalibotan! Ang pagpasangil sa mga posil alang sa mga suliran nga gipahinabo sa mga tawong daotan daw wala sa punto.

K. C., Tinipong Bansa

Among giapresyar kining mga komentoha. Angay untang hatagan ug katin-awan ang pipila ka mas kontrobersiyal nga mga kaihapan nga gikutlo sa among mga artikulo. Bisan pa niana, walay gibatonang baroganan ang “Pagmata!” maylabot sa politikal nga isyu bahin sa pagkontrolar sa posil kondili nagpasiugda ug umaabot nga “kalibotan nga walay mga posil” ilalom sa Gingharian sa Diyos. Kutob dinhi, ang mga Kristohanon gitultolan sa mga prinsipyo diha sa Isaias 2:4 ug Mateo 26:52.​—ED.