Usa ka Sulat sa Apresasyon
PIPILA ka bulan nga miagi ang magasing Pagmata! nakadawat ug usa ka sulat gikan sa usa ka batan-ong estudyante diin gisulti niya ang mosunod:
“Ang inyong mga magasin mao ang labing matulon-anon, sayon basahon ug sabton, tukma sa panahon, ug makapalig-ong mga basahon nga sukad akong nabasa. Nagdala kini sa kamatuoran sa Pulong sa Diyos sa makutihong dagway. Gihisgotan niini ang presenteng mga panghitabo uban ang pagsabot ug paglaom alang sa umaabot.
“Ang bokabularyo nga gigamit may pagkasayon aron basahon sa usa ka batan-on, labi pang sayon kay sa ubang mga magasin, ensiklopedia, ug mga reperensiyang basahon. Ug sila tukma sa panahon. Ako kasagaran may butang gikahibulongan, ug dayon anaa ang tubag sa sunod isyu.
“Kay usa ka estudyante sa hayskul, kinahanglang buhaton ko ang dakong pagtuki alang sa mga report ug sa lainlaing mga proyekto, nga nagkinahanglag daghang reperensiyang basahon. Dinha ang inyong mga magasin nakatabang kaayo. Malipay ako sa pagsulti nga ang impormasyon alang sa kadaghanan sa akong mga proyekto naggikan sa mga magasin. Mopatim-aw kanunay nga sa dihang gikinahanglan ko ang usa ka topiko alang sa usa ka proyekto, kana anaa sa magasin. O kon may tun-an ako sa eskuylahan, ang usa ka artikulo bahin nianang ulohana mismo anaa sa pagtabang nako sa pagsabot niana.
“Pananglitan, gikinahanglan ko ang usa ka topiko alang sa usa ka proyekto sa siyensiya alang sa Science Fair nga kinahanglang isalmot namo. Nalangkoban kadto sa tulo ka poster, usa ka report, ug usa ka modelo. Busa mihukom ako sa paghimo sa usa ka topiko nga gikahibulongan sa daghang tawo niining mga adlawa: ang greenhouse effect. Gihisgotan kadto sa Septiyembre 8, 1989, Pagmata! Gigamit ko ang ilustrasyon sa sulod nga hapin alang sa akong ideya alang sa usa ka poster ug sa ilustrasyon sa panid 7 alang sa lain. Ang ikatulong poster maoy diha sa mga hut-ong sa atmospera. Gigamit ko usab ang impormasyon diha sa mga artikulo sa akong report. Nagustohan sa tanan ang akong proyekto ug ang paagi sa akong pagpresentar niadto, ilabina ang akong magtutudlo sa biyolohiya. Gihatagan niya akog A, ug nadawat nako ang unang-dapit nga ganti sa akong seksiyon sa Ecology and Conservation.
“Dayon, sa Marso, gikinahanglan ko ang usa ka topiko alang sa akong asaynment sa First Aid. Nakita ko sa Marso 22, 1990, Pagmata! ang usa ka artikulo bahin sa hubak ug tambal niana. Mihukom ako sa paggamit sa hulagway sa panid 17 alang sa poster ug sa impormasyon alang sa usa ka report. Nakadawat usab akog A sa maong proyekto.
“Sa among klase sa American History, gitun-an namo ang karaang mga sibilisasyon, sama sa Maya, Aztec, ug Inca, ug abi ninyo, sa pag-uli nako usa ka gabii, ang Mayo 8, 1990, Pagmata! nagpaabot nako sa kahon sa sulat. Gikuha ko kadto gikan sa putos niana aron mapakli ug nakaplagan ang artikulo sa panid 13, nga naghisgot sa sibilisasyong Maya. Ako nalipay kaayo. Gibasa dayon nako ang artikulo ug gihatagag usa ka kopya niana ang akong magtutudlo sa historya.
“Salamat tungod niining tanang tukma-sa-panahong impormasyon, nga nagahimo gayod sa pagbuhat niining mga proyektoha nga usa ka matulon-ang kasinatian ug usa ka kalipay inay usa ka palas-anon. Sa pagkamatuod, ang mga magasin maoy samag mahalong mga bato. Dili gayod nako buot mabulag niana. Sila makatabang gayod, ilabina sa mga batan-on nga sama kanako, nga dali kaayong malinga. Pinaagi sa pagbasa sa mga magasin, apil ang mga artikulo sa ‘Mga Batan-on Nangutana,’ kami mapalig-on pinaagi sa kusog sa pagwagtang sa maong mga makapalinga ug itutok ang among mga mata sa ganti sa kinabuhing walay kataposan. Salamat kaayo alang sa inyong pagbudlay sa pag-andam niining mga magasina alang sa among pagsabot ug paglipay.”—Tinampo.