Mga Batan-on Nangutana . . .

Nganong Kinahanglan nga Ako Malahi?

“LISOD nga malahi.” Kanay sulti sa usa ka Kristohanong batan-on. Kon ikaw mismo usa ka Kristohanon, sa walay duhaduha imong nasabtan sa eksakto kon unsay iyang gibati. Sama sa kadaghanang batan-on, buot nimong magustohan ug dawaton sa uban. Ang suliran mao, ang pagkadinawat kasagaran nagkahulogan sa pagpahiuyon​—sinultihan, pamiste, ug paglihok sama sa imong mga isigkaingon. Ang batan-on nga mangahas sa pagpalahi mameligro nga dili maangayan sa kadaghanan ug tamayon.

Busa giatubang sa mga batan-on taliwala sa mga Saksi ni Jehova ang lisod nga kahimtang. Sa yanong pagkasulti, ingong mga Kristohanon, sila lahi sa ubang mga batan-on. Kini dili tungod kay sila adunay superyor nga tinamdan o nagahunahuna nga sila mas maayo kay sa ubang mga tawo. Hinunoa, tungod sa ilang pagkabansay sa Bibliya, sila sagad dili mouyon sa ilang mga isigkaingon kon bahin sa moral nga kagawian. Ang ilang mga hunahuna bahin sa patriotikong mga seremonyas, pagsaulog sa relihiyosong mga pangilin, ug pakigdeyt samang makapalahi kanila mao nga sila daling himatikdan ug makapikal sa pila nila ka isigkaingon.a

Usa ka Saksing batan-on nagtawag sa pagkalahi nga “kinalisdang bahin sa pagka-Kristohanon.” Ang lain miingon: “Tamayon ka sa mga batan-on. Ako sa makadaghan gitawag nga lungki ug laksot.” Ang imong Kristohanong mga ginikanan basin mopugos pa sa dugang nga ikaw malahi dili lamang sa moral nga kagawian kondili hasta sa pamiste, pamostura, ug hilig sa musika.

Lahi ang Katawhan sa Diyos!

‘Unsay daotan nga mahisama sa ubang mga batan-on?’ tingali mahibulong ka. Aw, ang pagkalahi nagtimaan sa katawhan sa Diyos sukad sa sinugdanan mismo. Sa usa ka panahon, gipili sa Diyos ang karaang Israel aron mahimong iyang “linain nga kabtangan.” (Exodo 19:5) Kana nagpasabot sa pagkalahi gikan sa tanang ubang mga katawhan. Sa Levitico 18:3, ang Diyos nagsugo: “Ang paagi sa pagbuhat diha sa yuta sa Ehipto, nga inyong gipuy-an, dili ninyo pagabuhaton; ug ang paagi sa pagbuhat diha sa yuta sa Canaan, nga ngadto niana ako kamong pagadalhon, dili ninyo pagabuhaton; ug dili kamo magagawi sumala sa ilang mga kabalaoran.”

Ang karaang mga Ehiptohanon natuhop sa makauulaw nga pagsimba ug kahayopan. Ang pagtuo sa pagkadili-mamatay sa kalag nakatuhop sa ilang mga kinabuhi. Ang pag-unay maoy kasagaran. Sa susama, ang Canaan maoy usa ka yuta nga natuhopan sa pagsimbag diyosdiyos, seksuwal nga kahiwian, pag-ulag dugo, paghalad ug bata, ug pagpamuta. “Ayaw ninyo paghugawi ang inyong kaugalingon pinaagi sa bisan hain niining mga butanga,” nagpasidaan ang Diyos sa ingon. “Ayaw kamo pagbuhat sa bisan hain niining tanan nga dulumtanang butang.”​—Levitico 18:24-26.

Gipaluyohan ni Jehova kining tambaga pinaagi sa usa ka kodigo sa Kasugoan nga nagmando sa halos tanang bahin sa ilang mga kinabuhi: ilang pagkaon (Levitico 11), ilang mga batasan sa paghinlo (Deuteronomio 23:12, 13), ilang seksuwal nga mga batasan (Levitico 18:6-23). Ang Kasugoan naglagda pa sa ilang pamiste ug pamostura! “Kinahanglang sila magbuhat alang sa ilang kaugalingon ug mga borlas diha sa mga sidsid sa ilang mga biste ngadto sa ilang mga kaliwatan,” matud ni Jehova, “ug kinahanglang magbutang sila ug sinawalo nga asul ibabaw sa borlas sa sidsid.” (Numeros 15:38) Ang mga lalaki gibaoran nga magpabungot ug gidid-an sa pag-agil sa ilang “patilya.” (Levitico 19:27; 21:5) Ang maong balaod kinahanglang sundon bisan pag ang usa ka Hudiyo dili gustog binorlasan nga biste o mopalabi sa dagway nga binalbasan.

Karon, hunahunaa nga sultihan ka nga kinahanglang ikaw magbaton ug bungot ug magsul-ob sa tino nga biste. Dili ka ba mayugot niini ingong paglapas sa imong personal nga mga katungod? Bisan pa, ang mga balaod sa Diyos nagsilbi sa usa ka hinungdanon ug mapuslanon nga katuyoan. Mipatin-aw si Jehova: “Ang katuyoan mao nga aron kamo makahinumdom ug makabuhat sa tanan kong mga sugo ug magpamatuod nga balaan ngadto sa inyong Diyos. Ako si Jehova nga inyong Diyos.” (Numeros 15:38-41) Ang lagda sa biste nagsilbing kusganong makita nga pahinumdom nga ang mga Hudiyo maoy lahi​—usa ka katawhang gigahin ingong balaan kang Jehova. Ang mga pagdili maylabot sa pagkaon dili lang nanalipod sa ilang panglawas kondili nagtabang sa pagpugong kanila sa pagkalangkit sa mga dili-Hudiyo sa sosyal o relihiyosong kalihokan. Aw, imposible gayod ang pagpakig-uban sa usa ka pagano nga walay paglapas sa usa ka bahin sa Kasugoan sa Diyos. Sa ingon ang Moisesnong Kasugoan nagsilbing usa ka “paril” nga naghupot sa Iyang katawhan nga bulag gikan sa ubang mga nasod.​—Itandi ang Efeso 2:14.

Ang mga Kristohanon Kinahanglang Lahi

Ang mga Kristohanon karong adlawa “napahigawas na sa Kasugoan” ni Moises ug nagapahimulos ug dakong kagawasan kon bahin sa personal nga pagpili. (Roma 7:6) Bisan pa niana, giingnan ni Jesu-Kristo ang iyang mga sumusunod: “Kamo dili bahin sa kalibotan . . . Gipili ko kamo gikan sa kalibotan, [ug] tungod niini ang kalibotan nagadumot kaninyo.” (Juan 15:19) Si Jesus wala mag-ingon nga ang mga Kristohanon kinahanglang mopahawa sa planetang Yuta. (Itandi ang 1 Corinto 5:10.) Siya sa yano nagpasabot nga kinahanglang sila mabulag gikan sa “ang kalibotan”​—ang bahin sa katawhan nga nabulag sa Diyos. Ngano? Kay sumala sa giingon sa ulahi ni apostol Juan, “ang tibuok nga kalibotan nahiluna sa gahom sa usa nga daotan.”​—1 Juan 5:19.

Karon palandonga ang pipila sa mga batan-on nga imong kaila sa eskuylahan. Komosta ang ilang panghunahuna, ilang kagawian, ilang sinultihan, ilang hilig sa musika o sinina? Sa imong hunahuna ang mao bang mga batan-on gigiyahan sa diyosnong mga sukdanan​—o sila ba gigiyahan sa mga lagda nga gihatag sa “ang diyos niining sistema sa mga butang,” si Satanas nga Yawa? (2 Corinto 4:4) Kon tinuod ang naulahi, pagkalisod sa kahimtang nga gibutangan nimo sa imong kaugalingon kon ikaw nagalihok, nagasulti, o bisan sa panagway maoy nagkato nga sama kanila! Sa labing menos, ikaw makadaot sa imong pangangkon nga usa ka Saksi ni Jehova. Daotan pa, basin ikaw madaog sa daotang mga impluwensiya.

“Ang imong mga higala magaapektar gayod sa imong pamatasan,” miangkon ang usa ka batan-ong babaye nga ginganlag Kim. “Sa nag-eskuyla pa ako, ako dili kaayo lig-on sa [Kristohanong] kamatuoran, mao nga ako may daghang higalang kalibotanon. Apan kadto dili maayo kay ako nalanggikit sa daghang daotang butang.” Apan dili kinahanglang malanggikit ka sa seryosong buhat nga daotan aron madaot ang imong relasyon sa Diyos. Matikdi pag-ayo ang ginaingon sa Bibliya sa Santiago 4:4: “Wala ba kamo mahibalo nga ang pagpakighigala sa kalibotan maoy pagpakig-away sa Diyos? Busa, si bisan kinsa nga buot mahigala sa kalibotan nagahimo sa iyang kaugalingon nga kaaway sa Diyos.”

Buot ba gayod nimong mameligro nga mahimong kaaway sa Diyos? Siyempre dili! Nan himoang tin-aw nga ikaw dili bahin sa kalibotan. Kini nagkahulogan, hinuon, ug labaw pa kay sa paglikay lamang sa mga droga ug sa imoral nga sekso.

Kon sa Unsang Paagi Mahimong Lahi

Pananglitan, tagda ang imong hilig sa sinina. Ang imong igasul-ob magapadalag mensahe kon kinsa ka, kon unsay imong gihawasan, kon unsay imong gituohan. Hinuon, dili sama sa Hudiyong kahikayan, ang Kristiyanidad nagatugot kanimog dakong kagawasan sa pagkaikaw ug sa personal nga gusto. Apan nagkahulogan ba kana nga mosunod sa matag urog sa biste nga moabot?

Usa ka Kristohanong dalaga buot mosunod sa niadto nabantog nga uso sa pagsul-ob ug gisi nga jeans sa eskuylahan. Natural lang, walay gusto nga tan-awong karaan. Hinuon, ang imong mga ginikanan maalamon sa pagbutang ug mga limitasyon sa dili pagtugot kanimo sa pagsul-ob ug mga estilo nga nagkato, hilas, katingad-an, o ngil-ad. Kon ang imong pamiste maoy ingon, unsang impresyon ang imong igahatag sa uban? Usa ka dalagang ginganlag si Jeffie nakadiskobre sa dihang ang iyang buhok iyang gipakortehan sumala sa urog. “Abi kog kadto ‘lahi’ lang tan-awon,” siya nahinumdom. “Apan ang mga tawo misugod sa pagsukna kanako, ‘Tinuod ba nga ikaw usa sa mga Saksi ni Jehova?’ ug kadto makauulaw.”

Ang timbang nga tambag gihatag sa 1 Timoteo 2:9, diin ang mga Kristohanon giagda sa pagbiste “uban sa kamakasaranganon ug kaligdong sa hunahuna.” Ikaw sagad mahimong makasaranganon nga dili tan-awong kinaraan. Tinuod, ang pagbiste sa konserbatibong paagi lagmit dili makapadaog nimo sa usa ka bangga sa kaanyag, apan kana motabang nimo nga mailhang lahi​—ug tungod niana imong maangkon ang pag-uyon sa Diyos!

Komosta ang imong hilig sa musika? Ang musika nagaokupar sa mga oras sa pagmata sa daghang batan-on. Kon huptan nga timbang, ang musika makapahimuot ug makapalig-on. Bisan pa niana, ang Exodo 32:17-22 nagpakita nga ang musika makapukaw usab sa daotang mga emosyon ug mga mainitong pagbati. Ug kadaghanan sa musika karon sa yano dili angay sa mga igdulongog sa Kristohanon. Ang rap ug heavy-metal nga musika, pananglitan, popular, apan daghan​—kon dili man kadaghanan—​niana nahasentro sa imoral nga sekso, rebelyon, kapintasan, o espiritismo pa. Nagaduyog ka ba sa ubang tin-edyer sa imong hilig sa musika, o ikaw ba may kaisog nga magmapilion?

Oo, kinahanglan ang kaisog aron magpalahi. Sa dihang dili nimo tugotan ang mga higala ug mga klasmet nga maoy modiktar sa imong pagpili ug kalingawan, sinultihan, o biste, tinong makapukaw kanag reaksiyon. Si Jesus nagpasidaan: “Tungod kay kamo dili bahin sa kalibotan, . . . ang kalibotan magadumot kaninyo.” (Juan 15:19) Busa ang pagkalahi mahimong usa sa kinalisdang mga butang nga kinahanglang imong buhaton​—apan kana dili imposible. Kini ang dalan nga nagatuboy sa mga sukdanan sa Diyos. Kini magadala kanimog pagtahod-sa-kaugalingon ug hinlo nga konsensiya. Ang pangutana mao, Sa unsang paagi ikaw makakaplag ug kaisog nga malahi? Ang among sunod gula magatubag sa maong pangutana.

[Footnote]

[Mga hulagway sa panid 18]

Ang batan-on nga mapakyas nga malahi gikan sa iyang mga isigkaingon nagadaot sa iyang pangangkon nga usa ka Kristohanon