Ang Hunahuna sa Bibliya

Ang Kalibotan ba Nagkinahanglan ug “Bag-ong Pag-ebanghelyo”?

Sinulat sa koresponsal sa Pagmata! sa Italya

ANG mga hangin sa politikanhong kausaban nga nagahuyop sa tibuok Sidlakang Uropa nagdala uban kanila ug relihiyosong pagkahigmata. Aron makapahimulos gikan niining espirituwal nga kahigayonan, ang Espesyal nga Asembliya Alang sa Uropanhong Konsilyo sa mga Obispo nagtigom sa Vatican gikan sa Nobyembre 28 hangtod sa Disyembre 14, 1991. Ang tanan sa 137 “Konsilyo sa mga Amahan,” nga nagapangunang mga tigpaluyo sa Uropanhong Hirarkiya sa Katoliko, nagtigom ubos sa tumong nga “bag-ong pag-ebanghelyo.”

Sukad sa panahon sa pagpahibalo sa konsilyo niadtong Abril 22, 1990, sa Velehrad, Czechoslovakia, kadto gimantala ingong makasaysayanhong hitabo. Ugaling, lisod ang paghunahuna labot sa konsilyo ingong talagsaon nga kalamposan, sanglit ang RAI, ang Italyanhong sistema sa nasodnong telebisyon, nagpahibalo sa Disyembre 14, 1991: “Ang konsilyo sa mga kapalaw nakadangat sa iyang kataposan.”

Nganong konsilyo sa kapalaw? Ug ang Uropa ba, o ang kalibotan kon bahin niana, nagkinahanglan ug “bag-ong pag-ebanghelyo”?

“Bag-o” sa Unsang Diwa?

Ang Katolikong hirarkiya naghunahuna nga usa ka bag-ong pag-ebanghelyo maoy gikinahanglan tungod kay ang relihiyosong palibot maoy bag-o. Sa pagbukas sa asembliya, si kardinal Camillo Ruini nagsumada sa iyang panlantaw sa Uropanhong natad. Siya nag-ingon nga diha sa Sidlakan “daghang minilyon wala ngani mabawtismohi ug wala magpakabana sa labing unang mga kamatuoran sa Kristohanong pagtuo.” Tungod niining katarongana “ang pagkahugno sa mga pagmandong Komunista nagbukas sa dakong kahigayonan sa pag-ebanghelyo alang sa Simbahan.” Sa laing bahin, ang esena sa Kasadpang Uropa gitiman-an pinaagi sa iyang gitawag “praktikal nga ateyismo.” Ang pulong sa Katolikong Simbahan wala na tuohi ingong kamatuoran gikan sa Diyos.

Ang relihiyosong pagkahigmata sa iyang kaugalingon nagpresentar ug laing hagit alang sa mga obispo. Sa unsang paagi? Pareho ang Uropanhon ug ang Latin-Amerikano nga mga obispo nabalaka mahitungod sa pagdagsang sa laing relihiyosong mga kalihokan. Ngano? Dayag tungod kay ang simbahan napildihan sa daghang mga pinaborang posisyon nga kas-a iyang nabatonan, ug karon siya nakakita sa iyang kaugalingon nga “gihulga sa peligrosong mga karibal.” Ang Jesuit nga mantalaan nga La Civiltà Cattolica nagpunting sa mga Saksi ni Jehova ingong usa sa maong mga karibal tungod sa “ubay-ubayng gidaghanon sa mga Katoliko ug mga Protestante nga malamposon nilang nadani.”

Ang mga pulong sa panghinapos sa konsilyo nga “Deklarasyon” nag-ingon nga ang bag-ong pag-ebanghelyo usa ka tukbil sa “pagdiskobre pag-usab sa Kristohanong mga gamot sa usa.” Nganong ang mga Uropanhon kinahanglang magdiskobre pag-usab sa ilang “Kristohanong mga gamot”? Ang mga obispo nag-ingon nga ang gihamiling mga hiyas sa Kristohanon wala na isipa nga balido. “Kon bahin sa daghang bawtismadong mga Uropanhon,” matud sa La Civiltà Cattolica, ang relihiyon “maoy binata, usa ka nindot sugilambong nga estorya alang sa kabataan nga sa tino ang mga hamtong dili makadawat ug ugdang, nga samag bisan unsang butang nga tingali makaimpluwensiya sa ilang mga kinabuhi. . . . Ang ubang mga Uropanhon nag-isip sa Kristohanong relihiyon nga yanong kasugiran, nga sa ingon mahanaw lamang samtang mouswag ang sibilisasyon . . . Ang uban pang Uropanhon nagaisip sa Kristohanong relihiyon nga makadaot.”

Tungod niining mga katarongan ang mga obispo nakakita sa panginahanglan alang sa “bag-ong pag-ebanghelyo.”

Kon Nganong Napalaw

Aron molampos diha sa “bag-ong pag-ebanghelyo” sa Karaang Kalibotan, ang daghan kaayong magbubuhat kinahanglanon. Apan, usa sa kinadak-ang mga suliran nga nag-apektar sa simbahan diha sa Uropa mao ang kakulang sa mga pari. Usa sa mga obispo nag-ingon nga sa miaging 13 ka tuig, sumala sa bag-ong pagbanabana alang sa Uropa, ang klerigo mius-os sa gidaghanon ug 9 porsiento.

Daghan nag-isip sa konsilyo nga napalaw kay may diyutay rang praktikal nga punto bahin sa kon unsaon sa pagtuman sa “paghimo pag-usab nga Kristohanon” sa Uropa. Ang Pranses nga obispo nga si Joseph Duval miawhag sa pundok sa konsilyo: “Kinahanglang likayan nato ang hanap nga mga diskurso bahin sa pag-ebanghelyo . . . Kitang tanan nagasulti nga sama gayod sa mga abogado. Hinaot ang atong mensahe sa makausa pa mahimong mensahe nga may ebanghelikanhong kayano ug tono.”

Pila lamang sa mga obispo ang naghisgot sa apostolikong mga paagi sa pag-ebanghelyo sa katawhan. Pananglitan, si Obispo František Tondra sa Spiš, Pederal nga Republika sa Czech ug Slovak, nag-ingon: “Alang sa bag-ong pag-ebanghelyo sa Uropa, kinahanglang mobalik kita sa unang matang sa pag-ebanghelyo. . . . Ang unang mga Kristohanon, pagkatapos gayod sa ilang bawtismo, mibati sa ilang obligasyon sa pagpakaylap sa Ebanghelyo.”

Pag-ebanghelyo​—Ang Paagi sa Bibliya

Ang tanan bang mga Kristohanon sa unang siglo mga ebanghelisador? Oo! Ang librong Evangelism in the Early Church, ni Michael Green, Oxford, England, nag-ingon: “Usa sa labing iladong mga kinaiyahan sa pag-ebanghelyo niadtong unang mga adlaw mao ang katawhan nga naghimo niana. . . . Ang pag-ebanghelyo maoy kagustohan ug obligasyon sa matag sakop sa Simbahan. . . . Ang Kristiyanidad maoy sa kinalabwan usa ka layko nga kalihokan, nga gipakaylap pinaagi sa dili-pormal nga mga misyonaryo.”

Ang pulong “ebanghelisador” nagkahulogan ug “magsasangyaw sa maayong balita,” ug kon unsay gisulti ni Kristo Jesus mahitungod sa pag-ebanghelyo nagpasabot nga mapadapat sa tanan niyang sumusunod: “Kining maayong balita [ebanghelyo] sa gingharian igawali una sa tibuok kalibotan ingong pagpamatuod sa tanang kanasoran. Ug unya moabot ang kataposan.” (Mateo 24:14, The New Jerusalem Bible) Mao nga, ang labing dakong buluhaton sa pag-ebanghelyo nga pagabuhaton kinahanglan nga matuman sulod sa “panahon sa kataposan.”​—Daniel 12:4.

Sa miaging tuig, ang mga Saksi ni Jehova, kapin ug upat ka milyon ang gidaghanon, minggugol ug hapit usa ka bilyon nga oras diha sa pag-ebanghelyo nga buluhaton sa 211 ka kayutaan, lakip sa Sidlakang Uropa. Unsang maayong balita ang ilang ginasangyaw? Ang maayong balita sa Gingharian sa Diyos ug ang kaluwasan pinaagig pagtuo kang Jesu-Kristo. (2 Timoteo 1:9, 10) Kini nga mensahe ang gikinahanglan sa kalibotan karon​—una pa moabot ang kataposan.​—Mateo 24:3, 14.

[Picture Credit Line sa panid 26]

Si Jesus Nagsangyaw sa Dapit sa Dagat sa Galilea, ni Gustave Doré