“Death Metal”—Unsay Mensahe?
USA ka bangis-ug-tinan-awan, taas-ug-buhok batan-ong lalaki nagtindog sa atubangan sa nag-abibang tumatan-aw, naglaylay nga mga dumadayeg. Iyang gikuha ang usa ka timba sa dugo ug mga tinai sa hayop ug giyabo kana sa unang pila ka laray sa tumatan-aw. Ang mga dumadayeg nangatawa, nagbulit sa ilang mga kaugalingon, ug naglinabayay ug mga hiniwa. Kining talan-awon, sumala sa St. Petersburg Times sa Florida, nahitabo sa usa ka konsiyertong rock sa usa ka banda gitawag ug Deicide, nga nagkahulogan ‘ang pagpatay sa usa ka diyos.’ Kining matanga sa musika gitawag death metal, nga gituohang ang kinagrabehang matang sa heavy-metal rock. Ning ulahing mga katuigan nahimo kining labing popular diha sa Florida ug sa ubang mga nasod, sukad gayod sa kalamposan sa album nga nag-ulohang Scream Bloody Gore, sa usa ka banda gitawag Kamatayon.
Ang banda nga Deicide gipangunahan sa usa ka nangangkon nga Satanista kinsa nag-angkon nga nagdumot sa Diyos sukad gayod sa nauwatan siya ug porma-J gumikan sa aksidente sa kotse, nga siya nakaseguro nga naghawas kang Jesus o kang Jehova. Siya nag-angkon nga makadungog ug mga tingog nga nagaaghat kaniya sa paghikog, ug siya nagpaso ug usa ka satanikong simbolo sa iyang kaugalingong agtang.
Bisan ang mga pundok sa mas kasarangan nga heavy-metal nagahatag ug mga mensahe nga dili ubos sa kangil-ad. Ang Time nga magasin nagtaho nga duha ka rekord nga mga album sa heavy-metal nga pundok sa Guns N’ Roses nakabaligya ug kapin sa 1.5 milyon nga kopya sa tulo ka adlaw. Bisan pa, ang mga album nagpadayon sa gitawag sa Time nga iya sa banda nga “walay kaluoy sa babaye ug gahian mapintasong mga pulong” ug “ilang mga paghilabot sa kahadlok sa langyaw, rasismo ug sadomachosismo.” Sila usab nagpasiugda sa mga tema sama sa oral nga pakigsekso, pagbuno, ug hinobrang pagpanamastamas. Pipila ka mga katay sa tindahan nagdumili sa pagbaligya sa mga rekord.
Ang heavy-metal nga rock, maingon sab sa pila ka rap nga musika, ning ulahi gisaway sa dugang ug dugang—ug dili lamang gikan sa relihiyosong mga pundamentalista ug labaw-konserbatibo nga mga pundok politikal; ang Asosasyong Medikal sa Amerika (AMA) ug ang Amerikanhong Akademya sa Pediatriko nakasulti usab ug batok sa nagapahiping mga katalagman sa mga pulong pareho diha sa estilo sa musika. Sumala sa magasing American Health, ang AMA nag-ingon: “Ang mga mensahe nga gipasundayag sa pila ka matang sa musikang rock mahimong nagatanyag sa tinuod nga hulga sa pisikal nga panglawas ug emosyonal nga kaayohan ilabina sa mahuyang nga kabataan ug mga nagkahingkod.”
Kini bang matanga sa musika tinuod nga peligroso? Nan, tagda ang unom ka komon nga rap ug heavy-metal nga mga tema nga giisip sa AMA nga makadaot: pag-abuso sa droga ug alkohol, paghikog, kapintasan, pagsimba kang satanas, seksuwal nga pagpahimulos, ug rasismo. Makapalig-on ba ang maong mga tema?—Itandi ang Proverbio 6:27, 28; Filipos 4:8.