Gikan sa Among mga Magbabasa

Chronic Fatigue Syndrome Nakapatugbaw ug apresasyon ang among pamilya sa dihang kami nakadawat sa among Pagmata! nga naghisgot bahin sa CFS. (Agosto 22, 1992) Ang organisasyon ni Jehova matinagdanon kaayo sa paghatag ug pagsabot ngadto sa mga tawo nga wala matakboyi niining terible ug katingad-ang sakit! Salamat usab, kaninyo, alang sa apresasyong gipahayag sa among mga magtatagad, nga nagpas-an sa maong mabug-at nga palas-anon.

K. C., Australia

Ako sama sa babaye nga anaa sa hapin. Ang mga artikulo naghatag kanako ug kalig-on sa pagpahiling sa usa ka doktor ug sa pagkaamgo nga ako may sakit gayod. Gipasangil ko kining tanan sa depresyon. Apan salamat kang Jehova, ang kaguol nga akong gibati nawala na.

M. A., Espanya

Sa kataposan, usa ka magasin nga naghisgot bahin sa CFS! Naningkamot gayod ako sa pagpatin-aw sa uban kon unsay akong gibati apan ang resulta makawala sa kadasig ug usahay makapahiubos! Kining mga artikuloha maoy mga panig-ingnan kon sa unsang paagi gipakiglabotan sa inyong mga publikasyon ang dinaliang mga panginahanglan sa mga indibiduwal.

F. C., Italya

Dili gihapon ako makatuo nga sa kataposan ako nakabaton na ug mga tubag sa akong mga pangutana mahitungod sa akong panglawas. Ako dunay CFS sulod na sa 14 ka tuig nga wala masayod kon unsa kana. Ako nakapahiling nag daghang doktor nga nag-ingon nga ako adunay depresyon o usa ka suliran sa emosyon. Nagpadala akog mga kopya niining magasina ngadto sa 25 niining mga doktora.

J. A. G., Brazil

Ako may igoigong kahibalo na bahin sa CFS. Ang akong labing gikinahanglan mao ang inyong gitagana diha sa parapo sa panid 14 nga naghisgot bahin sa kon unsay hunahuna ni Jehova nga Diyos. Daghan kaayong salamat kaninyo! Makahilak ako sa matag panahong basahon ko ang maong parapo, nga karon halos 50 ka higayon na!

S. D., Tinipong Bansa

Bisag naghilak ug nagkurog, natapos ko pagbasa kining artikuloha. Nag-antos ako sa CFS. Dugay nga nailhan ang akong sakit. Apan ang pisikal nga kasakit nga akong gibati dili sama ka dako sa akong gibating kasakit tungod kay wala makasabot ang akong Kristohanong mga igsoon. Daw si Jehova nahibalo kanunay kon kanus-a itagana kanato ang impormasyon.

K. J., Tinipong Bansa

Ang akong anak nga babaye nag-antos sa CFS sa pipila ka tuig, busa ako nalipay kaayo nga nakadawat sa Agosto 22 nga Pagmata! Gihisgotan niini ang mga suliran nga tin-aw kaayo nga dili ko ikabutang ang magasin hangtod nakatapos ako sa pagbasa. Dayon gibasa ko kini pag-usab. Usa unya kini sa mga magasin nga ibutang ko sa akong linain nga payl alang sa dali nga reperensiya. Kining magasina nakatandog kaayo ug dako kanako nga kinahanglang isulti ko ang akong pasalamat kaninyo.

M. E., Inglaterra

Alkoholikong mga Ginikanan Salamat sa inyong artikulong “Mga Batan-on Nangutana . . . Usa ka Alkoholikong Ginikanan​—Sa Unsang Paagi Ako Makasagubang?” (Agosto 8, 1992) Ang akong amahan maoy nagpaayong alkoholiko. Siya abusado kaayo, sa pisikal ug sa hunahuna. Nagsugod ako sa pag-inom sa bata pa ug ako hapit nang mahimong alkoholiko mismo sa panahong nagsugod ang akong inahan sa pagtuon uban sa mga Saksi ni Jehova. Ako malipay sa pag-ingon nga niadtong Agosto 1991, ako gibawtismohan! Ako nag-aplay karon sa pagkahimong usa ka payunir [bug-os panahon] nga ebanghelisador. Giapresyar ko ang pagkamasinabtanon sa artikulo sa mga pagbati sa mga batan-on ngadto sa alkoholikong mga ginikanan. Mahimong higugmaon nato sila, apan kana wala magpasabot nga atong giuyonan ang ilang gibuhat.

L. W., Tinipong Bansa