Gikan sa Among mga Magbabasa
Pagmatuto sa mga Kabataan Ingon nga magtututdlo sa elementarya, gipabilhan nakog dako ang mga artikulo bahin sa “Imong mga Kabataan—Paghimo Kon Unsay Labing Maayo Kanila.” (Septiyembre 22, 1992) Usa sa dagkong mga hagit nga giatubang sa mga magtutudlo karong adlawa mao ang pagpakiglabot sa mga kabataan kang kinsang mga ginikanan puliki ra kaayo nga magbaton ug personal nga interes kanila. Sa bag-ohayng tinuig nga Gabii sa mga Ginikanan sa among tunghaan, akong gipaambit ang pipila ka obserbasyon niining gulaa. Nakaplagan sa mga ginikanan ang among diskusyon nga puno sa kaalam ug makapapukaw sa hunahuna.
M. P., Tinipong Bansa
Nakaigo kamo. Sila mao ang labing maayong mga artikulo nga akong nabasa sukad masukad. Dili lamang kay gipakita ninyo ang daotang mga panig-ingnan kondili gipunting usab ninyo ang mga kasulbaran.
M. R., Alemanya
Maayong pagkasulat ang mga artikulo, apan tutol ako sa prangkang paghisgot sa pag-abuso sa bata. Kana nakapakurat kanako.
F. M., Canada
Tinuod makapakurat ang pagbasa sa mga pag-abuso nga gihimo sa mga hamtong nganha sa inosente, walay-panalipod nga kabataan. Ug samtang among gipabilhan nga pipila sa mga magbabasa makakaplag nga ang pagbasa sa maong mga butang dili makapahimuot, ang mga ginikanan kinahanglang pahibaloon mahitungod sa tinuod gayod nga mga kapeligrohan nga giatubang sa kabataan karong adlawa. (Itandi ang 2 Corinto 2:11.) Busa gibati namong katungdanan nga mahimong tino sa maong mga butang, nga buhaton kana kutob sa maarangan diha sa makapahimuot nga paagi.—ED.
Mga Prom Nakaplagan nako ang artikulong “Mga Batan-on Nangutana . . . Angay Bang Moadto Ako sa Prom?” (Marso 8, 1993) nga matulon-anon ug mapuslanon. Ugaling, nagdasig ba kamo sa mga Kristohanon sa pagbaton ug dagko, pormal nga mga sosyal nga katigoman?
N. P., Tinipong Bansa
Ang artikulo wala magdasig sa pag-organisar ug dagko sosyal nga mga okasyon. Giila lamang namo nga ang graduwasyon sa hayskul maoy usa ka makahuloganong okasyon. Busa ang pila ka Kristohanong batan-on ug ilang mga ginikanan basin mopalabi sa pag-ambit sa kalipay sa maong okasyon duyog sa uban. Ang pagdasig gihatag sa paghimo sa bisan unsang sosyal nga mga kalihokan labot niini nga ‘igoigo, kasarangan ug gidak-on, ug organisado kaayo.” Tan-awa ang “Bantayanang Torre” sa Agosto 15, 1992.—ED.
Lana sa Olibo Salamat sa maayong artikulong “Daghag-Gamit nga Lana sa Olibo” sa Oktubre 8, 1992 nga gula. Ako nagtrabaho sa ospital ingon nga batid sa pangdiyeta, ug akong gitambagan ang mga tawo bahin sa menos-ug-tambok, menos-ug-kolesterol nga diyeta. Kining artikuloha tukma kaayo ug mapuslanon sa akong pagpanudlo.
D. S., Tinipong Bansa
Panampalas Ang akong anak babaye, nga hapit na mag-15 anyos, mipauli gikan sa tunghaan ug nagsulti kanako nga siya nag-atubang sa usa ka suliran tungod kay kadaghanan sa mga kabataan sa iyang tunghaan kanunayng nagagamit ug law-ayng pinulongan. Buot siyang masayod kon unsay sayop sa paggamit ug mga balikas sa adlaw-adlawng sinultihan. Misulay kami sa pagsaysay apan gibati namo nga dili pa kadto igo. Niadtong gabhiona sa dihang akong gipunit ang Disyembre 8, 1992 nga gula sa Pagmata! nahibulong ako sa pagkakita sa artikulong “Ang Hunahuna sa Bibliya—Nganong ang Panampalas Dili Alang sa mga Kristohanon.” Dihadiha gidala nako kini ngadto sa lawak-katulganan sa akong anak babaye ug gibasa kana uban kaniya. Karon mibati siya nga masaligon sa pagtubag kang bisan kinsa nga mangutana nganong dili siya mamalikas.
P. P., Inglaterra
Bag-ong Kalibotan Ang seryeng “Usa ka Bag-ong Kalibotan nga Magtagbaw sa Tanan” (Oktubre 22, 1992) maoy usa sa labing maayo bahin niining ulohana sa dili pa dugayng katuigan. Ang mga kasulatan nga gikutlo ug ang matahom nga mga hulagway nagpukaw dinhi kanako ug halalom nga pagpabili. Ako nagtuo nga kini magtandog sa kasingkasing sa daghang magbabasa.
I. Z., Italya