Napakaulawan sa Usa ka Kudu ang mga Leyon

SA MIAGING tuig sa Habagatang Aprika, usa ka dakong antelope​—toro nga kudu​—nagbarog sa atubangan sa parke sa maluhong hotel sa Lowveld. Ang panagway niini alisto ug agresibo kaayo, busa dili katingad-an nga ang lokal nga lider sa kudu nasuko niining mapangahasong pagsulong sa iyang teritoryo. Usa ka nakasaksi mitaho bahin sa pag-atake sa lider sa kudu: “Siya nagpangusmo, nagpanikad sa yuta ug mihana sa pag-atake. Uban sa iyang gipaubos nga mga sungay siya mihasmag. Sa dihang nabangga siya sa torong kudu hilabihan niyang kuyawa.” Ang nanulong nga torong kudu wala gayod mairog. Ang lokal nga torong kudu mihasmag na usab. Sa gihapon walay epekto. Sa kasuko kay walay-nahimo ug sa nag-alintabo nga abog, “gitumba [sa lokal nga lider] ang tanang kahoy sa palibot una pa mipahawa.” Siya wala mobalik, dayag nakahinapos nga ang bag-ong abot dili mapildi.

Mao gihapon kanay nahitabo sa mga hari sa lasang. Mitaho ang guwardiya sa parke nga si Carlson Mathebula nga gialirongan sa 12 ka leyon ang kudu. Siya miingon bahin sa ilang pakigsangka niini: “Sa kalit misugod ang duha ka bayeng leyon sa pag-ukoy niini. Uban sa kusog kaayong ngulob giluksohan sa usa ang likod sa kudu samtang may midasmag sa kilid ug giukoban ang liog niini. . . . Silang duha milukapa sa yuta nga nabay-ad didto nga wala makalihok. Laing baye nga leyon ang miapil sa lamoklamok. Iyang gihasmagan ang kudu ug uban sa kusog nga pagsapo sa mga tiil siya misulay sa pagtumba sa kudu, apan nagbarog lang kini didto.” Kay nasuko kaayo nga wala makatumba niining dako nga kudu “giguba [sa 12 ka leyon] ang sukdanan sa ulan, pangbisibis sa tanaman ug ang muwebles sa gawas ayha pa milakaw sa kaulaw.”

Walay lihoklihok, gipildi sa kudu ang lokal nga panon sa kudu gikan sa ilang teritoryo ug nakapakalagiw sa magarbohong mga leyon. Ang taho sa Sunday Times sa Johannesburg, Habagatang Aprika, naghisgot bahin niining maong kudu ingong usa ka superbuck nga may gibug-atong 300 kilos nga ginama sa tumbaga. Si Gn. Keith Calder, nga maoy nag-umol sa tumbaga nga kudu, miingon: “Komplimento alang kanako nga nakita sa mga leyon ug sa kudu kini nga tinuod kaayong tan-awon.”