Kining Maong “Kudu” Nahinumdom
SINULAT SA KORESPONSAL SA PAGMATA! SA HABAGATANG APRIKA
ANG nindot nga laking kudu, nga usa ka antelope nga may katingalahang nagtuliyok nga mga sungay ug tangkag nga mga dalunggan, maoy halos 150 sentimetros ang gihabogon sa dapit sa abaga sa dihang hingkod na sa bug-os. Ang baye, bisan pag kasagaran walay mga sungay, mailhan usab tungod sa dagko niining mga dalunggan. Maulawon nga hayop ang kudu, nga igmat kanunay ug andam nga modalagan aron motago. Sa ingon, ang nahitabo kang Karen sa Zimbabwe maoy talagsaon.
Sumala sa gitaho sa magasing African Wildlife, usa ka nati nga bayeng kudu, nga nakaplagang nasabod sa alambreng pensa, natangtang ug nahatag kang Karen, kinsa nagbeberon niana sulod sa pipila ka semana. Misupang kadto ug nagpabilin sa silinganan sa uma nga gatasanan nga gipuy-an ni Karen ug sa iyang pamilya, nga kanunayng nakigdula sa mga bata ug sa mga iro. Ugaling lang, sa inanay kadto mibalik sa kalasangan hangtod nga, sa dihang halos hingkod na, kini wala na igkita sa duol sa uma.
Mga duha ka tuig sa ulahi, samtang nagdrayb sa dalan sa uma, si Karen natingala nga ang usa ka mabdos nga bayeng kudu wala modalagan sa pagsingabot sa iyang sakyanan. Ni mikalagiw kini sa misugod siya pagpaduol niini. Sa maong panahon nasayran niya nga kadto mao gayod ang samang hayop nga iyang gipabeberon, mao nga gipakigsultihan niya kinig hinay samtang siya hilom nga mipaduol niini. Ang hayop nakaila usab kaniya, kay gipaubos niini ang iyang ulo ug ginusnos kaniya samtang mitugot kaniya sa paggakos niini!
Duha ka bulan sa ulahi, ang hayop diha na usab sa duol sa dalan—niadtong panahona uban ang usa ka gamayng nati. Gibati ni Karen nga ang nati magarbohong gipailaila sa iyang inahan, nga sa nangagi nagpahapohap kaniya. Nahitabo ang susamang butang pipila ka semana sa ulahi sa dihang mipatim-aw nga ang hayop aktuwal nga nagpaabot kang Karen.
Milabay ang laing duha ka bulan, ug ang pipila ka obrero sa uma mitaho nga nakakita sa samang kudu nga may laang sa iyang liog. Misulay sila pagduol sa hayop aron kuhaon ang laang, apan midalagan ang hayop. Busa gipangita kini ni Karen sa lasang, nga nagpanawag samtang siya nangita. Sa taudtaod, kini migawas nga mipaatbang kaniya. Sa kamahunahunaon si Karen nagdalag tinapay, nga kinaham sa hayop, ug samtang ang maong kinaham nga pagkaon gitanyag, ang bana ni Karen nagputol sa makapadaot nga laang.
Kining dayag nga pagbinatiay nga milungtad ug dugay kaayo tali sa tawo ug sa hayop nakapahimuot pag-ayo sa maong pamilya.