Kon sa Unsang Paagi Pagaluwason ang Atong Atmospera

ANG mga tawo ba kinabubut-ong mohunong sa pagpunog hugaw sa atong kalangitan? Kini ba ang paagi nga luwason ang atong atmospera?

Dili. Ang pagluwas sa atong bililhong atmospera dili magdepende sa pagsunod sa tawo sa batok-polusyon nga mga kinahanglanon. Hinunoa, ang pagsalga sa Usang adunay kinalabwang awtoridad maoy magpatuman dili lang sa nahinloang atmospera kondili sa nahinloan usab nga yuta.

Nga ang Maglalalang may kahangawa sa atong yuta, ingon man usab sa kinabuhi ibabaw niini, gipadayag sa kahibulongang paagi sa iyang pagdesinyo niini. Kini iyang gibuhat aron molungtad sa panahong walay tino, bisan sa walay kataposan.​—Salmo 104:5, 24.

Mga Tagana Aron Mamentenar

Pananglitan, ang atmospera gilalang sa paaging kini magaayo ug maghinlo sa kaugalingon. Tagda ang ozone sa ibabawng atmospera. Ang panagang nga ozone sa kabatid gibuhat aron mosuhop kinig radyasyong ultraviolet nga makapatay sa mga tawo sa yuta. Sa samang panahon, kini motugot nga ang luwas nga kahayag nga gikinahanglan sa yutan-ong kinabuhi molagbas niini.

Atong nasayran sa sinugdan nga ang panagang nga ozone grabeng ginadaot sa ginamag-tawo nga mga chlorofluorocarbon, nga mokayab ngadto sa ibabawng atmospera. Sa unsang paagi ang panagang nga ozone kapulihan? Katingad-anan, gidesinyo kini sa Maglalalang sa paaging kini magaayo sa kaugalingon. Oo, ang ozone kanunayng gigama diha sa ibabawng atmospera​—ngani, pinaagi sa mao mismong peligrosong mga silaw nga gisala sa ozone pagawas! Busa sa panahon mismo nga ang polusyon sa tawo tuling nagadaot sa ozone, ginapuli ang diyutayng ozone.

Susama ang kahimtang sa ubos nga atmospera, diin hikaplagan ang kadaghanan sa kapig 5 quadrillion ka toneladang hangin. Ang mga siklo sa kinaiyahan daling magahinlo sa mga maghuhugaw gikan sa hangin sa talagsaong mga paagi. Ang The World Book Encyclopedia mikomento: “Ang hangin magsabwag sa mga maghuhugaw, ug ang ulan ug niyebe magbanlas niana nganhi sa yuta.”

Nan, tin-aw nga kon ihunong sa mga tawo ang paghugaw sa hangin, o ilimite pag-ayo ang maong polusyon, sa dili madugay ang hangin sa bisan diin mahimong lab-as ug humot. Apan ang basahong reperensiya sa ibabaw nag-ila sa suliran, nga nagsaysay: “Sa daghang dapit, ang mga maghuhugaw mas tuling gibubo ngadto sa hangin kay sa gihipos kana sa mga kondisyon sa panahon.”

Nan, sa unsang paagi pahunongon ang mahakogong paghugaw sa tawo sa atmospera?

Usa ka Nahinloang Yuta Haduol Na

Ang polusyon pahunongon pinaagi lamang sa Diyos mismo, inigsalga na niya. Ang Bibliya nagtagna nga siya ‘magdala ngadto sa kagun-oban niadtong mga nagagun-ob sa yuta.’ (Pinadayag 11:18) Dili siya motugot nga ang mahakogong mga tawo magpadayon paghugaw niining matahom nga yuta ug sa nagapatunhay-sa-kinabuhi nga atmospera niini sa panahong walay tino. Siya nagsaad: “Ang mga mamumuhat ug daotan mismo pagaputlon, apan kadtong nagalaom kang Jehova mao ang magapanunod sa yuta.”​—Salmo 37:9.

Sa unsang paagi pagalaglagon ang tanang mamumuhat ug daotan? Kini maoy pinaagi sa langitnong gobyerno sa Diyos, ang iyang Gingharian, nga maoy mopuli sa kulang-sa-katakos nga mga gobyerno sa tawo. Ang Bibliya nagsaad: “Ang Diyos sa langit magtukod ug usa ka gingharian nga dili gayod magun-ob. Ug ang gingharian mismo . . . magadugmok ug magatapos sa tanan niining mga gingharian, ug kini mismo mobarog sa mga panahong walay tino.” (Daniel 2:44) Kining Ginghariang kagamhanan sa Diyos mao ang kagamhanan nga gitudlo ni Jesus nga iampo sa iyang mga sumusunod: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.”​—Mateo 6:10.

Ang kabubut-on sa Diyos alang sa atong yuta mao nga ang mga tawo pagaharian sa iyang Gingharian ug sa ingon magpahimulos sa kinabuhi diha sa wala-mahugawi nga kalikopan. Kanay hinungdan nga ang Diyos hugot nga nagtinguhang ‘magdala ngadto sa kagun-oban niadtong mga nagagun-ob sa yuta.’ (Pinadayag 11:18) Pagkadako unya kana nga buhat sa pagluwas!

Handurawa nga magpuyo sa usa ka yutang wala na ang tanang polusyon nga gibubo sa mahakogong mga tawo ibabaw niini! Sa maong panahon ang atong bililhong atmospera mapasig-uli na sa maayong kahimtang. Kini mahitabo inigkatuman sa saad sa Bibliya: “Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”​—Pinadayag 21:3, 4; 2 Pedro 3:13.

Unsay kinahanglan nga pagabuhaton nimo aron maluwas ngadto sa matarong nga bag-ong kalibotan nga gisaad sa Diyos? Kinahanglang masayod ug mosunod ka sa mga pagtulon-an sa usang gipadala sa Diyos sa yuta ingong Iyang hawas. (Juan 3:16; 7:29) Kini siya, si Jesu-Kristo, miingon diha sa pag-ampo ngadto sa Diyos: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

[Hulagway sa panid 10]

Usa ka hinlo, wala-mahugawing paraisong yuta haduol na