Ang Bakos nga Moluwas ug mga Kinabuhi

“ANG paggamit ug bakos sa seguridad maoy usa sa labing epektibong mga paagi sa pagkunhod sa gidaghanon ug kagrabe sa mga kadaot sa mga bangga sa sakyanan,” matud sa Morbidity and Mortality Weekly Report (MMWR). Sumala sa usa ka pagtuon, ang riyesgo sa pagkamatay sa aksidente sa kotse nakunhoran ug 43 porsiento sa dihang ang mga pasahero migamit sa hustong paagi sa mga bakos sa seguridad. Ang riyesgo sa grabeng kadaot nakunhoran ug mga 50 porsiento.

Ang balaod sa paggamit ug bakos sa seguridad unang gipatuman sa Australianhong gobyerno niadtong 1970. Karon mga 35 ka nasod ang nag-obligar sa paggamit ug bakos sa seguridad. Ang mga malapason sagad pabayron ug mga multa ug sa pila ka kaso mameligro pang masuspender ang ilang mga pribilehiyo sa pagmaneho. Ang pila ka gobyerno nagpatuman ug mga balaod nga mag-obligar sa mga pasahero diha sa tanang lingkoranan (atubangan ug likod nga mga lingkoranan) sa paggamit ug mga bakos sa seguridad.

Ang MMWR nagtaho nga “ang gibanabanang 300,000 ka tawo mamatay ug 10-15 ka milyong tawo maangol kada tuig sa mga bangga sa sakyanan sa tibuok nga kalibotan.” Kanang mga numeroha makunhoran unta pag-ayo kon kanang tanang katawhan naggamit pa ug mga bakos sa seguridad.