Itaod ang Bakos Aron Malayo sa Peligro

◼ Sa Tinipong Bansa, ang mga aksidente sa sakyanan mao ang pangunang hinungdan sa kamatayon taliwala sa mga batan-on gikan sa 5 ngadto sa 24 anyos ang edad.

◼ Sa Hapon, ang mga aksidente sa dalan mao ang hinungdan sa kapin ug duha ka pilo nga mas daghang nangamatay kay sa kanser sa suso ug nagapatay sa upat ka pilo nga mas daghang tawo kay sa kanser sa prostate.

◼ Sa Uropa, ang mga aksidente sa sakyanan maoy hinungdan sa upat ka pilo nga gidaghanon sa nangamatay kay sa nangamatay gumikan sa pagbuno.

KINING makahahadlok nga estadistika nagpasiugda sa usa ka tinuod nga kapeligrohan sa pagbiyahe pinaagig awto​—ang katulin makamatay. Ug ang katulin nga ubos sa impluwensiya sa alkoholikong ilimnon motumbas sa pagbuno. Maayo na lang, ang kapeligrohan nga maaksidente ug maangol makunhoran. Sa unsang paagi kana posible?

Ang pag-ugmad ug mga batasan sa pagmaneho aron malayo sa peligro maoy usa ka maayong pagsugod. Ang ubang mga eksperto sa kahilwasan miangkon nga 9 sa 10 ka aksidente masanta o malikayan. Ang paglapas sa gitakdang katulinon, pag-agpas sa ubang mga kotse ug pagbalhinbalhin ug linya, pagdrayb nga duol kaayo sa gisundang sakyanan, pagmaneho nga ubos sa impluwensiya sa droga o alkoholikong ilimnon, ug pagmaneho sa dili maayong pagkamentinar nga sakyanan maoy pipila lamang ka pananglitan sa dili hilwas nga mga batasan sa pagmaneho. Ang pagtahod sa kinabuhi ug ang gugma alang sa atong isigkatawo angayng mopalihok kanato sa pagsagop sa mabinantayon ug responsableng tinamdan sa pagmanehog sakyanan.​—Mateo 7:12.

Ang mga bakos sa lingkoranan maoy laing yano, apan sagad wala tagda, nga paagi sa kahilwasan. Sumala kang Tim Hurd, usa ka tigpamaba sa Departamento sa Transportasyon sa T.B., “ang bakos sa kahilwasan mao ang labing epektibong paagi sa pagluwas sa imong kinabuhi diha sa usa ka aksidente. Kini magpadoble sa kalagmitan sa pagkaluwas.” Alang sa kinabataang mga pasahero, ang sukod sa pagkaluwas maoy halos triple kon sila mogamit sa hilwas nga mga lingkoranan sa kabataan.a

Bisan pa niini, gipakita sa mga surbi nga halos un-tersiya sa mga sumasakay sa de-pasaherong mga sakyanan sa Tinipong Bansa dili mogamit ug mga bakos sa lingkoranan. Ingong usa ka ginikanan, ginatino ba nimong ang imong kabataan luwas nga gibaksan sa ilang mga lingkoranan sa dili pa molarga? Ang panahon nga gugolon sa pagtaod ug bakos sa lingkoranan takos gayod niana.

[Footnote]