Ang Kinadak-ang Kahoyng Kasoy sa Kalibotan

SINULAT SA KORESPONSAL SA PAGMATA! SA BRAZIL

ANG kinadak-an sa kalibotan? Sumala sa Guinness O Livro dos Recordes 1994, kini mao ang kinadak-an. Nahimutang duol sa baybayon sa Rio Grande do Norte, ang kahoyng kasoy nga gihulagway dinhi tinong mao ang kinadak-an sa Brazil. Sa pagkatinuod, kining nag-inusarang kahoy sa pagkakaron nakaokupar ug usa ka dakong bloke sa siyudad​—nga katumbas sa 70 ka kasarangang-gidak-ong mga kahoyng kasoy!

Ang kahoyng kasoy maoy tropikal nga kahoy nga sagad lainlain ug gidak-on gikan sa gamayng punoan ngadto sa punoan nga duolag 20 metros ang gihabogon. Ang gagmayng mga bulak sa kahoyng kasoy kabaliskaran kaayo sa dako, baga nga mga dahon. Ang makaon nga liso niini mao ang lamiang nut nga kasoy, nga daw gipugos pagtisok diha sa pormag-peras nga bunga nga gitawag ug kasoyng peras. Katingad-an, ang kahoyng kasoy may pagkasamag matang sa alingatong, ug kadtong mogunit niini kinahanglang mag-amping. Ang nut adunay duha ka panit, ug sa tunga niining panita mao ang lana nga makapabutligbutlig sa panit. Maayo na lang, ang pagsangag magkuha sa makahilong mga sangkap sa nut.

Kahibulongan, ang pormag-rinyon nga nut daw nagtubo sa gawas sa bunga, nga morag ang Magbubuhat niini nakalimot sa nut ug giapas na lang kini pagpilit diha niana. Ang bunga nagsangga sa nut. Busa, gitawag sa uban ang nut nga ang tinuod nga bunga sa kahoy. Bisan hain pa niini, hunahunaa lang, sa sunod higayong mokaon kag mga nut nga kasoy, basin ug nagkaon ka sa bunga sa kinadak-ang kahoyng kasoy sa kalibotan!