Nanubo ang Espirituwal nga mga Bulak Gikan sa Brewery Gulch
SA DUGAY na kaayong panahon ang bolkanikong kalihokan nagtunaw sa tumbaga, plata, ug bulawan sa kinailadman sa yuta. Ang presyur sa alisngaw nagpagawas sa dakong bahin niini nga mga mineral pinaagi sa mga gintang ug nagdeposito niini sa gitawag karong Mule Mountains sa habagatan sa Arizona, T.B.A. Niadtong 1877, si Jack Dunn, usa ka manunuhid sa kasundalohan nga natudlo duol sa Fort Huachuca, nagpangitag tubig ug nakakitag pamatuod niining hilabihan ka daghang mineral nga bahandi. Nakigsabot siya kang George Warren, usa ka tigsuhid ug mina, aron maangkon ang yuta nga pagaminahon.
Sa pagkadili-matinud-anon hilom nga giparehistro ni George Warren sa iyang ngalan ang daghang parsela sa yuta nga adunay daghang mineral nga wala pahibal-a ang iyang kauban, si Jack Dunn. Kining yutaa nga iyang giangkon magpadato unta pag-ayo kang Warren, apan naapektohan sa sobrang pag-inom ug wiski, sa kabuang gisugal niya ang iyang mga nadiskobrehan sa usa ka lumba, nga nagpusta nga maunhan niyag dagan ang usa ka kabayo. Siyempre, nawad-an siya sa tanan. Kining giangkong yuta sa ulahi nahimong ang Queen Mine. Sa milabay ang daghang tuig, ang dagkong mga operasyon sa pagmina nakakuha ug halos upat ka milyong tonilada sa tumbaga ug di-masukod nga gidaghanon sa bulawan ug plata gikan sa Mule Mountains sa wala pa magsira ang mga minahan niadtong 1975.
Ang pagmina sa gahing bato nagkinahanglan ug mga minero sa gahing bato. Kini sila gidala dinhi gikan sa Alemanya, Inglaterra, Irlandia, Italya, ug Serbia. Tungod sa maayong suweldo nga gitanyag sa kadaghanang minahan, ang mga minero sa gahing bato maoy mga kugihang mga minero usab. Sanglit kining maong mga minero libolibo ka milya ang kalayo gikan sa ilang mga pamilya, sila usab nangahimong palainom nga mga minero—busa usa ka mapangarisgohong Aleman nga tighimog serbesa nagtukod ug himoanag serbesa duol sa mga minahan. Ang himoanan naghimog serbesa nga diyutayng pagproseso lang ang gikinahanglan sa dili pa imnon. Daghan ang gusto nga idalit kining bugnaw, diha sa mahigalaong kahimtang, ug uban sa pipila ka kalingawan. Busa, diha sa dalan nga duol sa himoanag serbesa, daghang bar ang gitukod. Kini napuno sa kugihan, palainom nga mga minero sa gahing bato. Ang kalingawan gitagana, sa ato pa, pagpamampam ug sugal uban sa alkohol—usa ka kombinasyon nga makapatunghag delikado kaayo nga mga kahimtang. Kini nga kalye nailhan nga Brewery Gulch ug may reputasyon nga peligroso kaayo kay sa makuyaw nga lungsod sa Tombstone, nga 40 kilometros lamang sa unahan.
Sa ulahi, ang kadaghanan sa mga minero nangaminyo ug nagtukod ug mga balay nga kapuy-an sa ilang mga pamilya. Ang mga minero gikan sa Inglaterra nagtukod ug mga balay nga kapuy-an sa Ingles nga mga minero sa ika-19ng siglo; kadtong gikan sa Serbia, mga balay sa mga minero sa Serbia; Alemanya, Aleman; Italya, Italyanhon; ug sa Irlandia, Irish. Ang orihinal nga siyudad, ang karaang Bisbee, gitukod sa titip-ug-kilid nga pangpang, busa ang mga balay niini gitukod sa tibuok bahin sa kilid sa pangpang, basta may dapit pa nga katukoran diha sa batoon nga yuta. Kining talagsaong tapok sa mga balay sa kadugayan gipuy-an sa kapin ug 20,000 ka tawo, ang kadaghanan mga minero ug ilang mga pamilya, ug kini karon nagpahugop sa mga turista gikan sa tibuok kalibotan. Ang lungsod ginganlag Bisbee gikan sa usa ka tawo nga namuhonan ug dako kaayo sa mga minahan apan wala makataak sa lungsod nga nagdala sa iyang ngalan.
Samtang nagdako ang lungsod, nagdaghan usab ang mga bar sa Brewery Gulch. Sa usa ka higayon kapin sa 30 ka bar ang gipadagan sa duha lamang ka bloke nga luna, ug midaghan usab ang kabudok diha sa gulch.
Ang pipila ka pamilyang mga Saksi mibalhin sa Bisbee sa mga 1950. Ang ilang pagsangyaw mitultol sa pagporma sa usa ka kongregasyon sa mga Saksi ni Jehova, nga mitubo ngadto sa 12 ka membro sa pagka-1957. Gikinahanglan nila ang dapit nga tigomanan, busa nag-abang sila ug balay nga maarangan nila pagbayad—usa nga atbang sa tindahan sa Brewery Gulch, tabok sa dalan gikan sa kantina nga St. Elmo. May pipila ka problema sila sa mga tawo nga mag-anhaan kanunay sa imoral nga mga negosyo nga naglibot kanila. Usahay usa ka hubog nasaag sa panahon sa tigom sa gabii apan molingkod lang sa likod ug mamati—ang uban mohatag gani ug donasyon sa dili pa mobiya.
Sa ulahi ang kongregasyon mipalit ug yuta aron tukoran ug usa ka Kingdom Hall—11 ka kilometro gikan sa Brewery Gulch ug sa imoral nga kahimtang niini. Ang tigomanan gitukod ug gipahinungod niadtong 1958. Ang tinukod gibag-o ug gipadako sa tulo ka beses ug nagamit gihapon ug maayo sa kongregasyon.
Sa dihang gisira ang mga minahan niadtong 1975, ang lungsod halos nasira duyog kanila. Ang mga minero ug ang ilang mga pamilya namalhin sa mga lungsod nga may gipadagan pang mga minahan. Kadtong mga molupyo nga nagpabilin kadaghanan retirado na nga mga minero ug ilang mga pamilya.
Ang nabantog nga Brewery Gulch nahimong atraksiyon na lamang sa mga turista. Usa na lang ka bar ang gipadagan didto, ug ang tinukod nga himoanag serbesa sa pagkakaron maoy usa na ka restawran sa pamilya. Ang kabudok giguba, apan ang mga timaan niini makita pa diha sa mga koral sa palibot sa mga balay diha sa lugar. Kini hinimo sa tayaong mga espring sa katre ug mga bayanan. Ang niadto imoral kaayo nga Brewery Gulch karon usa na lamang ka kahibudnganan nga makadani sa mga maukiton.
Sa pagkakaron ang kongregasyon adunay 48 ka magmamantala ug nagdaghan. Ang pagsangyaw sa balay ug balay makaiikag kaayo. Nahibalag sa mga Saksi ang retiradong mga minero nga gikan gayod sa Alemanya, Inglaterra, Irlandia, Italya, ug Serbia ug usab ang daghang dibuhista, nga ang uban kanila nagdispley sa ilang dibuho sa atubangan sa ilang mga kayda.
Ang bahin sa pag-uswag maoy tungod sa pag-undang sa usa ka babaye nga magkanunayan niadto sa usa ka nagpabiling gubot nga bar sa Brewery Gulch, nga gitawag ug St. Elmo. Ang iyang ngalan mao si Julie. Dili lamang kay tig-adto si Julie didto kondili usa siya sa samokan nga mga ahente. Siya miduyog niadto sa tanang nagkalainlaing imoral nga kalingawang gitanyag, lakip sa kanunay nga pagpakig-away, usahay batok sa mga lalaki. Si Julie nadani sa mensahe sa mga Saksi ni Jehova tungod sa dako kaayo nga kalainan diha sa mga tawo nga nakaduaw sa iyang pultahan. Kinahanglang maghimog dakong kausaban si Julie, ug kini miabot ug daghang tuig, apan siya karon usa na ka aktibo, bawtismadong Saksi. Ang iyang bana ug tulo ka anak tigtambongan usab nga regular sa mga tigom ug nag-uswag.
Ang Bisbee nahimong usa ka lungsod tungod sa geolohikanhong bahandi nga nadeposito didto sa daghang katuigang milabay. Ang mga lalaki wala na mangita niana, apan daghan ang nagpangita sa matuod nga bahandi, ang kahibalo sa matuod nga Diyos, si Jehova, ug sa iyang Gingharian. Ang kahimtang sa palibot sa karaang Kingdom Hall sa Brewery Gulch maoy dunot gayod sa moral, apan ang espirituwal nga mga bulak giatiman sulod niana nga tigomanan. Sa orihinal nga 12 ka magmamantala nga nagtigom sa karaang tigomanan, 7 maoy regular payunir. Dihay pito usab ka mga bata. Nagpatim-aw nga ang maayong espirituwal nga kahimtang nga ginatagamtam niining gamay masibotong grupo sulod sa tigomanan nangibabaw sa imoral nga kahimtang sa gawas.
Unom niining mga bataa misulod sa pipila ka matang sa bug-os-panahong pag-alagad ingong mga ministro sa mga Saksi ni Jehova. Si John Griffin nakaeskuyla sa Watchtower Bible School of Gilead. Bisag wala na sa misyonaryong pag-alagad, siya nag-alagad gihapon kang Jehova ingong ansiyano sa nasod diin siya natudlo, sa Costa Rica. Ang iyang igsoong babaye, si Carolyn (Jasso na karon), maoy usa ka regular payunir sa Sierra Vista, Arizona. Si Nancy Pugh nakaeskuyla usab sa Gilead, nag-alagad ingong misyonaryo sa Chile, ug atua gihapon didto, bisag dili na misyonaryo. Ang iyang igsoong lalaki, si Peter, nagpayunir ug miadto sa Espanya sa pag-alagad diin dihay panginahanglan. Si Susan ug Bethany Smith regular nga mga payunir sa Bisbee sa tingob nga total nga 50 ka tuig ug nag-alagad gihapon didto.
Ang Pulong sa Diyos sa pagkatinuod “gamhanang nagalihok,” bisan ngadto sa sukod sa pagpatubo ug espirituwal nga mga bulak sa Brewery Gulch. (Hebreohanon 4:12)—Tinampo.
[Hulagway sa panid 23]
Ang Kingdom Hall niadto nahimutang sa ibabaw nga andana niini nga tinukod