Sa kataposan—Usa ka Kagamhanan nga Magwagtang sa Krimen

GITAGNA sa Bibliya nga sa atong adlaw ang mga tawo mahimong “mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo.” (2 Timoteo 3:2, 3) Kanang mga matanga sa mga tawo mohimog mga krimen.

Sanglit mga tawo ang mohimog mga krimen, sa sukod nga sila magbag-o, ang krimen makunhoran. Apan dili gayod sayon nga ang mga tawo magbag-o. Karong adlawa kini labi pang lisod kay sukad masukad, kay sukad sa 1914, usa ka petsang gitino sa kronolohiya sa Bibliya, kita nagpuyo na sa “kataposang mga adlaw” niining sistema sa mga butang. Sumala sa gitagna sa Bibliya, kining yugtoa gitiman-an sa “makuyaw nga mga panahong lisod sagubangon.” Kining makuyaw nga mga panahon gipahinabo ni Satanas nga Yawa, ang labing dakong kriminal, kinsa may “dakong kasuko, kay nahibalo nga siya may mubo nga yugto sa panahon.”​—2 Timoteo 3:1; Pinadayag 12:12.

Kanay katin-awan sa pagsulbong karon sa krimen. Si Satanas nahibalo nga siya ug ang iyang sistema duol nang pagalaglagon. Sulod sa mubo nga nahibiling panahon, mangita siya sa tanang paagi nga posible sa pagpausbaw diha sa mga tawo sa daotang mga kinaiya nga gihisgotan sa 2 Timoteo kapitulo 3. Sa ingon, aron mawagtang sa usa ka kagamhanan ang krimen, kinahanglang magwagtang kini sa impluwensiya ni Satanas ug magtabang usab sa mga tawo nga magbag-o aron sila dili na molihok sumala sa gibatbat sa ibabaw. Apan may kagamhanan ba nga may katakos sa paghimo niining labaw-tawhanong tahas?

Walay tawhanong kagamhanan ang may katakos sa pagbuhat niini. Si J. Vaskovich, usa ka magtutudlog balaod sa Ukraine, misugyot sa panginahanglan sa “komon nga pundok nga may katakos, aron maghiusa ug maghikay sa mga paningkamot sa tanang estado ug publikong mga organisasyon.” Ug si Presidente Fidel Ramos sa Pilipinas mipahayag sa usa ka tibuok-kalibotang komperensiya bahin sa krimen: “Tungod kay ang teknikal nga mga kauswagan daw nagpagamay sa atong kalibotan, ang krimen nakatabok sa nasodnong mga utlanan ug nahimong lapaw-nasod nga problema. Busa ang mga solusyon kinahanglang lapaw-nasod usab.”

“Usa ka Tibuok-Kalibotang Trahedya”

Ang Hiniusang Kanasoran maoy usa ka lapaw-nasod (internasyonal) nga organisasyon. Sukad sa pagkatukod niini, kini naningkamot sa pagpukgo sa krimen. Apan kini walay mga solusyon sama ra sa nasodnong mga kagamhanan. Ang librong The United Nations and Crime Prevention nag-ingon: “Ang sulod-nasod nga krimen dili na maapsan pagkontrol sa kadaghanang tinagsa ka mga nasod ug ang lapaw-nasod nga krimen migrabe nga dili na maabot karon sa internasyonal nga komunidad. . . . Ang krimen pinaagi sa organisadong mga pundok kriminal milapnag sa makalilisang nga mga sukod, nga may linaing grabeng mga resulta kon bahin sa lawasnong kabangisan, panghulga ug korapsiyon sa opisyales sa kagamhanan. Tungod sa terorismo nakalas ang kinabuhi sa tinagpulo ka libong inosenteng mga biktima. Ang mapahimuslon nga pagbaligya ug makapagiyan nga narkotiko nahimong usa ka tibuok-kalibotang trahedya.”

Si James Madison, ikaupat nga presidente sa Tinipong Bansa, kas-a miingon: “Sa pagtukod ug usa ka kagamhanan nga gidumala pinaagig mga tawo nga magamando sa ubang mga tawo, ang dakong suliran nahimutang niini: kinahanglan una nga ang kagamhanan makagahom sa gimandoan; ug dayon obligahon kini nga gamhan ang kaugalingon.” (Itandi ang Ecclesiastes 8:9.) Busa ang mithianong solusyon mao nga pulihan ang mga kagamhanan nga “gidumala pinaagig mga tawo nga magamando sa ubang mga tawo” sa usa ka sistema nga ang Diyos maoy magamando. Apan realistiko ba kanang solusyona?

Ang Kagamhanan nga Magwagtang sa Krimen

Ang matuod nga mga Kristohanon nagtuo sa giingon sa Bibliya bahin sa Gingharian sa Diyos.a Usa kini ka matuod nga kagamhanan. Bisan pag ang Gingharian dili makita tungod kay atua sa langit, makita ang mga nahimo niini sa yuta. (Mateo 6:9, 10) Kini gilangkoban ni Kristo Jesus ug sa 144,000 ka tawo nga gikuha “gikan sa matag tribo ug dila ug katawhan ug nasod . . . [nga] magamando ingong mga hari ibabaw sa yuta.” Kining gamhanang kagamhanan magamando ibabaw sa “usa ka dakong panon” sa mga ginsakpan kinsa, sumala sa gitagna sa Bibliya, nagagikan usab “sa tanang kanasoran ug mga tribo ug mga katawhan ug mga dila.” (Pinadayag 5:9, 10; 7:9) Busa, ang mga magmamando ug ang mga ginsakpan maoy gikan sa lainlaing nasod, nga usa ka tinuod nga nahiusang katawhan gikan sa tanang kanasoran, nga giuyonan sa Diyos.

Kay midawat sa pagmando sa Diyos, ang mga Saksi ni Jehova kasagarang nakabuntog sa problema sa krimen sa ilang taliwala. Sa unsang paagi? Pinaagi sa pagkat-on sa pagpabili sa kaalam sa mga prinsipyo sa Bibliya, pinaagi sa pagpadapat niana diha sa ilang mga kinabuhi, ug pinaagi sa pagtugot nga sila mapalihok sa labing gamhanang puwersa sa uniberso, ang espiritu sa Diyos, ug ang bunga niini​—ang gugma. Ang Pulong sa Diyos nag-ingon: “Isul-ob sa inyong kaugalingon ang gugma, kay kini usa ka hingpit nga bugkos sa panaghiusa.” (Colosas 3:14) Sa kapig 230 ka nasod, ang mga Saksi ni Jehova nagpadapat sa maong gugma ug panaghiusa, nga nagpasundayag kon sa unsang paagi ang Gingharian sa Diyos naghimo nag mga tikang aron pagwagtang sa krimen.

Ikailustrar kini sa mga resulta sa usa ka surbi sa 1994 diin 145,958 sa mga Saksi ni Jehova sa Alemanya misalmot. Daghan kanila miangkon nga ilang gibuntog gayod ang grabeng mga kahuyangan aron mahimong mga Saksi. Sila natukmod sa pagbuhat niana tungod sa ilang pagtuon sa Bibliya. Pananglitan, 30,060 mibuntog sa pagkagiyan sa tabako o droga; 1,437 miundang sa pagsugal; 4,362 nagtul-id sa mabangison o kriminal nga panggawi; 11,149 mibuntog sa mga kinaiya nga sama sa pangabugho o pagdumot; ug 12,820 nagpasig-uli sa kalinaw sa panimalay ngadto sa gubot nga pamilyahanong kinabuhi.

Bisan pag ang maong mga kaplag naglangkit sa mga Saksi ni Jehova sa usa lamang ka nasod, sila mahulagwayon sa mga Saksi sa tibuok kalibotan. Tagda, pananglitan, ang usa ka batan-ong taga-Ukraine nga ginganlag Yuri. Sa misugod siya pagtuon sa Bibliya uban sa mga Saksi ni Jehova, siya mangunguot. Miadto pa gani siya sa Moscow diin siya nahibalo nga tungod sa daghang tawo mahimong mas sayon ang iyang “trabaho.”

Sa 1993, si Yuri didto na usab sa Moscow, taliwala sa panonpanon sa mga tawo. Apan sa kapig 23,000 ka tawong presente sa Locomotive Stadium sa Biyernes, Hulyo 23, walay usa ang nahadlok gayod kaniya, kay niadtong panahona usa na siya sa mga Saksi ni Jehova. Sa tinuoray, si Yuri didto sa entablado nga may bahin sa programa nga gipasundayag ngadto sa internasyonal nga mamiminaw. Kay nagbag-o na, siya nagsunod sa sugo sa Bibliya: “Ayaw na papangawata ang kawatan.”​—Efeso 4:28.

Ubay-ubay pang sama kang Yuri nagbiya sa kriminal nga kinabuhi aron mahimong takos alang sa kinabuhi sa bag-ong kalibotan sa Diyos sa pagkamatarong. Nagpasiugda kini sa kamatuoran sa giingon ni Sir Peter Imbert, kanhi Britanikong opisyal sa kapolisan: “Ang krimen dali kaayong makontrol kon ang tanan andam sa pagpaningkamot.” Ang programa sa edukasyon sa Bibliya nga gitanyag sa kagamhanan sa Diyos maghatag sa maminatud-og-kasingkasing nga mga tawo ug panukmod nga ilang gikinahanglan “sa pagpaningkamot.”

Usa ka Kalibotang Walay Krimen

Ang krimen sa bisan unsang dagway nagpadayag sa kakulang ug gugma alang sa uban. Ang mga Kristohanon nagsunod sa panig-ingnan ni Jesus, kinsa miingon: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” Ug, “Higugmaon mo gayod ang imong silingan ingon sa imong kaugalingon.”​—Mateo 22:37-39.

Ang bugtong kagamhanan nga debotado sa pagwagtang sa krimen pinaagi sa pagtudlo sa mga tawo sa pagsunod niining duha ka sugo mao ang Gingharian sa Diyos. Karong adlawa, kapig lima ka milyong Saksi ni Jehova ang nakapahimulos sa maong pagpanudlo. Determinado sila nga ang kriminal nga mga kiling dili makagamot diha sa ilang mga kasingkasing, nga andam mobuhat sa personal kon unsay gikinahanglan aron makatabang ngadto sa walay-krimen nga kalibotan. Ang nahimo sa Diyos diha sa ilang mga kinabuhi mao lamay pasiuna kon unsay iyang pagabuhaton diha sa iyang bag-ong kalibotan ilalom sa pagmando sa iyang langitnong kagamhanan. Tiaw na nga usa ka kalibotan diin ang mga polis, mga huwes, mga abogado, o mga prisohan dili na kinahanglan!

Ang pagpatuman niini sa tibuok-kalibotang gilapdon maglangkit sa kinadak-ang kausaban sa kagamhanan sa kasaysayan, nga ipahinabo sa Diyos mismo. Ang Daniel 2:44 nag-ingon: “Sa mga adlaw nianang mga hari [nga nagalungtad karong adlawa] ang Diyos sa langit magatukod ug usa ka [langitnong] gingharian nga dili gayod malaglag. Ug ang gingharian mismo dili igapasa ngadto sa bisan unsang laing katawhan. Kini magadugmok ug magalaglag niining tanang gingharian, ug kini mismo mobarog sa mga panahong walay tino.” Ang Diyos magadugmok usab kang Satanas, nga magwagtang sa iyang tuman-kadaotang impluwensiya.​—Roma 16:20.

Sa dihang ang tawhanong mga kagamhanan pulihan na sa langitnong kagamhanan sa Diyos, ang mga tawo dili na gayod magmando pa sa usag usa. Ang langitnong mga hari​—mga hari nga labaw pa kay sa mga manulonda​—magatudlo sa katawhan diha sa mga dalan nga matarong. Unya, wala nay mga pagpatay sa lipot, mga atake pinaagig makahilong gas, o mga bomba sa mga terorista! Wala nay sosyal nga mga inhustisya nga nagpasanay sa krimen! Wala nay mga adunahan ug mga walay-nahot!

Si Propesor S. A. Aluko, sa Obafemi Awolowo University sa Nigeria, mipahayag: “Ang mga kabos dili makatulog sa magabii tungod kay sila gigutom; ang mga dato dili makatulog tungod kay nagmata ang mga kabos.” Apan sa dili madugay ang matag usa makatulog nang hinanok kay nahibalo nga ang kagamhanan​—ang kagamhanan sa Diyos​—sa kataposan nakawagtang na sa krimen!

[Footnote]

[Hulagway sa panid 10]

Usa ka kanhi kawatan ug iyang biktima, karon nahiusa ingong Kristohanong managsoon