Gikan sa Among mga Magbabasa

Pinaakan sa Halas Isip usa ka propesyonal nga herpetologist, ako mao ang responsable sa pag-atiman ug pagkupot sa mga halas ingon man pagkuha sa ilang lala. Ang mga artikulong “Buot ba Nimong Mahimamat ang Kobra?” (Marso 22, 1996), “Habu​—​Usa ka Halas nga Angayng Dili Hilabtan” (Hulyo 8, 1996), ug “Peligro! Ako Malala” (Agosto 22, 1996) ngatanan nagpadayag ug positibong tinamdan bahin sa kalalangan ni Jehova. Bisan pa niana, buot kong ipunting nga ang mga torniki wala isugyot alang sa mga pinaakan sa halas. Ang kadaghanang tawo dili makapadapat niana nga tukma, ug ang pipila nawad-an ug mga tiil o bukton ingong resulta. Kusganon kong iduso ang paggamit ug hugot nga bendahe aron bugkosan ang tibuok nga tiil o bukton nga may samang kahugot sa pagbugkos sa napiang nga tikod o pulso. Samtang ang lala gihuptang duol lamang sa napaakang tiil o bukton, magpadayon ang abiyo sa dugo, nga magpabiling “buhi” ang tiil o bukton.

P. R., Inglaterra

Ubay-ubayng bag-ong medikal nga mga teksbok ang mouyon niining puntoha, ug gipasalamatan namo ang among magbabasa sa maong katin-awan.​—ED.

Ang “Raven” Nasakit ako sa panahong migawas ang artikulong “Ang ‘Raven’​—Unsay Nakapalahi Niini?” (Enero 8, 1997) Halos walay bisan unsa ang nakapahimo nako sa pagpahiyom. Apan ang kamamugnaon sa raven nagpakatawa nako. Sa ulahi, akong giandam ang usa ka taho sa tunghaan bahin sa mga langgam, nga gigamit ang impormasyon gikan sa mga artikulo sa Pagmata! Akong nakuha ang taas kaayong grado niana!

J. B., Slovakia

Mga Depekto sa Pagkakat-on Salamat alang sa seryeng “Tabang Alang sa Kabataan nga May Depekto sa Pagkakat-on.” (Pebrero 22, 1997) Ako nagpalakaw ug usa ka pribadong tunghaan ug naghimog mga seroks nga kopya alang sa akong mga magtutudlo. Akong gipasukad usab ang mga sulat-balita diha sa impormasyon sa inyong magasin. Salamat alang sa balanseng paghisgot ninyo niining mga ulohana.

E. G., Honduras

Ako ang ehekutibong direktor sa kinadak-ang dili-moganansiya nga organisasyon sa nasod nga aktibong naglihok alang sa mga bata ug mga hingkod nga may ADD. Angay kamong dayegon tungod sa inyong mahunahunaong mga artikulo bahin sa Attention Deficit Hyperactivity Disorder (ADHD) ug Attention Deficit Disorder (ADD). Kini maoy makapainutil ug kasagarang nasaypan-pagsabot nga mga suliran. Among gipabilhan ang inyong pag-ila nga ang hustong dayagnosis ug naprobahang mga tambal karon naghatag ug kaayohan sa daghang indibiduwal nga nangitag tabang. Ang inyong pasiugda sa ginikananhong gugma ug pagkamasinabtanon nagpasa usab ug hinungdanong mensahe.

L. R., Tinipong Bansa

Duna koy anak lalaki nga may ADHD, ug nalisdan kaayo ako sa pagdawat sa kamatuoran nga siya dili lamang usa ka samokan nga bata. Daghang di-malulutong mga komento gipahayag, sama sa, “Ngano bang dili man nila siya disiplinahon?” Kining mga komentoha makapasakit kaayo tungod kay akong gigugol ang dako kaayong panahon sa pagpaningkamot sa pagdisiplina kaniya. Nanghinaot ako nga ang inyong katin-awan sa maong suliran motabang sa uban sa pagkaamgong anaay tinuod nga suliran ug nga ang uban mahimong mas makapalig-on.

M. T., Tinipong Bansa

Inyo lamang mahanduraw kon unsa ka dako nga kami, ingong mga ginikanan sa usa ka batang may depekto sa pagkakat-on, nalipay kaayo niining isyuha. Gipabilhan namo ilabina ang inyong paghisgot kon sa unsang paagi apektado niini ang mga ginikanan ug nga kami dunay igong palas-anon nga abagahon nga dili na kinahanglang makabatig makapasakit nga mga komento gikan sa uban.

J. C. ug B. C., Canada

Higala sa Diyos Salamat kaayo sa artikulong “Mga Batan-on Nangutana . . . Sa Unsang Paagi Ako Mahimong Higala sa Diyos?” (Pebrero 22, 1997) Nakatabang kinig dako kanako. Karon ako kontento, kay karon akong nasabtan nga si Jehova maoy akong higala! Dili na ako makahulat sa artikulo bahin sa kon unsaon pagpadayon ang maong panaghigala.a

T. E., Italya

[Footnote]