Gikan sa Among mga Magbabasa

Morse Code Nagakawala Na? Ang bahin nga “Ang ‘Morse Code’ Nagakawala na sa Ika-150 ka Tuig Niini,” nga migula sa “Pagpaniid sa Kalibotan,” makahatag ug sayop nga pagsabot. (Agosto 8, 1997) Ang Morse Code gigamit gihapon sa mga transmitter sa radyo sa paglawig para sa mga ayroplano ug sa mga pagsibya sa short wave nga radyo.

H. K., Netherlands

Salamat sa paghatag ug pagtagad niini. Sumala sa hustong giingon sa among magbabasa, ang “pagkawala” sa Morse code nga among gitaho espesipikong nagtumong sa mga palakaw sa barko.​—ED.

Tesis Akong gipabilhan ang seryeng “Tesis​—Ang Pagbalik sa Usa ka Mamumuno.” (Disyembre 22, 1997) Natakboyan akog TB sa 1988 ug naulian. Husto kamo sa pagpunting nga ang mga pasyente kinahanglang motomar sa ilang tambal sa “walay pakyas nga pagkaregular.”

Y. L., Pransiya

Ang akong ugangang babaye, kinsa walay hilig sa relihiyon, nakakita sa artikulo diha sa akong lamesa ug gibasa kini. Mihangyo siya kon mahimo ba niya kining dad-on pauli. Nakapahiluna ako kaniyag duha ka uban pang mga isyu sa Pagmata! Salamat sa tanang paghago nga inyong gihimo aron makapatungha sa kada magasin.

L. N., Tinipong Bansa

Natakboyan akog TB 11 ka tuig kanhi. Ang impormasyon nga gipresentar tukma kaayo. Usahay, ang pagbasa niini samag subli sa akong kaugalingong kasinatian. Nagpasalamat ako kang Jehova tungod sa gasa sa kinabuhi ug sa makanunayong tambag nga among madawat sa Pagmata! aron maampingan ang among panglawas.

G. B., Italya

Natakboyan ako niining sakita ug nailalom sa pagtambal sulod sa unom ka bulan. Ang inyong artikulo nagtabang kanako nga masayod ug dugang maylabot niining makamatay nga balatian. Mas hinungdanon, nakatabang kini kanako nga ugmaron ang akong pagtuo nga ang Gingharian sa Diyos magdalag tibuok yutang sulbad alang niining sulirana.

P. P., Indonesia

Sugilanon sa Kinabuhi Ang artikulong “Husto Kanunay ang Pumapalit” nakatandog gayod sa akong kasingkasing. (Disyembre 22, 1997) Si Wei Tung Chin may unom ka anak; maingon man usab ako. Midagayday ang mga luha gikan sa akong mga mata samtang gisaysay niya ang iyang estorya. Nahibalo kong gipasigarbo niya ang iyang mga anak ug ang ilang mga pamilya. Upat sa akong kaugalingong mga anak wala pa modawat sa Kristiyanidad ingong ilang dalan sa kinabuhi. Tingali sa pila ka adlaw masinati nako ang iyang matang sa kangaya.

E. H., Tinipong Bansa

Kanunay nakong makaplagan ang mga sugilanon sa kinabuhi diha sa Pagmata! nga makapadasig kaayo. Ang sugilanon ni Wei Tung Chin nakatandog kanako pag-ayo. Pagkamalipayon nato nga ang maong bililhong mga tawo maoy bahin sa katawhan nga ginatigom ni Jehova.

I. T., Alemanya

Sayop nga Paghingalan! Buot ko kamong pasalamatan sa makapainteres nga artikulong “Ang Katahom sa Nasodnong mga Parke sa Alpino.” (Nobyembre 22, 1997) Sanglit moangay akog kabukiran ug pagkuhag letrato, nakabaton akog kalipay sa pagkakita ug pagkuhag letrato sa tanang mananap nga gihubit niining artikuloha. Apan, nagtuo ko nga dunay sayop sa kapsiyon sa hulagway sa ibabaw sa panid 15. Nagtuo kong ang mga mananap nga gipakita, dili chamois, kondili baye nga ibex.

M. D. M., Italya

Buot namong pasalamatan ang among magbabasa nga nakita ang maong sayop.​—ED.

Moscow Salamat sa artikulong “Moscow​—Ika-850ng Anibersaryo Niini.” (Disyembre 22, 1997) Ang Rusong pagkamaabiabihon ug pagkamahigalaon makapatandog gayod. Ako nakasinati niini mismo sa 1989, sa dihang 3,000 ka Ruso ang miabot alang sa Kristohanong kombensiyon sa Polandia. Ang kataposang panid niana nga isyu, nga nagpakita sa usa ka Ruso nga igsoong babaye nga nagsangyaw sa kabanikahan sa Rusya, makapatandog usab. Hinaot nga tugotan ni Jehova ang daghan pang nagsultig-Ruso nga katawhan nga mahimong iyang mga magsisimba!

I. L., Alemanya