Human sa Bagyo, Nangibabaw ang Kristiyanidad

SINULAT SA KORESPONSAL SA PAGMATA! SA MOZAMBIQUE

SA GABII sa Marso 2, 1998, ang siyudad sa Maputo, Mozambique, gihapak sa usa ka mapintas nga bagyo. Sa pagkabuntag, ang kadaot nga gipahinabo sa bagyo makita bisan asa. Ang napukang mga kahoy nagkatag diha sa yuta ubay sa baybayon, ang mga dalan nadaot tungod sa nagpungasi nga tubig, nanglupad ang mga atop sa pipila ka balay, ug ang ubang mga balay nangahugno.

Ang mga tinukod sa sangang buhatan sa mga Saksi ni Jehova lig-ong mibarog. Apan ang balay sa silingan, usa ka yanong kahoyng tinukod nga may atop nga sin, wala gayod makasugakod. Ang balay huyang kaayo nga mosukol sa kusog nga hangin, ug kini nahugno. Makapalipay, ang tanan nga diha sa balay, usa ka babaye ug iyang lima ka anak, buhi ug wala maunsa. Hinunoa, sa materyal nga bahin sila nawad-an sa halos tanan.

Sayo sa buntag, ang mga boluntaryong trabahante gikan sa sangang buhatan sa Watch Tower Society miduaw sa pamilya ug nakita silang nagsalbar sa ilang pipila ka butang gikan sa nalumpag. Ang ilang materyal nga kapildihan nagpasamot sa ilang kasubo, tungod kay wala silay igong salapi sa pagtukod pag-usab sa ilang balay. Kay walay amahan, ang pamilya may diyutay lamang nga kita, nga gikan sa pagbaligyag mga pagkaon diha sa lokal nga tiyanggihan.

Human nga masusi ang kahimtang, ang mga Saksi ni Jehova mitabang gilayon. Napiho nga ang nahibiling materyales sa tinukod gikan sa kanhing gambalay dili na angayan nga gamiton pag-usab. Busa gitigom sa usa ka tem sa boluntaryong mga trabahante ang tanang kinahanglanong mga materyales ug misugod sa pagtukod ug usa ka gamayng lig-ong balay.

Sa primero ang mga silingan mausisaon, apan wala madugay sila nahingangha, samtang ilang nakita kon unsa ka dali nga miuswag ang trabaho. Sulod sa lima ka adlaw ang balay bug-os nga natukod pag-usab ug andam na nga puy-an. Sa pagsulod sa iyang bag-ong balay, ang babaye wala makatingog. Hinunoa, ang mga pulong dili kinahanglanon, kay ang kalipay sa inahan ug sa iyang mga anak maoy dayag sa dihang nakita sa mga trabahante ang ilang mapahiyomong mga nawong ug mga mata nga tugob sa lalom nga apresasyon.

Ang mga boluntaryo malipayon usab. Nalipay sila nga nakabatog kahigayonan nga ipasundayag diha sa praktikal nga paagi ang espiritu sa tinuod nga Kristiyanidad.—Galacia 6:10.

[Mga hulagway sa panid 13]

Marso 5

Marso 6

Marso 7

Ang lokal nga mga Saksi nagtukod pag-usab sa balay niining pamilyaha