Kataposan sa Paglaglag
SINULAT SA KORESPONSAL SA PAGMATA! SA BRITANYA
“Ang ikatulong bahin sa kinaiyanhong kalibotan ginalaglag pinaagi sa tawhanong kalihokan sa miaging 25 ka tuig.”
MAO kanay taho sa World Wide Fund for Nature. Kining makapakugang nga estadistika gibutyag atol sa pagluwat sa Living Planet Index, usa ka bag-ong pag-analisar sa kalikopan sa kalibotan pinasukad sa estadistika.
Ang mga tigkonserbar nagtaho ug 10-porsiyentong kadaot sa mga lasang sa planeta. Apan kining numeroha nagtabon sa mas dakong kadaot sa bagang lasang sa tropiko ug mala nga mga lasang, gawas pa sa kadaot sa mga espisye sa lasang, nga lagmit sobra pa sa 10 porsiyento, matod sa The Independent nga mantalaan sa London. Ang kalikopan sa dagat nakaagom ug 30-porsiyentong kadaot, nga makita diha sa pagkunhod sa mga espisye sama sa bariles sa Atlantiko ug sa pawikan nga leatherback sa kadagatan sa Asia. Ang kinagrabehan sa tanan mao ang 50-porsiyentong pag-us-os sa Freshwater Ecosystems Index, nga ilabinang gipasangil sa nag-uswag nga agrikultural ug industriyal nga polusyon maingon man sa mas dakong konsumo sa tubig.
“Ang pagtipig sa kinaiyanhong mga ekosistema dili man luho nga dato ray makaarang,” matod ni Sir Ghillian Prance, direktor sa Royal Botanical Gardens sa Kew, London, Inglaterra, “apan hinungdanon aron maseguro nga mamentinar ang hinungdanong ekolohikanhong kalihokan sa atong planeta nga niana kitang tanan nagadepende aron kita magpabiling buhi.” Ang matag molupyo niining planetaha nalangkit. Busa unsaon pagkab-ot ang dumalayong solusyon sa tibuok kalibotan?
Makaiikag, ang kataposang libro sa Bibliya, ang Pinadayag, nagpunting niadtong nagalaglag sa yuta. Nagtagna kini sa panahon sa dihang sila mismo pagalaglagon. (Pinadayag 11:18) Duna bay magpabiling-buhi? Oo, tungod kay kini moabot pinaagi sa pagpangilabot ni “Jehova nga Diyos, ang Labing Gamhanan,” kinsa nakabaton sa bugtong solusyon sa mga suliran sa kalikopan niining yutaa ug sa gahom sa pagpatuman niini. (Pinadayag 11:17) Ang Pinadayag 21:3 naghubit sa panahon sa dihang ang Diyos “mopuyo uban [sa katawhan], ug sila mahimong iyang mga katawhan.”
Sa unsang paagi ikaw mahimong usa sa ‘iyang katawhan’ ug makabaton sa paglaom nga makitang maulian na ang kadaot karon sa kalikopan sa yuta? Palihog kontaka ang mga Saksi ni Jehova sa imong dapit pinaagi sa pagsulat sa usa sa mga adres sa panid 5. O pakigsulti kanila sa sunod panahon nga sila moduaw sa imong balay. Malipay sila sa pagtabang kanimo nga makakat-on ug dugang bahin sa kon unsay imong mahimo karon aron maandam na sa dihang mangilabot na ang Diyos sa di-madugay.