Ang Kamatuoran sa Bibliya Nagpahigawas Kanila
SI Jesu-Kristo miingon sa usa ka grupo sa mga tawo: “Kamo mahibalo sa kamatuoran, ug ang kamatuoran magpagawas kaninyo.” (Juan 8:32) Ingon sa gipakita sa mosunod nga mga kasinatian, ang maong kagawasan naglakip sa kagawasan gikan sa impluwensiya sa bakakon ug limbongang mga demonyo, nga maoy nagpaluyo sa espiritismo.—Juan 8:44.
Gipasiugda sa matag usa niini nga mga kasinatian ang gahom sa kamatuoran sa Bibliya. Oo, kini lamang ang tinuod nga makapahigawas sa mga tawo. Nganong dili nimo susihon mismo ang Bibliya? Kon imo kanang buhaton, dili ka gayod magmahay.
[Kahon/Hulagway sa panid 8]
Ang mga hulagway pasundayag sa aktuwal nga hitabo
● Si Susanna maoy usa ka saserdote sa templo sa Brazil. Gusto niyang gamiton ang iyang talagsaong gahom sa pagtabang sa mga nanginahanglan. Dugang pa, siya pirmeng “makig-estorya sa iyang namatay nga inahan.” Apan sa ulahi, gihangyo siya sa iyang “inahan” nga maghikog aron mag-uban sila sa kalibotan sa mga espiritu. Nalisang niini si Susanna ug siya nakasinatig ngil-ad nga mga damgo. Dayon, si Susanna ug ang iyang bana misugod pagtuon sa Bibliya uban sa mga Saksi ni Jehova. Sila nalisdan sa ‘pagsukol sa Yawa,’ apan sa ngadtongadto kini ‘mikalagiw gikan kanila.’ (Santiago 4:7) Karon sila nakatagamtam nag kalinaw ug si Susanna wala na makasinatig ngil-ad nga mga damgo. “Daghan kaayo kog angayng pasalamatan kang Jehova,” siya misulat, “apan ang labaw nakong gipasalamatan mao nga iya kaming gipagawas sa espirituwal nga kangitngit.”
[Kahon/Hulagway sa panid 8]
● Si Timothy, nga taga-West Africa, bungol ug amang.a Tungod kay wala siya matambali sa mga doktor, siya miadto sa mga tambalan, apan wala gihapon maayo. “Naguol ko pag-ayo kay ako nalimbongan,” siya misulat. Dayon si Timothy nagtuon sa Bibliya uban sa mga Saksi ni Jehova, kinsa nagpatin-aw kaniya bahin sa katuyoan sa Diyos nga wagtangon ang tanang sakit ug depekto sa lawas. Si Timothy miingon, “Naghinamhinam ko sa bag-ong kalibotan sa Diyos sa dihang ‘ang igdulungog sa mga bungol mabuksan . . . ug ang dila sa amang mosinggit sa kasadya.’” (Isaias 35:1-6) Sa kasamtangan, siya malipayong naggamit ug madaladalang DVD player aron sa pagpaambit sa kamatuoran sa Bibliya ngadto sa mga amang, nga nagtabang kanila sa pagkaplag sa tinuod nga kagawasan.
[Footnote]
a Ang ubang ngalan giilisan.
[Kahon/Hulagway sa panid 9]
● Si Evelyn, nga taga-Estonia, nalangkit pag-ayo sa espiritismo. Gusto niyang sundogon si Jesus nga mag-ayog mga masakiton. Siya nagtinguha gayod sa pagtambal sa iyang inahan nga may laygayng sakit. Busa aron makadayagnos ug makatambal siyag grabeng mga sakit, nagtuon siya sa paggamit ug mga pendulo. Sa ulahi, iyang gisusi ang Bibliya. Unsay resulta? “Ako nakaamgo nga nalimbongan diay ko,” siya miingon. “Busa gisunog nako ang akong mga basahon ug pendulo bahin sa espiritismo.” Karon, gitudlo niya sa uban ang kamatuoran sa Bibliya nga makahatag ug kagawasan.
[Kahon/Hulagway sa panid 9]
● Si Mary nagdako sa usa sa mga isla sa Papua New Guinea diin ang mga tawo mahadlok sa patay. Kon dunay mamatay sa ilang baryo, si Mary matulog ilalom sa katre sa laing tawo kay nahadlok siyang hasion sa espiritu sa namatay kon siya mag-inusara. Dayon, iyang nakat-onan sa Bibliya nga ang mga patay sama rag natulog—anaa sa lubnganan, nga nagpaabot nga banhawon sa Paraiso sa yuta. (Lucas 23:43; Juan 11:11-14) Ingong resulta, siya wala na mahadlok sa patay.
[Kahon/Hulagway sa panid 9]
● Si Alicia, nga gimatuto sa Kristohanong pamilya sa United States, nainteres sa mga basahon ug pelikula nga nalangkit sa espiritismo. Apan sa ulahi, iyang gipalandong pag-ayo ang mga kamatuoran sa Bibliya nga iyang nakat-onan. Kay nakaamgo nga siya, sa pagkatinuod, ‘nakig-ambit sa lamesa ni Jehova ug sa lamesa sa mga demonyo,’ siya mihimog mga kausaban ug karon nakabaton nag hinlong konsensiya atubangan sa Diyos.—1 Corinto 10:21.