Pagsublisubli Aron Magpasiugda

ANG epektibong pagtudlo naglakip sa pagsublisubli. Sa dihang ipahayag nga dili lang kausa ang usa ka hinungdanong punto, ang mga tawong nagatambong lagmit mas makahinumdom niana. Kon usbon pagpahayag ang ideya sa lahig diyutay nga paagi, sila basin makasabot nga mas tin-aw niana.

Kon ang imong mga tigpatalinghog dili makahinumdom sa imong gisulti, ang imong mga pulong dili makaapektar sa ilang gituohan o sa paagi sa ilang pagkinabuhi. Lagmit sila magpadayon sa paghunahuna sa mga punto nga sa linain imong gipasiugda.

Si Jehova, ang atong Dakong Instruktor, naghatag kanatog sulondan sa iyang pagsublisubli. Gihatag niya ang Napulo ka Sugo ngadto sa nasod sa Israel. Pinaagi sa tigpamaba nga manulonda, iyang gipahinabo nga makadungog ang nasod sa maong mga sugo didto sa Bukid sa Sinai. Sa ulahi iyang gihatag kana kang Moises diha sa sinulat nga porma. (Ex. 20:1-17; 31:18; Deut. 5:22) Sa pagmando ni Jehova, gipahayag na usab ni Moises kadtong mga sugoa ngadto sa nasod sa wala pa sila mosulod sa Yutang Saad, ug pinaagi sa balaang espiritu, si Moises naghimog usa ka talaan niana, sumala sa makita sa Deuteronomio 5:6-21. Apil sa mga sugo nga gihatag sa Israel mao ang kinahanglanon nga sila mahigugma ug mag-alagad kang Jehova uban sa bug-os nilang kasingkasing, kalag, ug kusog. Kana usab gibalikbalik pagpahayag. (Deut. 6:5; 10:12; 11:13; 30:6) Ngano? Tungod kay, sumala sa giingon ni Jesus, kadto “ang kinadak-an ug unang sugo.” (Mat. 22:34-38) Pinaagi sa manalagnang si Jeremias, si Jehova nagpahinumdom sa katawhan sa Juda kapig 20 ka beses bahin sa kaseryoso sa pagsunod kaniya diha sa tanang butang nga iyang gisugo kanila. (Jer. 7:23; 11:4; 12:17; 19:15) Ug pinaagi ni Ezequiel, ang Diyos nagpahayag sa kapig 60 ka beses nga ang mga nasod “makaila gayod nga ako mao si Jehova.”​—Ezeq. 6:10; 38:23.

Diha sa talaan sa ministeryo ni Jesus, mapanid-an usab nato ang epektibong pagsublisubli. Pananglitan, anaa ang upat ka Ebanghelyo​—matag usa naghisgot sa hinungdanong mga hitabo nga gitaho sa usa o labaw pa sa laing mga Ebanghelyo apan nag-isip sa maong mga hitabo pinasukad sa lahig diyutayng mga punto de bista. Sa iyang pagpanudlo mismo, si Jesus naghisgot sa samang paninugdang punto sa pagtulon-an nga labaw sa usa ka higayon apan diha sa nagkalainlaing mga paagi. (Mar. 9:34-37; 10:35-45; Juan 13:2-17) Ug samtang didto sa Bukid sa mga Olibo pipila ka adlaw una pa siya mamatay, si Jesus migamit sa pagsublisubli aron ipasiugda kining bililhong tambag: “Magpadayon sa pagbantay, . . . tungod kay kamo wala mahibalo kon unsang adlawa moabot ang inyong Ginoo.”​—Mat. 24:42; 25:13.

Diha sa Pag-alagad sa Kanataran. Sa dihang magasangyaw ka sa mga tawo, maglaom ka nga makahinumdom sila sa imong gisulti. Ang epektibong pagsublisubli makatabang sa pagkab-ot sa maong tumong.

Subsob, ang pagsublisubli sa panahong gihisgotan ang usa ka butang makatabang sa pagsilsil niana diha sa hunahuna sa tawo. Busa, human sa pagbasag kasulatan, makapasiugda ka niana pinaagi sa pagpunting sa usa ka hinungdanong bahin niana ug mangutana, “Namatikdan mo ba kon giunsa paghan-ay ang mga pulong sa maong teksto?”

Ang kataposang mga tudling-pulong sa usa ka panagkabildo magamit usab nga epektibo. Pananglitan, ikaw makaingon: “Ang pangunang punto nga gipanghinaot kong imong mahinumdoman gikan sa atong panagkabildo mao . . .” Unya ipahayag kana pag-usab sa yanong paagi. Kini mahimong susama niini: “Ang katuyoan sa Diyos mao nga ang yuta mahimong usa ka paraiso. Ang maong katuyoan seguradong matuman.” O lagmit nga kini: “Ang Bibliya tin-awng nagpakita nga kita nagakinabuhi sa kataposang mga adlaw niining sistemaha sa mga butang. Aron kita makalabang buhi sa kalaglagan niini, kinahanglang mahibaloan nato kon unsay gikinahanglan sa Diyos kanato.” O mahimong kini: “Sumala sa atong nakita, ang Bibliya naghatag ug praktikal nga tambag bahin sa kon unsaon pagsagubang ang mga suliran sa pamilyahanong kinabuhi.” Sa pipila ka kahimtang mahimong sublion lamang nimo ang usa ka pangutlo gikan sa Bibliya ingong punto nga pagahinumdoman. Siyempre, aron epektibo kining mahimo, ang abanteng pagpalandong gikinahanglan.

Sa mga balikduaw, apil ang mga pagtuon sa Bibliya, ang imong pagsublisubli mahimong maglakip sa mga pangutana isip repaso.

Sa dihang ang usa ka tawo malisdan sa pagsabot o pagpadapat sa tambag sa Bibliya, basin kinahanglang hisgotan mo dili lang usa ka higayon ang maong butang. Paningkamoti nga hisgotan kana pinasukad sa nagkalainlaing mga punto de bista. Ang mga panaghisgot dili kinahanglang taas apan angayng magdasig sa estudyante sa pagpalandong nianang ulohana. Hinumdomi, gigamit ni Jesus kining matanga sa pagsublisubli aron ang iyang mga tinun-an matabangan sa pagbuntog sa tinguha nga maanaa sa unang dapit.​—Mat. 18:1-6; 20:20-28; Luc. 22:24-27.

Sa Dihang Magadiskurso. Kon mohatag kag mga pakigpulong diha sa plataporma, ang imong tumong dili lang pagpresentar sa impormasyon. Buot nimong ang mamiminaw makasabot niana, makahinumdom niana, ug magpadapat niana. Aron makab-ot kana, gamita sa epektibong paagi ang pagsublisubli.

Ugaling lang, kon subsob kaayo ang imong pagsubli sa mga pangunang punto, basin mawad-an ka sa atensiyon sa imong mamiminaw. Piliag maayo ang mga punto nga angayng ipasiugda sa linain. Kini sila kasagarang mao ang mga pangunang punto nga maoy pasikaranan sa imong pakigpulong, apan kini mahimong naglakip usab ug ubang mga ideya nga ilabinang bililhon sa imong mamiminaw.

Aron mapahimuslan ang pagsublisubli, ikalaraw una nimo ang imong mga pangunang punto diha sa introduksiyon. Himoa kana nga magagamit ug mugbong mga pahayag nga maghatag sa katibuk-ang sumaryo sa imong hisgotan, uban ang mga pangutana, o mugbong mga pananglitan nga magpadayag sa mga problema nga sulbaronon. Imong ikapahayag kon pila ang mga pangunang punto ug ilista kana pinaagig numero. Unya han-aya ang matag usa sa maong mga punto diha sa lawas sa imong pakigpulong. Ang pagpasiugda malig-on diha sa lawas sa imong pakigpulong pinaagi sa pagpahayag na usab sa matag pangunang punto sa dili pa mohisgot sa sunod nga punto. O mahimo kini pinaagi sa paggamit ug pananglitan nga naglangkit sa pagpadapat sa pangunang punto. Ang dugang pasiugda ikahatag sa imong mga pangunang punto pinaagi sa paggamit ug konklusyon nga magpahayag na usab kanila, magpatugbaw kanila pinaagi sa paggamit ug mga katugbang, magtubag sa mga pangutanang gipatungha, o daklit nga magpadayag sa mga sulbad sa mga problema nga gipresentar.

Dugang pa sa gihisgotan sa itaas, ang eksperyensiyadong mamumulong maniid pag-ayo sa mga indibiduwal nga naglangkob sa iyang mamiminaw. Kon ang pipila kanila basin malisdan sa pagsabot sa usa ka ideya, ang mamumulong nahibalo niana. Kon hinungdanon ang punto, iyang hisgotan kanag usab. Bisan pa niana, ang pagsubli sa paglitok sa samang mga pulong mahimong dili makapalampos sa iyang katuyoan. Ang pagtudlo labaw pa kay niana. Kinahanglan nga siya magpahiuyon. Basin kinahanglan nga iyang himoon ang dihadihang mga pagdugang sa iyang pakigpulong. Ang imong pagkat-on sa pag-atubang sa mga panginahanglan sa mamiminaw niining paagiha maoy magtino sa dakong paagi sa imong pagkaepektibo isip magtutudlo.