Mga Payunir sa Ika-20ng Siglo

ANG pulong “payunir” bantog kaayo sa tibuok kalibotan. Kini kasagarang nagpunting sa usa ka tawo nga unang nanimuyo sa usa ka lugar, nag-andam ug dalan alang sa uban nga moabot sa ulahi. Ang mga paningkamot sa nangaging mga payunir sa pagbukas ug bag-ong mga teritoryo dakog nahimo sa umaabot nga mga kaliwatan.

Aduna pa bay bag-ong mga dapit nga mahimong ugbahon? Oo. Dili sa gawas sa kawanangan, apan dinhi mismo sa yuta. Kita nagkinahanglag mga payunir nga magaablig dalan paggawas sa karong moral, ekonomikanhon ug politikanhong kalapokan nga nahiagoman sa tawo. Ang usa ka gamay nga grupo sa dedikadong mga tawo nagatudlo na sa dalan pagawas sa kapin sa usa ka gatos ka tuig. Kini sila ang matuod nga mga payunir sa ika-20ng siglo.

Ang mga Saksi ni Jehova migamit ug Bibliya ingong ilang tigpangitag-dalan. (Salmo 119:105) Ang sinulat nga Pulong sa Diyos nagtultol kanila sa iyang Gingharian ingong ang bugtong paagi sa pagsulbad sa malisod nga mga suliran nga nakahatag suliran sa tawhanong mga magmamando. Dili lamang ang karong-adlaw nga kalisod ang mawala kondili ang maayong mga saad ni Jehova labaw pa. Makita sa umaabot ang usa ka Paraiso nga yuta. (Pinadayag 21:1-4) Pinaagi lamang sa langitnong kagamhanan sa Diyos, uban kang Kristo Jesus ingong Hari, nga kini makakaplag ug katumanan. Ang Isaias 9:7 miingon: “Sa kauswagan sa iyang harianong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron sa pagtukod niini nga malig-on ug sa pagtuboy niini pinaagi sa hustisya ug pagkamatarong, sukad karon ug hangtod sa walay kataposan. Ang kakugi ni Jehova sa mga panon maoy magahimo niini.”

Sama sa unang mga payunir, diin taliwala kanila ang mga lalaki, ug mga babaye ug kabataan nakig-ambit sa pagpahiluna diha sa usa ka bag-ong yuta, ang mga Saksi ni Jehova sa lainlaing pangedaron ug sekso ang tanan nakig-ambit sa pagpakaylap sa maayong balita nga gikan sa Bibliya. Taliwala kanila, hinunoa, adunay miboluntaryo sa pagpanguna sa paggugol ug mga oras gikan sa 60 ngadto sa 140 kada bulan sa buluhatong pagsangyaw. Sa tukma, kining bug-os panahong mga magsasangyaw gitawag nga mga payunir.a

Kini bang matanga sa pagpayunir mao ang labing maayo alang kanimo? O ikaw ba mopilig laing matang sa pagpayunir sa ika-20ng siglo?

Dili ang Tanang Pagpayunir Mohatag Katagbawan

Ang mga indibiduwal nga nagbukas sa dalan alang sa usa ka bag-ong paagi sa teknolohiya o bag-ong matang sa ideya maoy mga payunir usab. Ang pagpayunir sa sekular nga natad, hinunoa, kasagaran motultol sa kapakyasan ug kapaitan. Ania ang pipila ka bantog-kaayo nga mga pananglitan.

Ang usa ka payunir sa industriya sa asiro, si Andrew Carnegie, dugay nang gidayeg sa daghan. Siya ang usa sa labing adunahang mga tawo sa iyang panahon. Ingong usa ka pilantropo milyon-milyon ang iyang gipanghatag. Siya ba malipayon? Kas-a sa dihang ang usa ka reporter miingon kang Gng. Carnegie kon unsa kadako ang iyang kasina niya, ang reporter natingala niini nga tubag: “Ako dili angay nga kasinahan. Sa unsang paagi ang akong salapi makatabang kanako? Ako saysenta anyos na, ug dili na makahilis sa akong pagkaon. Akong ihatag ang tanan kong minilyon kon akong mabatonan pag-usab ang kabatan-on ug kabaskog.” Unya, diha sa mapait nga tuno siya mipadayon, “Ako malipay sa pagbaligya sa tanan kong mga butang aron mabatonan ko lamang ang kinabuhi pag-usab.”

Ang laing multimilyonaryo, nga si J. Paul Getty, ilado tungod sa asiete, mipalanog niini nga hunahuna sa dihang siya miingon: “Ang salapi walay gayoy kalabotan sa kalipay. Ang pagkawalay-kalipay hinuon.”

Unsay ikasulti bahin sa karera sa pagpayunir sa natad sa siyensiya? Pamatia ang usa sa labing tinahod nga mga siyentipiko ug mga payunir sa nukleyar nga pisika, si Albert Einstein, nga kas-a miingon bahin sa modernong siyensiya: “Sa gubat kini nagsilbi nga gihiloan ug ginapaangol nato ang usa ug usa. Sa kalinaw kini naghimo sa atong mga kinabuhi nga dinalidali ug walay-kasegurohan. . . . Kini naghimo sa mga tawo nga mga ulipon sa makinariya nga sa kinadak-ang bahin nagpabug-os sa ilang makalaay tibuok adlaw nga buluhaton nga may kapungot.” Dugang pa, diha sa usa ka sulat ngadto sa usa ka higala, gipahayag ni Einstein ang kapaitan sa pagkakita sa iyang kahibalo sa atomo nga gigamit alang sa paggamag atomikong mga bomba.

Ang karera sa politika ba mas labawng magantihon? Bisan pag makabalik kita sa panahon diha sa usa ka dili-kaayo komplikado nga katilingban, ang pagpayunir sa natad sa politika dili makagarantiyag katagbawan. Pananglitan, si Abraham Lincoln maoy usa sa labing dinayeg nga mga politiko. Siya nag-alagad ingong presidente sa kaulohan sa nasod. Apan human nga siya gipatay, ang iyang kaugalingong anak, si Tad miingon bahin kaniya: “Siya wala gayod magmalipayon sukad nga siya nahiabot dinhi. Kini dili usa ka maayong dapit alang kaniya.”

Dili ang bahandi, sekular nga kahibalo ni ang kabantog ang makapasalig ug katagbawan. Daghan ang nanagdamgo sa pagbukas ug usa ka bag-ong dalan sa natad sa negosyo, sa mga dula, kalingawan, politika o siyensiya. Sila nangagpas sa katumanan sa ilang mga damgo ug, kon makab-ot na, mosangpot nga moingon nga mahigawaron: ‘Mao ba lamang kini?’

Ang Pagpayunir nga Tinuod nga Makapatagbaw

Ang uban nakahukom ug lahi nga dalan alang sa ilang karera—ang bug-os panahong pagsangyaw nga buluhaton. Tinuod gayod nga makapadasig ang pagtan-aw kon unsay nahimo niini nga mga payunir ug unsay ilang pagbati bahin sa ilang buluhaton.

Si Kathe B. Palm misugod sa iyang karera sa bug-os panahong pagsangyaw sa 1931. Kuwarentay-sayis niining mga tuiga gigugol sa Chile, sa Habagatang Amerika, nga nagpamatuod gikan sa usa ka tumoy sa nasod ngadto sa pikas. Nagpalandong sa iyang karera sa pagpayunir, siya miingon: “Wala akoy laing nakaplagang buluhaton nga nakahatag kanakog dakong katagbawan o labing magantihon sa espirituwal . . . Ako nakabaton ug mainit, tagbaw nga pagbati sa makita ko ang daghan kaayong mga tawo nga akong natun-an sa Bibliya nga nagamantala sa maayong balita, nagtabang sa uban nga makadangat sa tubig sa kinabuhi. Akong gidapit sila sa pag-inom sa mga tubig sa kamatuoran, ug karon sila nanapit sa uban.” Sa dihang siya misugod niadtong 1936, dihay 50 lamang ka aktibong Saksi sa tibuok Chile. Karon aduna nay kapin sa 35,359. Ikaw ba nakatilaw sa katagbawan ug sa espirituwal nga pagkamagantihon sa pagpayunir?

Niadtong 1967 si Malinda Z. Keeper miingon: “Ang akong kalipay maoy gikan ilabina sa kamatuoran nga kapin sa singkuwenta ka tuig kanhi akong gitanyag ang akong kaugalingon ingong usa ka mainandamong buluntaryo sa bug-os-panahong pag-alagad.” Karon siya may rekord na nga kapin sa 75 ka tuig ingong usa ka payunir! Balik sa Hunyo 1907, wala matagbaw sa pultahan-ug-pultahan nga pagsangyaw kada Dominggo sa buntag lamang, iyang gisultihan si Igsoong Russell, presidente sa Watch Tower Society, sa iyang tinguha sa pagsulod sa bug-os-panahong pag-alagad. Apan, siya nagduhaduha, kon siya may igong kahibalo. Si Igsoong Russell miingon kaniya: “Kon maghulat ka pa hangtod nga imong makakat-on ang tanan ikaw dili gayod makasugod, apan ikaw makakat-on ra sa magpadayon ka.” Pagkasunod bulan siya misugod sa karera nga payunir nga nagdala kaniya sa 15 ka estado sa Tinipong Bansa. Sa misulod si Malinda sa iyang 100 ka tuig sa kinabuhi, makita gihapon siya nga aktibo sa payunir nga ministeryo.

Ang maayo nga tikanganan sa karera nga payunir mao ang auxiliary payunir nga pag-alagad. Ang paggugol sa 60 ka oras lamang sa usa ka bulan nga pagsangyaw mahimong usa ka makalipay nga kasinatian alang kanimo. Si Jehova nagdapit kanato sa “pagtilaw ug pagtan-aw” nga ang pagsimba kaniya maoy maayo. (Salmo 34:8) Kini nga matang sa pagpayunir mohatag kanimo sa pasiunang “pagtilaw” kon sama sa unsa ang bug-os-panahong pagsangyaw ug pagpanudlo. Kon ikaw wala pa makatilaw sa payunir nga buluhaton niining paagiha, wala ka pa makadiskobre kon unsang kalipay ug katagbawan ang mahatag sa bug-os-panahon nga pag-alagad.

Naghatag ka bag seryosong pagpamalandong sa imong karera? Ikaw ba, usab, modawat niining kahibulongang panulondon sa payunir nga pag-alagad? Moduyog ka ba sa nagakadaghang bug-os-panahong mga magsasangyaw ug mahimong usa sa mga payunir sa ika-20ng siglo?

[Footnote]