Usa ka Okasyong Doble ang Kalipay

ANG Marso 3, 1985, maoy okasyong doble ang kalipay, ilabina alang sa 42 ka estudyante sa ika-78 nga klase sa Watchtower Bible School of Gilead. Kadto dili ra adlaw sa graduwasyon—hinungdan sa pagkalipay—kondili kadto usab ang unang panahong ang usa ka graduwasyon sa Gilead gihimo sa bag-ong Brooklyn Assembly Hall, nga gidedikar sa miagi pang adlaw.

Sa pagka alas 10:00 s.b., ang 2,400-lingkoranan nga tigomanan napuno na sa usa ka panon nga nasakopan sa mga estudyanteng mograduwar, ilang mga pamilya ug mga higala, ug, sa unang panahon sa daghang katuigan sa usa ka graduwasyon sa Gilead, sa enterong pamilya sa Brooklyn Bethel. Diha ang kaukyab sa palibot. Ug ang mga komento bahin sa pagkatahom ang pagremodel sa mga igsoon sa tigomanan mao ang naglabi sa estoryahay. Dayag kaayong walay mausa ang nagpugong sa kalipay ug pagkamapasalamaton nga uban niana nag-awas ang iyang kasingkasing.

Sa eksaktong alas 10:00 s.b., si Theodore Jaracz, ang tsirman sa adlaw, miawhag sa mamiminaw sa paghilom. Siya gipakpakan ug kusog sa dihang siya yanong mikomento: “Nindot nga maania dinhi, dili ba?” Tin-aw, napasanong niya sila pinaagi niadtong mga pulonga.

Ang topiko sa kalipay daw diha kaayo sa mga hunahuna sa mga mamumulong niadtong adlawa. Si George Gangas sa Nagamandong Lawas namulong bahin sa ulohang “Tagamtama ang Kalipay Diha sa Misyonaryong Natad—Sa Unsang Paagi?” Gisultihan niya ang mga estudyanteng migraduwar nga maingong si Jehova migamit sa mga manulonda sa nangagi, “Si Jehova magagamit kaninyo sa pagluwas sa katawhan gikan sa kaulipnan sa bilanggoan ni Satanas.” Dako gayod kaayo ang kalipay nga ipatungha niana kanila! Unya si Daniel Sydlik mitambag sa mga estudyante nga “ikuyog ang suod nga higala” sa ilang pag-adto sa ilang langyaw nga mga asaynment. Ang Bibliya mao kanang higalaa. Sila makadepende niana sa ilang takna sa panginahanglan, gisultihan niya sila. Kini gamhanan kaayo nga usa ra ka tudling-pulong, o bisan usa ka pulong gikan niana usahay igo na sa pagtabang sa usa ka tawo. Basaha kana ug pamati niana sa kada adlaw, siya mitambag sa mga estudyante, ug tabangi ang uban sa pagbuhat sa sama.

Sa pagpatin-aw sa temang kalipay, si Robert Wallen sa Komite sa Balayng Bethel miawhag sa mga estudyante sa paghupot padayon sa “Ania ako! Ipadala ako” nga tinamdan, ug si Joel Adams sa Komite sa Departamento sa Pag-alagad misulti sa klase: “Sa pagtagamtam sa labing bug-os sa kalipay, kinahanglang kita bug-os debotado sa pagbuhat sa kabubut-on sa Diyos. Ang duha dili mabulag.”

Nadawat usab sa mga estudyante ang panamilit nga tambag gikan sa duha nila ka instruktor. Si Ulysses Glass nagpahinumdom kanila nga “ang misyonaryong kinabuhi dili tanan sidlak ang adlaw ug kahayag.” Sa pag-asoy sa matagnaong drama ni Elias ug Eliseo, iyang giawhag sila sa pagsundog sa modernong-adlaw nga Eliseo nga matang ug mounong sa ilang buluhaton hangtod sa kataposan. Si Jack Redford nagpasorpresa sa tanan sa pag-ingon: “Sa miaging tuig nahibalag ko ang usa ka tawo nga wala masayop sa 4,000 ka tuig.” Siya nagtumong sa usa ka Ehiptohanong embalsamadong lawas sa usa ka musiyo. Siyempre, ang punto mao nga ang mga patay nga tawo lamang ang dili masayop. Apan kon iatubang kanato ang atong mga sayop, molihok ba kita sama kang Saul, kinsa misulay sa pagpakamatarong sa iyang mga sayop, o sama kang David, kinsa daling midawat sa iyaha? Mopukaw gayod sa hunahuna nga mga pangutana!

Ang kataposang mamumulong sa buntag mao ang presidente sa Watchtower Bible School of Gilead, si F. W. Franz. Siya, nga nagtawag sa Tunghaan sa Gilead nga “usa ka labing maayong sulundan sa pagtuo,” miasoy sa unsang paagi ang tunghaan nanguna sa buluhatong pagmantala sa maayong balita sa Gingharian sa tibuok kalibotan. Karon ang 42 ka estudyante sa ika-78 nga klase may pribilehiyo sa pag-adto ngadto sa 14 ka nasod sa pagtabang sa maong dakong buluhaton.

Pagkadawat nila sa ilang mga diploma, usa sa mga estudyante, si Gordon Grant, miabante ug nagbasa sa usa ka sulat sa pasalamat sa klase. “Kami misulod ingong nagkinahanglang mga lalaki ug mga babaye, bisan pag wala namo kana hiamgohi niadto,” matud niya. “Karong adlawa, sa pagkatapos sa lima ra ka bulan, kami mobiya nga tugob ug busog.” Ilang gihukom nga pahimuslan pag-ayo ang ilang pagbansay ug espirituwal nga bahandi diha sa bag-o nilang mga asaynment.

Ang programa sa hapon misugod uban sa mga estudyante nga miapil sa pinamubong Pagtuon sa Watchtower nga gidumala ni Calvin Chyke sa Komite sa Pabrika. Unya gipasundayag sa mga estudyante ang masadyang pasundayag sa mga kasinatian ug musikal nga mga bahin, nga nagpasiugda sa ilang natun-an pinaagi lamang sa pagpaniid ug pagpakig-uban sa pamilyang Bethel ug sa uban. Sa kataposan, ilang gidula ang makapatandog nga drama sa Bibliya, nga gipasukad sa halandumong asoy bahin ni Jose ug sa iyang mga igsoon. Daghang mata nga nagluha sa mamiminaw.

Sa gitapos sa tsirman ang programa sa adlaw, ang tanang mitambong bug-os-kasingkasing nga miuyong maayo nga sila didto. Oo, kadto usa ka adlaw nga napuno sa espirituwal maayong mga butang—usa ka okasyong doble ang kalipay!